Fat Diseases: లావుగా ఉన్నవారికి ఈ 16 వ్యాధులు రావడం ఖాయం

Fat Diseases: ఊబకాయం అనేది శరీరంలో కొవ్వు అధికంగా పేరుకుపోవడం వల్ల ఏర్పడే ఒక దీర్ఘకాలిక వ్యాధి. ఇది ప్రపంచవ్యాప్తంగా వేగంగా పెరుగుతున్న ఆరోగ్య సమస్యల్లో ఒకటిగా నిలిచింది. ఊబకాయంతో గుండె జబ్బులు, మధుమేహం, అధిక రక్తపోటు వంటి అనేక సమస్యలు సంభవిస్తాయి. అయితే తాజాగా జాన్స్ హాప్కిన్స్ విశ్వవిద్యాలయం చేసిన ఒక పరిశోధనలో ఊబకాయం ఉన్నవారికి మొత్తం 16 రకాల ఆరోగ్య సమస్యలు కలిగే ప్రమాదం ఎక్కువగా ఉంటుందని వెల్లడైంది. 

క్యాన్సర్ వంటి సమస్యలన్నీ..

ఈ అధ్యయనంలో అమెరికాలోని 2.7 లక్షల మందిని పరిశీలించారు. వారి బాడీ మాస్ ఇండెక్స్‌ ఆధారంగా మూడు వర్గాలుగా విభజించి ఆరోగ్య పరిస్థితులను పరిశీలించగా ఊబకాయం స్థాయి పెరిగే కొద్దీ ఆరోగ్య సమస్యలు కూడా పెరిగినట్టు తేలింది. దశ-3 ఊబకాయం అనగా BMI 40 కంటే ఎక్కువగా ఉండడం లేదా 35 పైగా ఉండి ఆరోగ్య సమస్యలు ఉండటం. ఇది ఆరోగ్యపరంగా అత్యంత ప్రమాదకరంగా పరిగణించబడుతుంది. ఉబ్బసం, మానసిక ఒత్తిడి, జీర్ణ సమస్యలు, ఫ్యాటీ లివర్, క్యాన్సర్ వంటి సమస్యలన్నీ ఊబకాయంతో ముడిపడి ఉన్నాయి. శారీరక శ్రమ లేకపోవడం, ఎక్కువగా కూర్చునే జీవనశైలి, ప్రాసెస్డ్ ఫుడ్ తీసుకోవడం, అధికంగా తిన్న తర్వాత వ్యాయామం లేకపోవడం, నిద్రలేమి, ఒత్తిడి వంటి కారణాలు ఊబకాయానికి దారితీస్తాయి. కొన్ని మందులు, ఆరోగ్య సమస్యలు కూడా బరువు పెరగడానికి కారణమవుతాయి.

ఇది కూడా చదవండి: డయాబెటిస్ ఉన్నవారు చెరకు రసం తాగవచ్చా? అది సురక్షితమో కాదో తెలుసుకోండి

కొన్ని జన్యుపరమైన అంశాలు ఆకలిని నియంత్రించే సామర్థ్యాన్ని ప్రభావితం చేస్తాయి. అలాంటి వారు తక్కువ శారీరక శ్రమతో ఎక్కువ కేలరీలు తీసుకుంటే శరీరంలో కొవ్వు పేరుకుపోతుంది. నిద్ర సరైన సమయంలో పడకపోతే ఆకలిని నియంత్రించే హార్మోన్ల ప్రభావం తగ్గుతుంది. అంతేకాకుండా శరీరంలోని కార్టిసాల్ వంటి ఒత్తిడి హార్మోన్లు పెరిగితే ఆకలి నియంత్రణ దెబ్బతింటుంది. ఇవన్నీ కలిపి ఊబకాయం మరింత తీవ్రంగా మారే అవకాశం ఉంటుంది. శారీరక శ్రమ, ఆరోగ్యకరమైన ఆహారం, సరైన నిద్ర, స్ట్రెస్‌ కంట్రోల్ ద్వారా మాత్రమే ఊబకాయాన్ని నియంత్రించవచ్చు. లేకపోతే దీర్ఘకాలిక సమస్యలుగా మారే ప్రమాదం ఉంది.

గమనిక: ఈ కథనం ఇంటర్నెట్‌లో అందుబాటులో ఉన్న సమాచారం ఆధారంగా మాత్రమే ఇచ్చినది. RTV దీనిని ధృవీకరించడం లేదు. ఆరోగ్య సమస్యల నివారణకు సంబంధిత వైద్య నిపుణుడిని సంప్రదించడం ఉత్తమం.

ఇది కూడా చదవండి: టైప్ 1, టైప్ 2 డయాబెటిస్ ప్రారంభ లక్షణాలు( health-tips | health tips in telugu | latest health tips | best-health-tips | latest-news)