Sleep Tips: నిద్ర లేకపోవడం, జుట్టు రాలడానికి మధ్య సంబంధం ఏంటో తెలుసా..?

నేటి ఆధునిక జీవనశైలి(daily-life-style)లో పని ఒత్తిడి, సామాజిక మాధ్యమాలు, ఆలస్యంగా మొబైల్ ఫోన్లు వాడటం వంటి కారణాల వల్ల చాలా మంది నిద్రను నిర్లక్ష్యం చేస్తున్నారు. సరైన సమయానికి.. తగినంత నిద్ర లేకపోవడం వల్ల శరీరంపై మాత్రమే కాకుండా.. జుట్టు ఆరోగ్యంపైనా తీవ్ర ప్రభావం పడుతోందని నిపుణులు హెచ్చరిస్తున్నారు. జుట్టు కూడా శరీరంలో ఒక భాగమే. దీనికి కూడా సరైన పోషణ, విశ్రాంతి అవసరం. మనం రాత్రి పూట ప్రశాంతంగా, గాఢంగా నిద్రించినప్పుడు, శరీరం రిపేర్ మోడ్‌లోకి వెళ్తుంది. ఈ సమయంలోనే జుట్టు కుదుళ్లు బలపడి, జుట్టు పెరుగుదల మెరుగ్గా ఉంటుంది. నిద్ర అసంపూర్తిగా ఉంటే.. ఈ రిపేర్ ప్రక్రియ కూడా అసంపూర్తిగా ఉండిపోతుంది. దీనివల్ల జుట్టు కుదుళ్లు బలహీనపడటం మొదలై.. క్రమంగా జుట్టు రాలడం పెరుగుతుంది.

కార్టిసోల్ హార్మోన్ పాత్ర..

నిద్ర లేమి(sleep) వల్ల శరీరంలో కార్టిసోల్ అనే ఒత్తిడి హార్మోన్ స్థాయి పెరుగుతుంది. ఈ హార్మోన్ స్థాయి పెరిగినప్పుడు.. అది నేరుగా జుట్టు ఆరోగ్యాన్ని దెబ్బతీస్తుంది. అధిక కార్టిసోల్ జుట్టు కుదుళ్లకు రక్త ప్రసరణను తగ్గిస్తుంది. దీని కారణంగా.. కుదుళ్లకు సరైన పోషణ అందక జుట్టు రాలడం మొదలవుతుంది. అంతేకాకుండా అసంపూర్తి నిద్ర జుట్టును బలహీనపరచడమే కాకుండా.. తల చర్మాన్ని  కూడా పాడు చేస్తుంది. నిద్ర లేమి వల్ల తల చర్మం అతిగా పొడిబారడం లేదా జిడ్డుగా మారడం జరుగుతుంది. ఇది చుండ్రు, దురద, ఇరిటేషన్ వంటి సమస్యలకు దారి తీస్తుంది. ఈ అసమతుల్యత జుట్టు కుదుళ్లను మరింత బలహీనపరిచి.. జుట్టు రాలడాన్ని వేగవంతం చేస్తుంది.

ఇది కూడా చదవండి: చలికాలం చిలగడ దుంపలు తినడం వల్ల కలిగే ప్రయోజనాలు తప్పకుండా తెలుసుకోండి

జుట్టు రాలడాన్ని తగ్గించుకోవడానికి నిపుణుల అభిప్రాయం ప్రకారం.. రోజుకు కనీసం 7 నుంచి 8 గంటల నిద్ర చాలా ముఖ్యం. నిద్రపోయే సమయాన్ని, మేల్కొనే సమయాన్ని ఒక కచ్చితమైన దినచర్యగా పాటించడం ద్వారా నిద్ర, జుట్టు ఆరోగ్యం రెండూ మెరుగుపడతాయి. నిద్రకు కనీసం 1 గంట ముందు మొబైల్ ఫోన్లు లేదా ల్యాప్‌టాప్‌లకు దూరంగా ఉండాలి. తేలికపాటి రాత్రి భోజనం తీసుకోవడం మంచిది. ఒత్తిడి తగ్గించుకోవడానికి యోగా లేదా ధ్యానం చేయాలి. ప్రతిరోజూ ఒకే సమయానికి నిద్రకు ఉపక్రమించి, మేల్కొనడానికి ప్రయత్నించాలి. నిద్ర సమస్యలు తీవ్రంగా ఉంటే.. వైద్యుడిని సంప్రదించాలి.  సరైన నిద్రతో కేవలం జుట్టు పెరుగుదల మెరుగుపడటమే కాకుండా.. ముఖం తాజాగా, శరీరం శక్తివంతంగా ఉంటుంది. అందుకే ఆరోగ్యకరమైన జీవితానికి.. ఒత్తైన జుట్టుకు నిద్రకు ప్రాధాన్యత ఇవ్వడం మర్చిపోవద్దని నిపుణులు చెబుతున్నారు. 

గమనిక: ఈ కథనం ఇంటర్నెట్‌లో అందుబాటులో ఉన్న సమాచారం ఆధారంగా మాత్రమే ఇచ్చినది. RTV దీనిని ధృవీకరించడం లేదు. ఆరోగ్య సమస్యల నివారణకు సంబంధిత వైద్య నిపుణుడిని సంప్రదించడం ఉత్తమం.

 ఇది కూడా చదవండి: పొద్దునే ఎవరి ముఖం చూడాలో తెలుసా..?