Memory Power: మధుమేహమే కాదు.. ఈ మూడు వ్యాధులు మీ జ్ఞాపకశక్తిని తినేస్తాయి తెలుసా..?

నేటి కాలంలో జీవనశైలి అలవాట్లు మెదడు ఆరోగ్యంపై ఎంత తీవ్ర ప్రభావం చూపుతున్నాయో తెలుసుకోవడం అవసరం. ఆలోచన, జ్ఞాపకశక్తి, దైనందిన కార్యకలాపాలను ప్రభావితం చేసే అల్జీమర్స్ వంటి వ్యాధులకు, మన అనారోగ్యకరమైన జీవనశైలి ప్రధాన కారణమవుతుందని శాస్త్రీయ అధ్యయనాలు నిరూపిస్తున్నాయి. సాధారణంగా 60-70 ఏళ్ల తర్వాత కనిపించే అధిక రక్తపోటు, మధుమేహం (Diabetes), ఊబకాయం వంటి వ్యాధులు నేడు 30-40 ఏళ్ల వారిలోనూ కనిపిస్తున్నాయి. ఈ వ్యాధులు గుండె, శరీరాన్ని మాత్రమే కాక, మన మెదడుకు తీవ్ర నష్టం కలిగిస్తున్నాయి. అల్జీమర్స్ వ్యాధి (Alzheimer's disease) అనేది ఒక ప్రగతిశీల నాడీ సంబంధిత రుగ్మత. ఇది డిమెన్షియాకు అత్యంత సాధారణ కారణం. డిమెన్షియా అనేది జ్ఞాపకశక్తి, ఆలోచన సామర్థ్యాలు, భాష, సమస్య-పరిష్కార నైపుణ్యాలు వంటి అభిజ్ఞా సామర్థ్యాలు కోల్పోవడాన్ని సూచిస్తుంది. ఈ సామర్థ్యాలు రోజువారీ జీవితాన్ని ప్రభావితం చేసేంత తీవ్రంగా క్షీణిస్తాయి. ఈ మార్పుల కారణంగా మెదడు కణాల మధ్య కమ్యూనికేషన్ దెబ్బతింటుంది. చివరికి ఆ కణాలు చనిపోతాయి. కాలక్రమేణా మెదడు కుంచించుకుపోతుంది.

మెదడుకు ముప్పుగా.. 

మధుమేహం (Diabetes) ప్రభావం: చక్కెర స్థాయిలు దీర్ఘకాలంగా అదుపులో లేకపోతే.. మెదడుకు సరైన శక్తి అందదు. మెదడు కణాలు నెమ్మదించి, జ్ఞాపకశక్తి క్షీణించడం మొదలవుతుంది. మధుమేహం మెదడులోని ఇన్సులిన్ పనితీరును దెబ్బతీస్తుంది. దీనినే కొంతమంది శాస్త్రవేత్తలు టైప్ 3 మధుమేహం అని కూడా పిలుస్తున్నారు.

అధిక రక్తపోటు: అధిక రక్తపోటు (BP) మెదడు రక్తనాళాలపై నిరంతర ఒత్తిడిని పెంచుతుంది. దీని వలన మెదడుకు రక్త ప్రసరణ తగ్గి, తగినంత పోషణ, ఆక్సిజన్ అందక దాని పనితీరు మందగిస్తుందని నిపుణులు చెబుతున్నారు.

ఇది కూడా చదవండి: సంగీతం వింటే ఆ 3 ఆరోగ్య సమస్యలు పరార్.. ఈ విషయాలు మీకు తెలుసా?

ఊబకాయం (Obesity) మరింత ప్రమాదకరం: ముఖ్యంగా పొత్తికడుపు చుట్టూ కొవ్వు ఎక్కువగా ఉన్న ఊబకాయులలో క్రానిక్ ఇన్‌ఫ్లమేషన్ అనే మంట శరీరంలో పెరుగుతుంది. ఇది మెదడులోని నరాలను నెమ్మదిగా దెబ్బతీస్తుంది. ఊబకాయం వల్ల వచ్చే హార్మోన్ల మార్పులు కూడా మెదడు పనితీరును తగ్గిస్తాయి. ఈ లక్షణాలు బయటపడేసరికి ఆలస్యం అవుతుంది. కాబట్టి ఆరోగ్యకరమైన జీవనశైలిని పాటించడం ద్వారా ఈ వ్యాధులను నియంత్రించడం, మెదడును రక్షించుకోవడం చాలా ముఖ్యమని నిపుణులు చెబుతున్నారు.

గమనిక: ఈ కథనం ఇంటర్నెట్‌లో అందుబాటులో ఉన్న సమాచారం ఆధారంగా మాత్రమే ఇచ్చినది. RTV దీనిని ధృవీకరించడం లేదు. ఆరోగ్య సమస్యల నివారణకు సంబంధిత వైద్య నిపుణుడిని సంప్రదించడం ఉత్తమం.

ఇది కూడా చదవండి:కంది, పెసర, శనగ, మినుములు.. ఇందులో ప్రోటీన్ ఎక్కువగా ఉండే పప్పు ఏంటో తెలుసా..?