Sperm Donation Process: స్పెర్మ్ డొనేషన్‌కు ఎవరు అర్హులో.. ఎలా డొనేట్ చేయాలో తెలుసుకోండి

స్పెర్మ్ డొనేషన్ నేటి కాలంలో ఒక అత్యంత ముఖ్యమైన ప్రక్రియగా మారింది. సంతాన భాగ్యం లేనివారికి ఇది ఒక కొత్త ఆశను కల్పిస్తుంది. ఒంటరి మహిళలు, స్వలింగ సంపర్కుల జంటలు, సంతానలేమి సమస్యలతో బాధపడే దంపతులు స్పెర్మ్ డొనేషన్ ద్వారా తమ కుటుంబ కలలను నెరవేర్చుకుంటున్నారు. స్పెర్మ్ డొనేషన్ చేయడానికి దాత ముందుగా కొన్ని అర్హతలను మరియు ఆరోగ్య ప్రమాణాలను పాటించవలసి ఉంటుంది. దాత యొక్క వయస్సు, శారీరక, మానసిక ఆరోగ్యం, కుటుంబ చరిత్ర, జీవనశైలిని పరిగణలోకి తీసుకుంటారు. స్పెర్మ్ డొనేషన్‌కు   అర్హత ఉన్న వయస్సు గురించి, దీనిని ఎంత డబ్బు ఖర్చు చేయాలని అనే దానిపై కొన్ని విషయాలు ఈ ఆర్టికల్‌లో తెలుసుకుందాం.

యోగ్యత-ఆరోగ్య ప్రమాణాలు..

సాధారణంగా 18 నుంచి 39 సంవత్సరాల వయస్సు కలిగిన ఆరోగ్యవంతులైన పురుషులు డొనేషన్ చేయడానికి అర్హులు. ధూమపానం, మద్యం, మాదకద్రవ్యాల సేవనం చేయని ఆరోగ్యకరమైన జీవనశైలి కలిగిన వ్యక్తి అయి ఉండాలని నిపుణులు చెబుతున్నారు. డొనేషన్ ప్రక్రియలో దాతకు వైద్యపరమైన కౌన్సిలింగ్ ఇవ్వబడుతుంది. వైద్యులు దాత శారీరకంగా, మానసికంగా ఈ ప్రక్రియకు సిద్ధంగా ఉన్నారని నిర్ధారించుకుంటారు. తరువాత స్పెర్మ్ నమూనాను సేకరించి దానిని పరీక్షిస్తారు. ఈ పరీక్షలో స్పెర్మ్ సంఖ్య, వేగం, ఆకారం, ఇతర జీవసంబంధ లక్షణాలను పరీక్షిస్తారు. నమూనా అన్ని ప్రమాణాలను పాటించినట్లయితే దానిని భద్రపరుస్తారు. డొనేట్ చేసిన స్పెర్మ్‌ను ద్రవ నైట్రోజన్‌లో నిల్వ చేస్తారు. దీనివల్ల దాని నాణ్యత ఎక్కువ కాలం నిలిచి ఉంటుంది.

ఇది కూడా చదవండి: బ్లాక్‌రైస్, బ్రౌన్‌రైస్ మధ్య తేడా ఏంటి..? ఇందులో ఆరోగ్యానికి ఏది మంచిదో తెలుసా..?

స్పెర్మ్ డొనేషన్ కోసం దాతలకు పరిహారం ఇవ్వబడుతుంది. భారతదేశంలో ఒక డొనేషన్‌కు రూ.1,500 నుంచి 4 వేల వరకు ఇస్తారు. స్పెర్మ్ బ్యాంకు నుంచి స్పెర్మ్ తీసుకునే వారికి ఒక స్పెర్మ్ వాయిల్ ధర 8,000 నుంచి 20,000 వరకు ఉంటుంది. ఈ ధర దాత యొక్క ప్రొఫైల్, విద్య, రక్త గ్రూపు మరియు ఇతర లక్షణాలను బట్టి ఉంటుంది. స్పెర్మ్ డొనేషన్ ద్వారా ఒక వ్యక్తి సమాజానికి సహాయపడటమే కాకుండా ఒక కుటుంబానికి ఆనందాన్ని ఇస్తాడు. డొనేషన్ చేసే ముందు ఆరోగ్య, చట్టపరమైన అంశాలను తెలుసుకోవడం అవసరం. సరైన సమాచారం, బాధ్యతతో కూడిన డొనేషన్ సురక్షితమే కాకుండా సమాజానికి ప్రయోజనకరంగా ఉంటుందని నిపుణులు చెబుతున్నారు.

గమనిక: ఈ కథనం ఇంటర్నెట్‌లో అందుబాటులో ఉన్న సమాచారం ఆధారంగా మాత్రమే ఇచ్చినది. RTV దీనిని ధృవీకరించడం లేదు. ఆరోగ్య సమస్యల నివారణకు సంబంధిత వైద్య నిపుణుడిని సంప్రదించడం ఉత్తమం.

ఇది కూడా చదవండి: సైలెంట్ హార్ట్ ఎటాక్‌తో జాగ్రత్త..ఈ లక్షణాలు ఉంటే ఎక్కువ ప్రమాదం ఉన్నట్లే..!!