కాళేశ్వరం ప్రాజెక్టులో  భాగంగా మాజీ సీఎం  కేసీఆర్,  మాజీ మంత్రులు హరీష్, ఈటలకు పీసీ ఘోష్‌ కమిషన్‌ మంగళవారం నోటీసులు జారీ చేసిన సంగతి తెలిసిందే. అయితే అ నోటీసులపై మాజీ మంత్రి, బీజేపీ ఎంపీ ఈటల రాజేందర్ స్పందించారు. తనకు ఇంకా ఎలాంటి నోటీసులు అందలేదన్న ఈటల.. నోటీసులకు భయపడేది లేదన్నారు. తాను ఆర్థిక శాఖమంత్రిగా ఉన్న సమయంలో ఆ శాఖ కార్యదర్శిగా ఉన్న రామకృష్ణారావు ప్రస్తుత రాష్ట్ర సీఎస్ గా ఉన్నారని చెప్పారు.  పీసీ కమిషన్ ను ఎందుకు ఇన్నిసార్లు పొడిగించారో చెప్పాలని ఈటల డిమాండ్ చేశారు.  తనతో మంత్రులుగా పనిచేసిన వాళ్లంతా ప్రస్తుతం కాంగ్రెస్ లో ఉన్నారని చెప్పారు. తుమ్మల, కడియం, జూపల్లికి ఏం జరిగిందో తెలియదా అని ఈటల ప్రశ్నించారు. కాగా జూన్ 5న విచారణకు రావాలని కేసీఆర్‌కు, జూన్ 6 హరీష్ రావు, జూన్ 9న ఈటెల రాజేందర్‌ను విచారణకు రావాలని  పీసీ కమిషన్ జారీ చేసిన  నోటీసుల్లో స్పషం చేసింది. 

వాస్తవానికి ఈ వారంలోనే ప్రభుత్వానికి పీసీ ఘోష్‌ కమిషన్‌  రిపోర్టును సమర్పించాల్సి ఉంది. అయితే కేసీఆర్, హరీష్, ఈటల స్టేట్​మెంట్లు లేకుండా రిపోర్ట్​ ఇస్తే లీగల్​ సమస్యలు వచ్చే అవకాశం ఉండడంతో.. వారిని కూడా విచారించాకే రిపోర్టు ఇవ్వాలని కమిషన్​ నిర్ణయించినట్లుగా తెలుస్తోంది. కాగా మేడిగడ్డ బ్యారేజీ కుంగిన ఘటనపై ఇప్పటిదాకా 109 మంది అధికారులు, ప్రైవేట్​వ్యక్తులను కాళేశ్వరం జ్యుడీషియల్​ కమిషన్​ విచారించింది.

కేసీఆర్ తో హరీష్ భేటీ

మరోవైపు కాళేశ్వరం కమిషన్ నోటీసులు ఇచ్చిన వెంటనే మాజీ మంత్రి, సిద్ధిపేట ఎమ్మెల్యే హరీష్ రావు బీఆర్ఎస్ చీఫ్ కేసీఆర్‌తో భేటీ అయ్యారు. గతంలో ఆయన ఇరిగేషన్ మినిస్టర్‌గా ఉన్నప్పుడే కాళేశ్వరం నిర్మించారు. ఈక్రమంలో హరీష్ రావు ఎర్రవల్లి ఫామ్ హౌస్‌కు వెళ్లి కేసీఆర్‌ను కలిశారు. వారిద్దరి మధ్య గంటసేపు చర్చలు జరిగాయి. ఈ భేటీతో తెలంగాణ రాజకీయ వర్గాల్లో ఆసక్తి నెలకొంది. భేటీ అనంతరం హరీష్ రావు తెలంగాణలో ప్రజలు మళ్లీ కేసీఆర్ పాలన కోరుకుంటున్నారని చెప్పారు. అయితే పీసీ ఘోష్‌ కమిషన్‌ కు విచారణకు కేసీఆర్ హాజరు అవుతారా లేదా అన్నది ఇప్పుడు ఆసక్తికరంగా మారింది.