Deeksha Divas : ఉద్యమాన్ని మలుపు తిప్పిన దీక్ష..నేడు బీఆర్ఎస్ దీక్షాదివస్‌

Deeksha Divas : తెలంగాణ రాష్ట్ర సాధన ఉద్యమంలో భాగంగా బీఆర్‌ఎస్‌(BRS Party) అధినేత, మాజీ సీఎం కేసీఆర్‌(kcr) చేపట్టిన నిరాహార దీక్ష ఘట్టాన్ని గుర్తు చేసుకుంటూ ‘దీక్షా దివస్‌’ పేరుతో  ఆ పార్టీ పలు కార్యక్రమాలు నిర్వహించనుంది. శనివారం తెలంగాణ భవన్‌లో జరిగే ప్రధాన కార్యక్రమంలో పార్టీ వర్కింగ్‌ ప్రెసిడెంట్‌ కేటీఆర్‌(brs-working-president-ktr) పాల్గొంటారు. అన్ని జిల్లా కేంద్రాల్లోనూ పార్టీ కార్యాలయాల్లో జరిగే ఈ కార్యక్రమాల్లో బీఆర్‌ఎస్‌ ఎమ్మెల్యేలు, ఎమ్మెల్సీలు, ఇతర ముఖ్య నేతలు పాల్గొంటారని పార్టీ వర్గాలు తెలిపాయి.
 
‘తెలంగాణ వచ్చుడో.. కేసీఆర్‌ చచ్చుడో’ అనే నినాదం ఇచ్చి, తెలంగాణ ఉద్యమ జ్వాలను ఉవ్వెత్తున రగిలించి నేటికి పదహారేండ్లు. 11 రోజుల కేసీఆర్‌ ఆమరణ నిరాహార దీక్ష ఫలించి, కేంద్రం దిగివచ్చి డిసెంబర్‌ 9న తెలంగాణ రాష్ట్ర ఏర్పాటు ప్రక్రియను ప్రారంభిస్తున్నట్టు ప్రకటన చేయించిన మరుపురాని రోజు. తెలంగాణ రాష్ట్ర ఉద్యమ గతిని మార్చి, చరిత్రను మలుపుతిప్పిన నాటి ప్రత్యేక పోరాట జ్ఞాపకాలను ‘దీక్షా దివస్‌’ వేదికగా మరోసారి నెమరేసుకోవాలని గులాబీ పార్టీ సంకల్పించింది. ఈ అపూరుప సందర్భాన్ని ఘనంగా నిర్వహించాలని నిర్ణయించింది.

బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌ పిలుపు మేరకు వాడవాడలా గులాబీ జెండాలతో అలంకరించింది. బీఆర్‌ఎస్‌ ఆఫీసులను పార్టీ జెండాలు, కేసీఆర్‌ ఫ్లెక్సీలతో ముస్తాబు చేసింది. గులాబీ వర్ణపు విద్యుత్తుకాంతులద్ది అట్టహాసంగా జరుపుకొనేందుకు సర్వం సిద్ధంచేసింది. ‘ఔర్‌ ఏక్‌ దక్కా తెలంగాణ పక్కా..’ అంటూ ప్రతి తెలంగాణ బిడ్డ నోటి నుంచి ప్రతిధ్వనించిన నినాదాన్ని గుర్తు చేసుకుంటూ, ప్రత్యేక రాష్ట్ర సాధనకు మార్గం సుగమమైన ఘట్టాలను నెమరువేసుకునేందుకు ప్రజలు సైతం ఉద్యమ స్ఫూర్తితో సిద్ధమయ్యారు.

కార్యక్రమంలో భాగంగా కేటీఆర్‌ తెలంగాణ భవన్‌లో తెలంగాణ తల్లి విగ్రహానికి పూలమాల వేసి, అమరుల స్తూపానికి నివాళి అర్పిస్తారు. కాగా, దీక్షా దివస్‌ సందర్భంగా తెలంగాణ భవన్‌లో ఉద్యమ ఘట్టాలను గుర్తు చేస్తూ ఫొటో ఎగ్జిబిషన్‌ను ఏర్పాటు చేశారు. రాష్ట్ర సాధన ఉద్యమంలో బీఆర్‌ఎస్, కేసీఆర్‌ పాత్రను గుర్తు చేసేలా రూపొందించిన డాక్యుమెంటరీని కేటీఆర్‌ విడుదల చేస్తారని పార్టీ వర్గాలు తెలిపాయి. 

Also Read :  కోకాపేటలో కాసుల వర్షం.. ఎకరం భూమి రూ.151 కోట్లు

జిల్లా కేంద్రాల్లోనూ కార్యక్రమాలు

దీక్షా దివస్‌ ఏర్పాట్లకు సంబంధించి అన్ని జిల్లాల్లోనూ సన్నాహక సమా వేశాలు నిర్వహించారు. వరంగల్, హనుమకొండ, జనగామ జిల్లా కేంద్రాల్లో జరిగిన సన్నాహక సమావేశాల్లో కేటీఆర్‌ పాల్గొని దిశా నిర్దేశం చేశారు. ఇదిలా ఉండగా.. తెలంగాణ ఉద్యమ చరిత్ర, రాష్ట్ర సాధనలో కేసీఆర్‌ కృషిని కొత్త తరానికి చాటి చెప్పేందుకు యూనివర్సిటీలు, ఇతర ఉన్నత విద్యా సంస్థల్లోనూ ‘దీక్షా దివస్‌’ను నిర్వహించనున్నారు. 

కేసీఆర్‌ కటౌట్లకు పాలాభిషేకాలు: జిల్లా కేంద్రాల్లో తెలంగాణ ఉద్యమ ఘట్టాలకు సంబంధించిన ఫొటో ప్రదర్శనలు ఏర్పాటు చేసేందుకు అవసరమైన ఫొటోలను తెలంగాణ భవన్‌ నుంచి పంపించారు. కార్యక్రమం ప్రారంభంలో కార్యకర్తలు పార్టీ అధినేత కేసీఆర్‌ కటౌట్లకు పాలాభిషేకాలు చేస్తారు. తెలంగాణ భవన్‌లో జరిగే ‘దీక్షా దివస్‌’ఏర్పాట్లను మాజీ మంత్రి తలసాని శ్రీనివాస్‌ యాదవ్‌ శుక్రవారం పరిశీలించారు.

అసలేం జరిగిందంటే..

తెలంగాణ సాధన కోసం సిద్దిపేటలో ఆమరణ దీక్ష చేయనున్నట్లు  బీఆర్‌ఎస్‌ పార్టీ అధినేత కేసీఆర్‌ ప్రకటించారు. 2009 నవంబర్‌ 28న హైదరాబాద్‌ నుంచి బయలుదేరి కరీంనగర్‌కు చేరుకున్నారు. అక్కడి తెలంగాణ భవన్‌లో రాత్రి బసచేశారు. 29వ తేదీన ‘జై తెలంగాణ’ నినాదాలతో తెల్లారింది. కరీంనగర్‌ పట్టణాన్ని పోలీసులు నిర్భందించారు. ఉదయం 11 గంటల ప్రాంతంలో కేసీఆర్‌ ఇంటి నుంచి బయలుదేరేందుకు సిద్ధమయ్యారు. పోలీసులు కేసీఆర్‌ను చుట్టుముట్టారు. ఉద్యమశ్రేణులు వలయాలు.. వలయాలుగా కేసీఆర్‌కు రక్షణ కవచంగా నిలిచి పోలీసులను ప్రతిఘటించాయి. దీంతో తాత్కాలికంగా పోలీసులు వెనక్కితగ్గారు.

సిద్దిపేటలోని ఆమరణ నిరాహార దీక్షాస్థలికి బయలు దేరిన కేసీఆర్‌ వెంట  వేలాది మంది ఉద్యమకారులు కరీంనగర్‌ నుంచి నడిచేందుకు సిద్ధమయ్యారు. అయితే ఎక్కడివారిని అక్కడే కట్టడి చేసేందుకు పోలీసులు వారి వాహనాల టైర్లలో గాలి తీసేశారు. హైదరాబాద్‌, వరంగల్‌ వైపు నుంచి వచ్చే వందలాది వాహనాలను అలుగునూర్‌ చౌరస్తాలో నిలిపివేశారు. వేలాది మందిని దారిమళ్లించారు. అలుగునూర్‌ చౌరస్తాలో మూడు చెక్‌పోస్టులు పెట్టిమరీ పోలీసులు రోడ్లను బ్లాక్‌ చేశారు. బ్రిడ్జి ముందు రెండు చెక్‌పోస్టులు పెట్టి కార్యకర్తలు, నాయకుల వాహనాలను కట్టడి చేశారు.
సిద్దిపేటలోని ఆమరణ నిరాహార దీక్షాస్థలికి వేలాది మంది ఉద్యమకారులు కరీంనగర్‌ నుంచి కేసీఆర్‌ వెంట నడిచేందుకు సిద్ధమయ్యారు. ఎక్కడివారిని అక్కడే కట్టడి చేసేందుకు పోలీసులు వారి వాహనాల టైర్లలో గాలి తీసేశారు. హైదరాబాద్‌, వరంగల్‌ వైపు నుంచి వచ్చే వందలాది వాహనాలను అలుగునూర్‌ చౌరస్తాలో నిలిపివేశారు. వేలాది మందిని దారిమళ్లించారు. అలుగునూర్‌ చౌరస్తాలో మూడు చెక్‌పోస్టులు పెట్టిమరీ పోలీసులు రోడ్లను బ్లాక్‌ చేశారు. బ్రిడ్జి ముందు రెండు చెక్‌పోస్టులు పెట్టి కార్యకర్తలు, నాయకుల వాహనాలను కట్టడి చేశారు.

కరీంనగర్‌ పట్టణంలో ఎడమవైపు ఉన్న కేసీఆర్‌ కాన్వాయ్‌ను సుభాష్‌నగర్‌లో కుడివైపునకు మళ్లించారు. అన్ని వాహనాలను పక్కకు తప్పించి ఓవర్‌టేక్‌ చేసి కేసీఆర్‌ వాహనంతోపాటు పోలీసు సిబ్బంది వాహనాలను మానేరు వంతెన దాటించారు. కేవలం రెండు వెహికిల్స్‌, ఆ తరువాత కేసీఆర్‌ వాహనం, ఆ వెనుక పోలీసు వాహనాలు మాత్రమే ఉన్నాయి.

Also Read :  కొత్త జంటలకు షాక్.. ఇప్పట్లో పెళ్లి ముహూర్తాలు లేనట్టే.. కారణం ఇదే..

వరంగల్‌ మీదుగా ఖమ్మం

అలుగునూర్‌ చౌరస్తా నుంచి కేసీఆర్‌ను అరెస్టు చేసి బస్సులో ఎక్కించిన తర్వాత, ముందు వెనుకా పదుల సంఖ్యలో పోలీసు వాహనాలు బయల్దేరాయి. ‘సిద్దిపేట ఆమరణ నిరాహార దీక్షకు వెళ్తున్న కేసీఆర్‌ను పోలీసులు అరెస్టు చేశారు’ అనే విషయం తెలంగాణ అంతటా దావానలంలా వ్యాపించింది. కరీంనగర్‌, వరంగల్‌ రహదారి క్షణాల్లో వందలాది మంది రోడ్లు ఎక్కేందుకు సిద్ధం అవుతున్నారనే విషయం తెలుసుకొని ముందే వచ్చిన ఆదేశాలకు అనుగుణంగా పోలీసులు రోడ్లకు ఇరువైపులా రోప్‌పార్టీలతో కంట్రోల్‌ చేశారు.

ఉస్మానియా, కాకతీయ సహా విశ్వవిద్యాలయాలు, విద్యాలయాలు ఉద్యమంలోకి దిగాయి. ఆమరణదీక్ష చేపట్టిన కేసీఆర్‌ను ఖమ్మం సబ్‌జైల్‌ నుంచి ఖమ్మం దవాఖానకు, అక్కడి నుంచి హైదరాబాద్‌ నిమ్స్‌కు తరలించారు. నిమ్స్‌లో ఆరోగ్యం క్షీణిస్తున్నా, డాక్టర్లు హెచ్చరిస్తు న్నా.. కేసీఆర్‌ పచ్చిగంగ కూడా ముట్టలేదు. ప్రాణంపోయినా సరే తెలంగాణ రాష్ర్టాన్ని సాధించే తీరుతానని శపథం పట్టారు. మరోవైపు, నవంబర్‌ 29వ తేదీ నుంచి డిసెంబర్‌ 9 వరకు 11 రోజులు తెలంగాణ అగ్నిగుండమైంది.

కాంగ్రెస్‌ ప్రజాప్రతినిధులు, నాయకులను ప్రజలు తిరగనీయని అనివార్యతను తెలంగాణ సృష్టించింది. కేసీఆర్‌ తెగింపు.. ప్రాణత్యాగానికైనా వెనుకాడని పట్టుదల, ఉవ్వెత్తున రగులుతున్న తెలంగాణ ఉద్యమానికి ఢిల్లీ వణికింది. ఫలితంగా నాటి కేంద్ర హోంమంత్రి చిదంబరం ‘తెలంగాణ రాష్ట్ర ఏర్పాటు ప్రక్రియను ప్రారంభిస్తున్నాం’ అని ప్రకటించారు. ఆ తర్వాత సమైక్యవాదుల రాజీనామాలతో మళ్లీ మొదటికి వచ్చినా.. ఢిల్లీ పెద్దలు యూటర్న్‌ తీసుకున్నా.. తెలంగాణ ప్రజలు పట్టు వదలలేదు. తప్పనిసరి పరిస్థితిలో తెలంగాణ ఏర్పాటు ప్రక్రియను పూర్తిచేసింది. 2014 జూన్‌ 2ను తెలంగాణ ఆవిర్భావ దినంగా ప్రకటించింది.  ఇలా ప్రత్యేక తెలంగాణ ఏర్పాటుకు కేసీఆర్‌ దీక్ష ఊపిరిగా పనిచేసింది.