iBomma Operator Arrested: ఐబొమ్మ రవి కేసులో బిగ్‌ ట్విస్ట్‌.. పైరసీ చేయలేదు సినిమాలు కొన్నాడు

iBomma Operator Arrested: ఐబొమ్మ రవి(iBomma Ravi) కేసులో బిగ్‌ ట్విస్ట్‌ నెలకొంది. రవి సినిమాలను పైరసీ చేయలేదని, సినిమాలు కొని వాటిని ఐ బొమ్మలో అప్‌లోడ్‌ చేశాడని పోలీసులు అంటున్నారు. సినిమా పైరసీ, బెట్టింగ్‌, గేమింగ్‌ యాప్స్‌ ప్రమోషన్‌, కాపీరైట్‌ ఉల్లంఘన, మనీలాండరింగ్‌  తదితర కేసుల్లో అరెస్టయిన ఐ బొమ్మ రవి(i bomma owner immadi ravi)ని విచారిస్తున్న సమయంలో పలు ఆసక్తికర విషయాలు వెలుగు చూస్తున్నాయి. రవి తన వివరాలు, ఈ మెయిల్‌ ఐడీతో ఎన్‌జిలా కంపెనీ ద్వారా డొమైన్‌ రిజిస్ట్రేషన్‌ చేసుకున్నట్లు పోలీసులు తెలిపారు.  ఐపీ వాల్యూమ్‌ హోస్టింగ్‌ తీసుకున్నాడు. తర్వాత కంటెంట్‌ మేనేజ్‌మెంట్‌ సిస్టం ద్వారా పైరసీ సినిమాలు కొని వాటిని హెచ్‌డీ క్వాలిటీ వచ్చేలా ఎన్‌హ్యాన్స్‌ చేస్తాడని విచారణలో తేలింది.

ఇక ఐ బొమ్మ పోస్టర్‌ను రవి స్నేహితుడు నిఖిల్‌ డిజైన్‌ చేస్తాడు. బొమ్మ సైట్లో పోస్టర్‌ పడగానే దాన్ని చూడాలనుకుంటున్నవారు, డౌన్‌లోడ్‌ చేసుకోవాలనుకునేవారు ‘టర్మ్స్‌ అండ్‌ కండిషన్స్‌’ను అంగీకరించాల్సి ఉంటుంది. అంగీకరించగానే వినియోగదారునికి తొలుత బెట్టింగ్‌, గేమింగ్‌ యాప్స్‌ లింకులు ఓపెన్‌ అవుతాయి. యాడ్స్‌ అయిపోయేదాకా వినియోగదారులు చూడాల్సిందే. అలా ఎన్ని లక్షల మంది చూస్తే అంత ఎక్కువ మొత్తంలో రవికి డబ్బులొస్తాయని పోలీసులు తెలిపారు. విలాసవంతంగా గడిపేందుకు అలవాటు పడ్డ  రవి.. తాను బొమ్మ ద్వారా ఆర్జించిన రూ.20 కోట్లలో రూ.17 కోట్లు వెచ్చించి విదేశాల్లో తిరిగినట్లు తెలుస్తోంది. ఇక ఆయన ఖాతాలో మిగిలిన రూ.3 కోట్లను పోలీసులు ఫ్రీజ్‌ చేశారు.

అలాగే  హైదరాబాద్‌లో ఓ ప్లాట్‌ను, వైజాగ్‌లోని ఆస్తులను సీజ్‌ చేశారు. కాగా, ఇమ్మడి రవి సినిమాను నేరుగా పైరసీ చేసినట్లు లేదు. టెలిగ్రామ్‌, మువీరూల్జ్‌, తమిళ్‌ ఎంవీ వంటి పైరసీ సైట్ల నుంచి వాటిని కొంటాడు. ప్రతిగా వారికి క్రిప్టో కరెన్సీ రూపంలో ఆన్‌లైన్‌లో డబ్బు చెల్లిస్తాడు. ఆ పైరసీ సినిమాకు హెచ్‌డీ హంగులు అద్దుతుండటంతో ఐబొమ్మ, బప్పం విపరీతంగా ప్రజాదరణ పొందినట్లు పోలీసులు తెలిపారు. ఈ సైట్లను అడ్డంపెట్టుకొని లక్షల మంది డేటాను తన వద్ద స్టోర్‌ చేసుకోవడంతో పాటు.. బెట్టింగ్‌, గేమింగ్‌ యాప్స్‌ ప్రమోట్‌ చేయడం ద్వారా రవి రూ. కోట్లు సంపాదించినట్లు పోలీసులు గుర్తించారు. త్వరలో వెబ్‌-3 టెక్నాలజీ రానుందని, ఆ టెక్నాలజీతో పైరసీ చేస్తే పట్టుకోవడం కష్టమని అడిషనల్‌ సీపీ వెల్లడించారు.

ఐ బొమ్మలో సినిమా పైరసీ జరుగుతుందని సినిమా ఇండస్ట్రీ నుంచి ఫిర్యాదు వచ్చాక సైబర్‌ క్రైమ్‌ పోలీసులు రంగంలోకి దిగారన్నారు. సాంకేతిక ఆధారాల ద్వారా విచారణ చేస్తున్న క్రమంలో.. వారికి డొమైన్‌ రిజిస్ట్రేషన్‌ వివరాలు దొరికాయన్నారు. అందులో ఇచ్చిన ఫోన్‌ నంబర్‌ ఆధారంగా వాటికి సంబంధించి విదేశాల్లో ఉన్న డొమైన్‌ కంపెనీ నోడల్‌ ఆఫీసర్‌ను ఈ మెయిల్‌ ద్వారా సంప్రదించారన్నారు. అయితే పోలీసులు చేసిన మెయిల్‌ నేరుగా రవికి చేరింది. ఈ డొమైన్‌ ఎవరు వినియోగిస్తున్నారు? సినిమా పైరసీ చేసి ఐబొమ్మలో ఎవరు అప్‌లోడ్‌ చేస్తున్నారు? వివరాలు కావాలని పోలీసులు అడిగినట్లు తెలిసింది.

తనకోసం పోలీసులు ప్రయత్నిస్తున్నారని తెలియగానే. ‘‘సినిమాలు పైరసీ చేస్తున్నట్లు మీ వద్ద ఏం ఆధారాలునాయి?’’ అంటూ తిరిగి రవి వారినే ప్రశ్నించాడు. దాంతో అతని మెయిల్స్‌, వ్యవహారశైలిపై పోలీసులు ఆరాతీశారు. అక్కడితో అతడిని ప్రశ్నించడం ఆపేశారు. అతడి ఐపీ అడ్రస్‌, డొమైన్‌ రిజిస్ట్రేషన్‌లో ఇచ్చిన నంబర్ల ఆధారంగా రివర్స్‌ ఇంజనీరింగ్‌ విచారణ చేసి, సీడీఆర్‌ పెట్టి నిఘా పెట్టినట్లు తెలిపారు. కొద్దిరోజుల వరకు పోలీసుల నుంచి ఎలాంటి మెసేజ్‌ లేకపోవడంతో తనను పట్టుకోలేరనే ఓవర్‌ కాన్ఫిడెన్స్‌తో రవి విదేశాలు తిరుగుతూ.. విజిటింగ్‌లో భాగంగా హైదరాబాద్‌ చేరుకున్నాడన్నారు. ఆ వెంటనే సైబర్‌ క్రైమ్‌ పోలీసులు మూసాపేటలోని రెయిన్‌బో విస్తాలో పట్టుకున్నారన్నారు. రవిని అతడి ఓవర్‌ కాన్ఫిడెన్సే పట్టించిందని పోలీసులు తెలిపారు.