Heart Attack: శీతాకాలంలో ఎక్కువగా గుండె పోటు రావడానికి కారణం ఏంటి..? వచ్చే సమయంలో కనిపించే లక్షణాలు.. రాకుండా తీసుకోవాల్సిన జాగ్రత్తలు

Heart Attack: నేటి కాలంలో పెరుగుతున్న టెన్షన్లు, ఒత్తిడి, మారిన జీవనశైలితోపాటు.. చలికాలం తీవ్రత గుండెపోటు ప్రమాదాన్ని పెంచుతున్నాయని వైద్య నిపుణులు హెచ్చరిస్తున్నారు. మరీ ముఖ్యంగా శీతాకాలంలో గుండెపోటు కేసులు 25 నుంచి 30 శాతం వరకు పెరుగుతున్నాయని చెబుతున్నారు. దీంతో ప్రజల్లో మరింత ఆందోళన కలిగిస్తోంది. చిన్న వయసులోనే గుండెపోటుతో మరణిస్తున్న వారి సంఖ్య పెరుగుతుండడం దీని తీవ్రతను తెలియజేస్తోంది. గుండెపోటును నివారించడానికి.. ఆ సమయంలో ప్రాణాలను రక్షించడానికి తీసుకోవాల్సిన చర్యలు, నివారణ మార్గాలపై ప్రతి ఒక్కరికీ అవగాహన ఉండడం చాలా అవసరమని నిపుణులు చెబుతున్నారు.

శీతాకాలంలో గుండెపోటు ఎందుకు పెరుగుతుంది..?

రక్తనాళాల సంకోచం:

చలి కారణంగా శరీరంలోని రక్తనాళాలు బిగుసుకుపోతాయి లేదా సంకోచానికి గురవుతాయి. దీనివల్ల రక్తనాళాలు సన్నబడతాయి. గుండెకు రక్తాన్ని పంపడానికి ఎక్కువ శక్తి అవసరం అవుతుంది. ఫలితంగా రక్తపోటు (BP) పెరుగుతుంది. పెరిగిన ఈ ఒత్తిడి గుండెపోటుకు దారితీస్తుంది. అంతేకాకుండా రక్తం చిక్కబడే (Thicker Blood) అవకాశం ఉంటుంది. దీంతో రక్తం గడ్డకట్టే (Clotting) ప్రక్రియ వేగవంతం అవుతుంది. కొరోనరీ ఆర్టరీస్‌లో కొవ్వు ఫలకాలు (Plaque) ఉంటే.. దానిపై రక్తం గడ్డకట్టి, రక్త ప్రవాహానికి అడ్డంకి ఏర్పడుతుంది.

Also Read: ఎన్నికల కమిషన్ చేపట్టిన SIR అంటే ఏంటీ? రాజకీయ పార్టీల అభ్యంతరాలు దేనికి?

విటమిన్-డి తగ్గడం:

చలి కారణంగా ఎండ తక్కువగా ఉండటం వలన శరీరంలో విటమిన్-డి స్థాయిలు తగ్గుతాయి. విటమిన్-డి లోపం కూడా గుండె ఆరోగ్యంపై ప్రభావం చూపుతుంది. అంతేకాకుండా చలికి భయపడి చాలామంది ఇంట్లోనే ఉండటం, వ్యాయామం తగ్గించడం, అకస్మాత్తుగా ఉదయం పూట భారీ వ్యాయామాలు చేయడం వల్ల కూడా గుండెపై అదనపు భారం పడుతుంది. ఈ సీజన్‌లో ఫ్లూ, న్యుమోనియా వంటి శ్వాసకోశ ఇన్ఫెక్షన్లు ఎక్కువ. ఇవి శరీరంలో వాపును పెంచి, గుండెపోటు ప్రమాదాన్ని మరింత పెంచుతాయి. గుండెపోటు వచ్చే ముందు కొన్ని  లక్షణాలు కనిపిస్తాయి.  అయితే ఈ లక్షణాలు వ్యక్తిని బట్టి మారవచ్చు. కొందరిలో హఠాత్తుగా తీవ్ర లక్షణాలు కనిపిస్తే, మరికొందరిలో కొన్ని రోజుల ముందు నుంచే చిన్న చిన్న సంకేతాలు కనిపించవచ్చు.

మహిళల్లో, వృద్ధుల్లో ఈ లక్షణాలు కొంత భిన్నంగా ఉండవచ్చు. ఛాతీ నొప్పి, అసౌకర్యం ఛాతీ మధ్యలో లేదా ఎడమ వైపున ఒత్తిడి, బిగుతు, పిండడం లేదా బరువుగా అనిపించడం. నొప్పి వ్యాపించడం, నొప్పి చేతులకు, వీపు, మెడ, దవడ లేదా కడుపుపై భాగానికి వ్యాపించడం. శ్వాస ఆడకపోవడం, శ్వాస తీసుకోవడంలో ఇబ్బంది, ఆయాసం. ఇది ఛాతీ నొప్పికి ముందు లేదా దానితోపాటు రావచ్చు, అకస్మాత్తుగా చల్లటి చెమటలు పట్టడం, తలతిరగడం, వికారం, వాంతులు, అజీర్ణం, గుండెల్లో మంట వంటి అనుభూతులు. అలసట ఎటువంటి కారణం లేకుండా తీవ్రమైన అలసట లేదా నీరసంగా అనిపించడం వంటి లక్షణాలు ఉంటాయి. గ్యాస్ట్రిక్ నొప్పి లక్షణాలు కొన్నిసార్లు గుండె నొప్పిలాగే అనిపించవచ్చు. అయితే గుండె నొప్పి తరచుగా శారీరక శ్రమతో పెరుగుతుంది. విశ్రాంతి తీసుకున్నా తగ్గకపోవచ్చు. ఈ లక్షణాలు కనిపిస్తే తక్షణమే వైద్య సహాయం తీసుకోవాలి.

Also Read: మొదటి భార్యకు విడాకులు ఇవ్వకుండానే హేమమాలినిని రెండో పెళ్లి.. హగ్గుల కోసం రీ-టేక్‌లు!

 తీసుకోవాల్సిన తక్షణ చర్యలు:

గుండెపోటు అనేది అత్యవసర పరిస్థితి. ప్రతి నిమిషం విలువైనదే. ప్రాణాపాయం నుంచి బయటపడాలంటే తక్షణమే ఈ చర్యలు తీసుకోవాలి. నొప్పి వచ్చిన వ్యక్తిని వెంటనే కూర్చోబెట్టాలి లేదా పడుకోబెట్టాలి. విశ్రాంతి తీసుకునేలా చూడాలి. తక్షణమే 108 లేదా అంబులెన్స్‌కు కాల్ చేయాలి. ఆసుపత్రికి వెళ్లడానికి సిద్ధంగా ఉండాలి. వైద్య సలహా ప్రకారం.. గుండెపోటు లక్షణాలు ఉన్నట్లు నిర్ధారించుకుంటే.. నమలడానికి (Chowable) వీలైన 300 mg వరకు ప్లెయిన్ యాస్పిరిన్ టాబ్లెట్‌ను ఇవ్వాలి. యాస్పిరిన్ రక్తం గడ్డకట్టకుండా కొంతవరకు అడ్డుకుంటుంది. గుండె జబ్బు ఉన్నవారికి వైద్యులు నైట్రోగ్లిసరిన్ మందును సూచించి ఉంటే ఆ మాత్రను నాలుక కింద ఉంచాలి. ఆందోళనను తగ్గించి, రోగిని ప్రశాంతంగా ఉంచడానికి ప్రయత్నించాలి. గాలి బాగా వచ్చేలా కిటికీలు తెరవాలి. రోగి స్పృహ కోల్పోయి, శ్వాస, హృదయ స్పందన లేకపోతే వెంటనే C.P.R. ప్రారంభించాలి. C.P.R పై శిక్షణ పొందిన వ్యక్తి మాత్రమే దీనిని చేయాలి.

తీసుకోవాల్సిన జాగ్రత్తలు:

గుండెపోటును నివారించడం మన జీవనశైలిపై ఆధారపడి ఉంటుంది. ఆరోగ్యకరమైన అలవాట్లను పాటిస్తే గుండె సమస్యల ప్రమాదాన్ని తగ్గించవచ్చు. పండ్లు, కూరగాయలు, తృణధాన్యాలు (Whole Grains), లీన్ ప్రోటీన్లు (Lean Proteins),  ఆరోగ్యకరమైన కొవ్వులు అవకాడో, నట్స్, ఆలివ్ ఆయిల్ ఉండే ఆహారం తీసుకోవాలి. సంతృప్త కొవ్వులు (Saturated Fats), ట్రాన్స్ ఫ్యాట్స్ (Trans Fats), అధిక కొలెస్ట్రాల్, సోడియం ఉండే ఆహారాన్ని పరిమితం చేయాలి. రోజుకు 1.5 స్పూన్ల ఉప్పు (2400 mg) మించకూడదు. ఫాస్ట్‌ ఫుడ్, మైదాతో చేసిన పదార్థాలు తగ్గించాలి. రెడ్ మీట్ బీఫ్, పోర్క్, మటన్ తీసుకోవడం తగ్గించాలి. శరీరంలో డీహైడ్రేషన్ కాకుండా తగినంత నీరు తీసుకోవడం ముఖ్యమని నిపుణులు చెబుతున్నారు.

జీవనశైలిలో మార్పులు:

వారానికి కనీసం 150 నిమిషాలు ఏరోబిక్ వ్యాయామం చేయాలి. చలికాలంలో అకస్మాత్తుగా భారీ వ్యాయామాలు చేయకుండా, ఇంట్లోనే తేలికపాటి ఇండోర్ వ్యాయామాలు చేయడం ఉత్తమం. పొగతాగడం, అధికంగా మద్యం సేవించడం రక్తనాళాలలో బ్లాక్‌లను పెంచుతాయి.. కాబట్టి వీటిని పూర్తిగా మానేయాలి. వృత్తిపరమైన, వ్యక్తిగత ఒత్తిడిని తగ్గించుకోవడానికి యోగా, ధ్యానం, లోతైన శ్వాస వ్యాయామాలు  సాధన చేయాలి. రోజుకు 7-8 గంటల పాటు కనీస నిద్ర ఉండేలా చూసుకోవాలి. ఊబకాయం గుండె జబ్బులకు ప్రధాన కారకం. ఆరోగ్యకరమైన బరువును పాటించాలి.

శీతాకాల ప్రత్యేక జాగ్రత్తలు:

చలికి గురికాకుండా ఉండటానికి వెచ్చని దుస్తులు ధరించాలి. ముఖ్యంగా ఛాతీ, చేతులు, తలను వెచ్చగా ఉంచాలి. తీవ్రమైన చలిలో ఉదయం పూట వాకింగ్ లేదా శారీరక శ్రమ చేయకుండా.. చలి తగ్గిన తర్వాత లేదా ఇంట్లోనే వ్యాయామం చేయాలి. గుండెపోటు ప్రమాదం వయస్సుతో సంబంధం లేకుండా పెరుగుతున్నప్పటికీ.. ప్రతి వయస్సు వారు కొన్ని ప్రత్యేక జాగ్రత్తలు తీసుకోవాలి.  ప్రస్తుతం 30-45 సంవత్సరాల వయస్సులో గుండె జబ్బులు సర్వసాధారణంగా మారుతున్నాయి. ప్రధాన కారణాలు ఒత్తిడి, నిశ్చల జీవనశైలి, ధూమపానం, ఆహారపు అలవాట్లు మార్చుకోవాలి. క్రమం తప్పకుండా పూర్తి శారీరక పరీక్షలు  చేయించుకోవాలి. ఒత్తిడి నిర్వహణకు ప్రాధాన్యత ఇవ్వాలి. ఫాస్ట్‌ ఫుడ్‌ను పూర్తిగా తగ్గించాలి. 45-60 సంవత్సరాల వయస్సులో మధుమేహం (Diabetes), అధిక రక్తపోటు (High BP), కొలెస్ట్రాల్ వంటి సమస్యలు పెరిగే అవకాశం ఉంది.

ఇది కూడా చదవండి: ఫోన్ వదలకుండానే మానసిక ప్రశాంతతను పొందండి.. అందుకు ఈ 7 పద్ధతులు తప్పకుండా తెలుసుకోండి!!

ప్రతి నెలా రక్తపోటు, కొలెస్ట్రాల్ స్థాయిలను పర్యవేక్షించడం, వైద్యులు సూచించిన మందులను సకాలంలో తీసుకోవడం, వారానికి కనీసం 5 రోజులు వ్యాయామం చేయాలి. ఇంకా 60 సంవత్సరాలు పైబడినవారు వృద్ధుల్లో  సహజంగా వచ్చే గుండె బలహీనతలు, ఇతర దీర్ఘకాలిక వ్యాధులు ఉన్నాయి. శీతాకాలంలో చలి నుంచి పూర్తిగా రక్షణ పొందాలి. వైద్యుల సలహా మేరకు ఫ్లూ, న్యుమోనియా టీకాలు తీసుకోవడం మంచిది. తేలికపాటి శారీరక శ్రమకే ప్రాధాన్యత ఇవ్వాలి. మహిళల్లో గుండె జబ్బుల ప్రమాదం పెరుగుతుంది. కాబట్టి మరింత అప్రమత్తంగా ఉండాలి. గుండెపోటు అనేది సకాలంలో గుర్తించి.. చికిత్స అందిస్తే ప్రాణాపాయం నుంచి బయటపడే అవకాశం ఉంటుంది. కాబట్టి ఎప్పుడైనా అనుమానాస్పద లక్షణాలు కనిపిస్తే నిర్లక్ష్యం చేయకుండా తక్షణమే అత్యవసర వైద్య సహాయం తీసుకోవాలని నిపుణులు చెబుతున్నారు.

గమనిక: ఈ కథనం ఇంటర్నెట్‌లో అందుబాటులో ఉన్న సమాచారం ఆధారంగా మాత్రమే ఇచ్చినది. RTV దీనిని ధృవీకరించడం లేదు. ఆరోగ్య సమస్యల నివారణకు సంబంధిత వైద్య నిపుణుడిని సంప్రదించడం ఉత్తమం.

ఇది కూడా చదవండి:ఉదయం లేవగానే పది నిమిషాలు ఇలా చేయండి.. రోజు మొత్తం ఉత్సాహంగా గడపండి