Trump: వెనిజులాకు మరో బిగ్ షాక్ ఇచ్చిన అమెరికా.. ట్రంప్ కోపానికి కారణం ఇదే!

వెనిజులా అమెరికాల మధ్య ఉద్రిక్తతలు పెరుగుతున్నాయి. వెనిజులాపై అమెరికా అధ్యక్షుడు ట్రంప్ ఎప్పటి నుంచో కత్తి కట్టారు. అక్కడి నుంచి మాదక ద్రవ్యాలు అమెరికాను ముంచెత్తుతున్నాయని ఆరోపణలు ఉన్నాయి. అక్కడి కొన్ని ముఠాలు దీని వెనుక ఉన్నాయని...దానికి వెనిజులా నికోలస్‌ మదురోకు కూడా సపోర్ట్ చేస్తున్నారని చెబుతున్నారు. వెనిజులా అధ్యక్షుడిని పట్టనివ్వాలని కూడా అమెరికా ఎప్నటినుంచో కోరుతోంది. ముదురో సమాచారం ఇస్తే ఏకంగా 50 మిలియన్‌ డాలర్లు (దాదాపు రూ.430 కోట్లు) బహుమతి కూడా ప్రకటించింది.

వైమానిక ప్రాంతాలు మూసివేత..

తాజాగా వెనిజులాకు సంబంధించిన వైమానికి ప్రాంతాన్ని మూసివేయాలని అమెరికా అధ్యక్షుడు ట్రంప్ ఆదేశాలు జారీ చేశారు. వెనిజులా మీదుగా చుట్టుపక్కల ఉన్న వైమానిక ప్రాంతాన్ని పూర్తిగా మూసివేసినట్లుగా పరిగణించాలని అమెరికా అధ్యక్షుడు డొనాల్డ్ ట్రంప్ చెప్పారు. అన్ని విమానయాన సంస్థలు, పైలెట్లు, మాదక ద్రవ్యాలు, మానవ అక్రమ రవాణాదారులును అడ్డుకోవాలని...దాని కోసమే వెనిజులా చుట్టుపక్కల ప్రాంతాలన్నీ మూసివేయాలని చెప్పారు.

అయితే దీనిపై వెనిజులా అధ్యక్షుడు నికోలస్ మాత్రం ట్రంప్ ఆదేశాలపై మండిపడ్డారు. వాటిని తాము తిరస్కరిస్తున్నామని చెప్పారు. మాదకద్రవ్యాల అక్రమ రవాణాలో తనకు ఎలాంటి ప్రమేయం లేదని నికోలస్ మదురో ఖండించారు. వెనిజులాలో ప్రభుత్వాన్ని మార్చడానికి ట్రంప్ ఒక సాకును సృష్టిస్తున్నారని ఆరోపించారు. దీనికి సంబంధించి న్యూ యార్క్ టైమ్స్ ఒక వార్తను కూడా ప్రచురించింది. దీని ప్రకారం మదురో, అధ్యక్షుడు ట్రంప్ తో ఫోన్ లో మాట్లాడారని...త్వరలోనే కలుస్తారని చెప్పింది.

గత మూడు నెలలుగా..

వెనిజులాపై అమెరికా అధ్యక్షుడు ఎప్పటి నుంచో దాడులు చేస్తూనే ఉన్నారు. దీనికి సంబంధించి కరేబియన్ సముద్రంలో భారీగా సైన్యాన్ని మోహరించింది అమెరికా. ఈ క్రమంలో వెనిజులా నౌకలపై 20కి పైగా దాడులు నిర్వహించింది. ఇందులో 80మందికి పైగా మరణించారని తెలుస్తోంది. భారీ యుద్ధ నౌకలు, జలాంతర్గాములు, అత్యాధునిక ఫైటర్‌జెట్‌లను రంగంలోకి దింపింది. ప్రపంచంలోనే అత్యధిక చమురు నిల్వలున్న దేశం చుట్టూ ఇవి టైమ్ కోసం వెయిట్ చేస్తున్నాయి. ఏ క్షణమైనా అమెరికా దళాలు వెనిజులాను ఆక్రమించుకోవచ్చని చెబుతున్నాయి. మాదక ద్రవ్యాల ముఠాల కోసమే ఇదంతా అని అమెరికా చెబుతోంది. దీనికోసం మొత్తం ఎనిమిది వార్ షిప్ లను పంపించింది. ది ఇవో జిమా యాంఫిబియస్‌ రెడీగ్రూప్‌లోనియూఎస్‌ఎస్‌ శాన్‌ ఆంటోనియో, యూఎస్‌ఎస్‌ ఇవో జిమా, యూఎస్‌ఎస్‌ ఫోర్ట్‌ లాడర్‌డేల్‌ నౌకలు 4,500 మంది సైనికులతో కరేబియన్‌ సముద్రంలోకి వెళ్లాయి. వీటిల్లో 22వ మెరైన్‌ యూనిట్‌ కమాండోలు 2,200 మంది ఉన్నారు. ఇవి కాకుండా ఏవీ-8బీ హారియర్‌ అటాక్‌ ఎయిర్‌ క్రాఫ్ట్‌, గైడెడ్‌ మిసైల్‌ డెస్ట్రాయర్లైన యూఎస్‌ఎస్‌ జాన్సన్‌ డున్హమ్‌, యూఎస్‌ఎస్‌ గ్రేవ్లీలను కూడా సముద్రంలో ఉంచారు. యూఎస్ఎస్ శాంప్సన్ కూడా తూర్పు పసిఫిక్ లోకి వచ్చి చేరుతుందని అమెరికా చెబుతోంది.