Explainer: మధుమేహంతో బాధపడుతున్నారా..? ఏ పప్పు తినాలో ఏ పప్పు తినకూడదు ఇప్పుడే తెలుసుకోండి!!

భారతదేశ ఆహారంలో పప్పుధాన్యాలు (Pulses) ఒక ముఖ్యమైన భాగం. ఇవి శాఖాహారులకు ప్రోటీన్,  పోషకాలకు ప్రధాన వనరులు. అయితే మధుమేహం (diabetes) ఉన్నవారు రక్తంలో చక్కెర స్థాయిలను నియంత్రించడానికి ఏ పప్పులను ఆహారంలో చేర్చుకోవాలి.. వేటికి దూరంగా ఉండాలి అనే సందేహం సర్వసాధారణం. పోషకాహార నిపుణుల అభిప్రాయం ప్రకారం.. పప్పులు మధుమేహ రోగులకు శ్రేయస్కరమైన ఆహారం. ఎందుకంటే అవి రక్తంలో చక్కెర స్థాయిలను అదుపులో ఉంచడంలో కీలక పాత్ర పోషిస్తాయి. ఈ అంశంపై పూర్తి  వివరాలను ఈ ఆర్టికల్‌లో తెలుసుకుందాం.

పప్పులకు, మధుమేహానికి సంబంధం ఏమిటి..?

మధుమేహాన్ని నియంత్రించడానికి పప్పులు ఎంతగానో ఉపయోగపడతాయి. దీనికి ప్రధానంగా రెండు కారణాలు ఉన్నాయి. ఫైబర్: పప్పుల్లో కరిగే, కరగని ఫైబర్ పుష్కలంగా ఉంటుంది. ఈ ఫైబర్ జీర్ణక్రియ ప్రక్రియను నెమ్మదిస్తుంది.. తద్వారా ఆహారం నుంచి గ్లూకోజ్  నెమ్మదిగా రక్తంలోకి విడుదల అవుతుంది. ఫలితంగా.. రక్తంలో చక్కెర స్థాయిలు ఒక్కసారిగా పెరగకుండా నిరోధించబడతాయి. పప్పులు నాణ్యమైన మొక్కల ఆధారిత ప్రోటీన్‌కు అద్భుతమైన మూలం. ప్రోటీన్ తీసుకోవడం వల్ల కడుపు నిండిన భావన ఎక్కువసేపు ఉంటుంది. తరచుగా ఆకలి వేయకుండా నిరోధిస్తుంది, ఇన్సులిన్ సున్నితత్వాన్ని (Insulin Sensitivity) మెరుగుపరచడంలో సహాయపడుతుంది. - exercises

గ్లైసెమిక్ ఇండెక్స్ (GI) రహస్యం:

ఏ ఆహారం రక్తంలో చక్కెరపై ఎంత ప్రభావం చూపుతుందో తెలుసుకోవడానికి గ్లైసెమిక్ ఇండెక్స్ (GI) ను ఉపయోగిస్తారు. 55 లేదా అంతకంటే తక్కువ GI ఉన్న ఆహారాలు చక్కెరను నెమ్మదిగా పెంచుతాయి. మధుమేహ రోగులకు ఇవి ఉత్తమమైనవి. అదేవిధంగా 56 నుంచి 69 మధ్య GI ఉన్న ఆహారాలను మితంగా తీసుకోవాలి. చాలా పప్పులు తక్కువ GI ని కలిగి ఉండటం మధుమేహ రోగులకు శుభవార్త. శనగపప్పు (Chana Dal) GI అత్యంత తక్కువగా ఉండటం వలన.. దీనిని మధుమేహ రోగులు తరచుగా వారి ఆహారంలో చేర్చుకోవచ్చని నిపుణులు సలహా ఇస్తున్నారు.

మధుమేహం ఉంటే తినకూడని పప్పులు:

సాధారణంగా అన్ని పప్పులు ఆరోగ్యకరమైనవే అయినప్పటికీ.. కొన్ని పప్పులను లేదా వాటి తయారీ విధానాలను మధుమేహ రోగులు తప్పనిసరిగా పరిమితం చేయాలి. మినప్పప్పు (Urad Dal)లో ప్రోటీన్, ఫైబర్ ఉన్నప్పటికీ.. దీనిని కొన్ని కారణాల వల్ల పరిమితం చేయాలని నిపుణులు సూచిస్తున్నారు. మినప్పప్పు ఇతర పప్పుల కంటే జీర్ణం కావడానికి ఎక్కువ సమయం పడుతుంది, గ్యాస్, ఉబ్బరం (Bloating) కలిగించే అవకాశం ఉంది. మధుమేహ రోగులకు మంచి జీర్ణ ఆరోగ్యం చాలా ముఖ్యం. మినప్పప్పును తరచుగా దాల్ మఖానీ, వడ, ఇడ్లీ, దోసె వంటి రూపాల్లో తింటారు. ఈ వంటకాల తయారీలో అధిక కొవ్వు తగినంత ఫెర్మెంటేషన్ లేకపోవడం వలన అవి మధుమేహానికి హానికరం కావచ్చు. అందుకని మినప్పప్పు తినదలుచుకుంటే.. దాన్ని తక్కువ నూనెతో తక్కువ మసాలాతో, సాదా పప్పుగా చేసుకొని మితంగా తినాలి. నెయ్యి, వెన్న వంటి కొవ్వు పదార్థాలను కలపకుండా ఉండటం ఉత్తమం.

ఇది కూడా చదవండి: పెరుగుతున్న వంధ్యత్వ కేసులు.. జీవనశైలి మార్పులే ప్రధాన కారణం, మీరు కూడా బాధితులేనా..?

అధిక పప్పుల వినియోగం:

ఏ పప్పు అయినా సరే అధిక పరిమాణంలో తీసుకోకూడదు. పోర్షన్ కంట్రోల్ అనేది మధుమేహ ఆహారంలో కీలకం. ఎందుకంటే పప్పుల్లో కూడా పిండి పదార్థాలు (Carbohydrates) ఉంటాయి. ఎక్కువ తింటే చక్కెర స్థాయిలు పెరుగుతాయి. పప్పులు ఆరోగ్యానికి మంచివే అయినప్పటికీ.. వాటిని వండే విధానం ద్వారానే అవి మధుమేహ రోగులకు హానికరంగా మారతాయి. మధుమేహ రోగులు ఖచ్చితంగా మానుకోవాల్సిన వంట పద్ధతులు ఉన్నాయి. క్రీమ్, వెన్న, అధిక నెయ్యి కలిపి తయారు చేసిన ఏ పప్పు వంటకమైనా మానుకోవాలి. అధిక కొవ్వు, కేలరీలు ఇన్సులిన్ నిరోధకతను పెంచి.. రక్తంలో చక్కెర నియంత్రణను కష్టతరం చేస్తాయి. నూనెలో వేయించిన పప్పు పదార్థాలు, పప్పు వడ, పకోడా, దహి భల్లా, పప్పు నింపిన పూరీ లేదా కచోరీ, ఇలా నూనెలో వేయించిన పదార్థాల వల్ల కొవ్వు శాతం విపరీతంగా పెరిగి మధుమేహం మరింత పెరుగుతుంది. కొన్ని పప్పు వంటకాలలో రుచి కోసం బెల్లం, చక్కెర కలుపుతారు. ఉప్పు అధికంగా తీసుకోవడం వలన రక్తపోటు (High Blood Pressure) పెరిగే ప్రమాదం ఉంది. ఇది మధుమేహంతో ముడిపడి ఉన్న తీవ్ర సమస్య.

పప్పులను మరింత ఆరోగ్యకరంగా చేసుకునే చిట్కాలు:

బహుళ పప్పుల మిశ్రమం: శనగపప్పు, పెసరపప్పు, మసూర్ పప్పు, కందిపప్పులను కలిపి వండటం వల్ల అన్ని పోషకాలు అందుతాయి. ఇంకా పాలకూర, టమోటా, సొరకాయ లేదా క్యారెట్ వంటి కూరగాయలను పప్పులో కలిపి వండటం వలన ఫైబర్, పోషక విలువ మరింత పెరుగుతుంది. అంతేకాకుండా నెయ్యి, నూనె లేదా క్రీమ్ వాడకాన్ని తగ్గించాలి. ఇంగువ, జీలకర్ర, కరివేపాకుతో సాదా తాళింపు ఉత్తమం. అయితే పప్పులను వండడానికి ముందు 6-8 గంటలు నానబెట్టడం వలన అందులోని ఫైటిక్ యాసిడ్ (Phytic Acid) తగ్గి, జీర్ణక్రియ మెరుగుపడుతుంది. ఇంకా పెసలు, శనగలను మొలకెత్తించి (Sprouting) అల్పాహారంగా తీసుకోవడం వలన వాటి పోషక విలువలు, విటమిన్లు గణనీయంగా పెరుగుతాయి. మధుమేహ రోగులకు పప్పులు పోషకాల గని వంటివి. ప్రధానంగా శనగపప్పు, పెసరపప్పు, కందిపప్పు వంటి తక్కువ GI ఉన్న పప్పులను ఆహారంలో చేర్చుకోవడం వలన చక్కెర స్థాయిలను సులభంగా నియంత్రించుకోవచ్చు. అయితే వంట పద్ధతి సరళంగా ఉండేలా చూసుకోవడం, అధిక కొవ్వు, నూనెలను నివారించడం మధుమేహ నియంత్రణలో అత్యంత కీలకమైన అంశాలని నిపుణులు చెబుతున్నారు.

గమనిక: ఈ కథనం ఇంటర్నెట్‌లో అందుబాటులో ఉన్న సమాచారం ఆధారంగా మాత్రమే ఇచ్చినది. RTV దీనిని ధృవీకరించడం లేదు. ఆరోగ్య సమస్యల నివారణకు సంబంధిత వైద్య నిపుణుడిని సంప్రదించడం ఉత్తమం.

ఇది కూడా చదవండి: గుండె ఆరోగ్యానికి చికెన్ మంచిదా లేక మటన్ హా..? ఆరోగ్య నిపుణులు ఏమంటున్నారో తెలుసుకోండి!!