Bird Flu: బాబోయ్ బర్డ్ ఫ్లూ.. ఇక మనుషులకు కూడా.. ఎలా సోకుతుంది..? ఎంత డేంజర్..?

బర్డ్ ఫ్లూ వైరస్ ప్రపంచ ఆరోగ్య వర్గాలను మరోసారి అప్రమత్తం చేసింది. అమెరికాలోని వాషింగ్టన్ రాష్ట్రంలో ఓ వ్యక్తిలో H5N5 రకం ఏవియన్ ఇన్‌ఫ్లూయెంజా (Avian Influenza) లేదా బర్డ్ ఫ్లూ వైరస్ సోకినట్లు అధికారులు ధృవీకరించారు. ఆరోగ్య అధికారుల ప్రకటన ప్రకారం. ఈ వైరస్ మానవునికి సోకడం ప్రపంచంలోనే ఇది మొదటి కేసు. వ్యాధి సోకిన వ్యక్తి, ఇతర ఆరోగ్య సమస్యలు (Underlying Health Conditions) ఉన్న వృద్ధుడు. ఇతను నవంబర్ ప్రారంభంలో ఏవియన్ ఇన్‌ఫ్లూయెంజా లక్షణాలతో ఆసుపత్రిలో చేరాడు. పరీక్షల్లో ఆ వ్యక్తికి సోకిన వైరస్ ఇన్‌ఫ్లూయెంజా A (H5) రకానికి చెందినదని.. మరింత లోతైన విశ్లేషణలో అది గతంలో జంతువులు లేదా పక్షులలో మాత్రమే గుర్తించబడిన H5N5 సబ్‌టైప్ అని నిర్ధారించారు. ఈ కేసు వెలుగులోకి వచ్చిన నేపథ్యంలో.. వైరస్ వ్యాప్తి, ప్రమాదం,  ప్రజారోగ్య పరంగా తీసుకోవాల్సిన జాగ్రత్తల గురించి కొన్ని విషయాలు ఈ ఆర్టికల్‌లో తెలుసుకుందాం.

H5N5 సంక్రమణ మూలం..

వ్యాధి సోకిన వ్యక్తి పెరటిలో పెంపుడు కోళ్లు, ఇతర పక్షుల మిశ్రమ గుంపును (Mixed Backyard Flock of Domestic Poultry) పెంచుకుంటున్నారు. ఈ పెంపుడు పక్షులు అడవి పక్షులతో (Wild Birds) సంబంధం కలిగి ఉన్నాయని ఆరోగ్య అధికారులు తెలిపారు. పెంపుడు పక్షులు, అడవి పక్షులు రెండింటిలో ఏదో ఒకటి ఈ ఇన్‌ఫెక్షన్ సోకడానికి ప్రధాన మూలంగా భావిస్తున్నారు. అయితే.. వైరస్ మనిషికి ఎలా సంక్రమించింది అనే అంశంపై దర్యాప్తు కొనసాగుతోంది. ఈ కేసు వైరస్ ప్రవర్తనలో వచ్చిన కొత్త మార్పును, జంతువుల నుంచి మానవులకు (Zoonotic Transmission) సంక్రమించే సామర్థ్యాన్ని సూచిస్తుంది.

ఏవియన్ ఇన్‌ఫ్లూయెంజాఅంటే ఏమిటి..?

ఏవియన్ ఇన్‌ఫ్లూయెంజా అనేది సాధారణంగా పక్షులకు సోకే ఇన్‌ఫ్లూయెంజా A వైరస్‌ల వల్ల కలిగే వ్యాధి. ఈ వైరస్‌లు సహజంగా నీటి పక్షులలో (Wild Aquatic Birds) ఉంటాయి. ఇవి వైరస్‌కు ఆశ్రయదాతలుగా (Reservoirs) పనిచేస్తాయి. ఇన్‌ఫ్లూయెంజా A వైరస్‌లను వాటి ఉపరితల ప్రోటీన్‌లైన హెమాగ్గ్లుటినిన్ (Hemagglutinin - H), న్యూరామినిడేస్ (Neuraminidase - N) ఆధారంగా వర్గీకరిస్తారు. ఉదాహరణకు A (H5) వైరస్‌లలో H5N1, H5N5, H5N8 వంటి అనేక సబ్-టైప్‌లు ఉంటాయి. కొన్ని రకాలు తక్కువ వ్యాధికారకత కలిగి (LPAI) పక్షులలో తేలికపాటి వ్యాధిని కలిగిస్తాయి. మరికొన్ని రకాలు అధిక వ్యాధికారకత కలిగి (HPAI), పెద్ద సంఖ్యలో పక్షులను వేగంగా చంపగలవు.

ఇది కూడా చదవండి: రోజు రాత్రి పాలు.. ఎండు ద్రాక్షలు మీకు నూతన ఉత్సాహాన్ని ఇవ్వొచ్చు! ఎలానో తెలుసుకోండి!!

H5N5 ఎందుకు ఆందోళనకరం..?

ప్రస్తుతం గుర్తించిన H5N5 అనేది గతంలో పక్షులలో మాత్రమే ఉంది.. కానీ మనుషులలో లేదు. ఇన్‌ఫ్లూయెంజా A (H5) వైరస్‌లు జన్యుపరంగా వైవిధ్యంగా (Genetically Diverse) ఉంటాయి. ఇవి జన్యు పదార్థాన్ని మార్చుకోగలవు (Reassort). అంటే కొత్త వేరియంట్‌లు ఉద్భవించే అవకాశం ఉందని ప్రపంచ జంతు ఆరోగ్య సంస్థ (World Organization for Animal Health) హెచ్చరించింది. ప్రస్తుతానికి మానవులకు ముప్పు తక్కువగా ఉన్నప్పటికీ.. ఈ వైరస్‌లు పక్షి జనాభాలో విస్తృతంగా తిరుగుతున్నందున మహమ్మారి సంభావ్యత (Pandemic Potential) దృష్ట్యా అప్రమత్తత అవసరం. కొత్త సబ్‌టైప్ మానవులలోకి ప్రవేశించడం, వైరస్  అనుగుణ్యత (Adaptation) పెరుగుతున్నట్లు సూచిస్తుంది.

మానవులకు ఎలా వ్యాపిస్తుంది..?

సాధారణంగా మానవులకు ఈ వైరస్ సోకడం చాలా అరుదు. ఇది ప్రధానంగా ఈ కింది పరిస్థితుల్లో సంక్రమిస్తుంది. ఇన్‌ఫెక్షన్ సోకిన పక్షులతో దగ్గరగా, రక్షణ లేకుండా సన్నిహితంగా ఉండటం, పక్షుల స్రావాలతో కలుషితమైన వాతావరణంలో ఉండటం వల్ల వస్తుంది. ప్రపంచ ఆరోగ్య సంస్థ (WHO) ప్రకారం.. పక్షుల స్రావాలతో కలుషితమైన ఉపరితలాలను తాకి.. ఆ తర్వాత కళ్ళు, ముక్కు లేదా నోటిని తాకడం ద్వారా లేదా గాలిలో తేలియాడే తుంపరలు (Droplets) లేదా ధూళి ద్వారా కూడా సంక్రమణ జరగవచ్చు.

మానవులలో లక్షణాలు:

మనిషిలో బర్డ్ ఫ్లూ లక్షణాలు లేకపోవడం (Asymptomatic) నుంచి తేలికపాటి.. చాలా తీవ్రమైన లక్షణాల వరకు ఉండవచ్చు. జ్వరం, దగ్గు, గొంతు నొప్పి, శ్వాస ఆడకపోవడం, అలసట, కండరాల నొప్పులు వంటి ఉంటాయి. అప్పుడప్పుడు వాంతులు లేదా అతిసారం (Diarrhea) వంటి జీర్ణకోశ, కళ్ల మంట సమస్యలు కూడా ఉంటాయి. ఈ తీవ్రమైన కేసులలో న్యుమోనియా (Pneumonia), తీవ్రమైన శ్వాసకోశ బాధ (Acute Respiratory Distress) లేదా మరణం సంభవించవచ్చని నిపుణులు చెబుతున్నారు.

నివారణా చర్యలు:

ప్రపంచ ఆరోగ్య సంస్థలు ప్రజలను భయపడవద్దని.. కానీ అప్రమత్తంగా ఉండాలని కోరుతున్నాయి. వ్యక్తిగత స్థాయిలో తీసుకోవాల్సిన ప్రధాన జాగ్రత్తలు ఉన్నాయి. అనారోగ్యంతో ఉన్న లేదా చనిపోయిన పక్షులను తాకడం లేదా వాటికి దగ్గరగా ఉండటం తప్పనిసరిగా నివారించాలని చెబుతున్నారు. పెంపుడు పక్షులను నిర్వహించేటప్పుడు లేదా వాటి స్థలాలను శుభ్రం చేసేటప్పుడు తగిన రక్షణ పరికరాలైన మాస్క్‌లు, చేతి తొడుగులు, గ్లోవ్స్ ఉపయోగించాలి. అంతేకాకుండా ఇన్‌ఫెక్షన్ సోకిన జంతువుల నుంచి లభించే పచ్చి లేదా సరిగా ఉడకని కోళ్లు, మాంసం, గుడ్లు, పచ్చి పాలు వినియోగాన్ని పూర్తిగా నివారించాలి. వంట చేసేటప్పుడు మాంసాన్ని సురక్షితమైన ఉష్ణోగ్రత వరకు ఉడికించడం వల్ల వైరస్‌ను చనిపోతుందని నిపుణులు చెబుతున్నారు. ప్రజారోగ్య సంస్థలు నిరంతర నిఘా (Surveillance), కొత్త మానవ ఇన్‌ఫెక్షన్లను వేగంగా గుర్తించడంపై దృష్టి పెట్టాలని సిఫార్సు చేస్తున్నాయి. H5N5 కేసు అరుదైనప్పటికీ.. కొత్త సబ్‌టైప్‌లు మానవులకు సోకే సామర్థ్యాన్ని అభివృద్ధి చేయగలవనే వాస్తవం ప్రజారోగ్య వ్యవస్థలకు నిరంతర హెచ్చరికగా ఉందని నిపుణులు చెబుతున్నారు.

గమనిక: ఈ కథనం ఇంటర్నెట్‌లో అందుబాటులో ఉన్న సమాచారం ఆధారంగా మాత్రమే ఇచ్చినది. RTV దీనిని ధృవీకరించడం లేదు. ఆరోగ్య సమస్యల నివారణకు సంబంధిత వైద్య నిపుణుడిని సంప్రదించడం ఉత్తమం.

ఇది కూడా చదవండి: కేరళలో మెదడు తినే అమీబా.. భయపడుతున్న అయ్యప్పలు.. అసలు ఈ వ్యాధి ఏంటి..? నిజంగా డేంజరేనా..?