Clinical Trials: ఈ ఔషధం శరీర భారాన్ని తగ్గిస్తుంది.. క్లినికల్ ట్రయల్స్ ఫలితాల్లో అద్భుతం

ఈ రోజుల్లో బరువు పెరగడం, మధుమేహం సర్వసాధారణ సమస్యలుగా మారాయి. ఈ సమస్యలకు సురక్షితమైన, ప్రభావవంతమైన పరిష్కారం కోసం చాలామంది వెతుకుతున్నారు. ఈ నేపథ్యంలో ఎక్నోగ్లుటైడ్ (Ecnoglutide) అనే కొత్త ఔషధం బరువు తగ్గించడానికి మరియు రక్తంలో చక్కెర స్థాయిలను నియంత్రించడానికి సహాయపడుతుందని పరిశోధకులు చెబుతున్నారు. ఈ మందు ఒజెంపిక్ (Ozempic), వెగోవి (Wegovy) వంటి మందుల మాదిరిగానే పనిచేస్తుంది. కానీ దీని ఫలితాలు వాటికంటే మెరుగ్గా ఉన్నట్లు తెలుస్తోంది. వాటి గురించి కొన్ని విషయాలు ఈ ఆర్టికల్‌లో తెలుసుకుందాం.

క్లినికల్ ట్రయల్స్ ఫలితాలు:

చైనాలో 18 నుంచి 75 సంవత్సరాల వయసు గల 621 మంది మధుమేహ రోగులపై జరిపిన ఫేజ్ 3 ట్రయల్స్‌లో ఈ మందు సామర్థ్యం నిరూపించబడింది. మెట్‌ఫార్మిన్ (Metformin)తోపాటు ఎక్నోగ్లుటైడ్ తీసుకున్న రోగులు డ్యులగ్లుటైడ్ (Dulaglutide) తీసుకున్న వారితో పోలిస్తే దాదాపు రెట్టింపు బరువు తగ్గారు.  ఎక్నోగ్లుటైడ్ యొక్క గొప్ప విషయం ఏమిటంటే.. ఇది నేరుగా CAMP మార్గాన్ని లక్ష్యంగా చేసుకుంటుంది. ఇది శరీరం యొక్క బరువు, జీవక్రియను సరిగ్గా నియంత్రిస్తుంది. ఇతర GLP-1 మందులు అనేక మార్గాలను ప్రభావితం చేస్తాయి. దీనివల్ల దుష్ప్రభావాలు ఎక్కువగా ఉండవచ్చు. కానీ ఎక్నోగ్లుటైడ్ విషయంలో ఇది జరగదు. కాబట్టి దీని ప్రభావం మెరుగ్గా, దుష్ప్రభావాలు తక్కువగా ఉంటాయని నిపుణులు చెబుతున్నారు.

ఇది కూడా చదవండి: ఈ ఐదు లక్షణాలు మీ కాలేయాన్ని దెబ్బతీయొచ్చు.. నిర్లక్ష్యం వద్దు!!

ఎక్నోగ్లుటైడ్ తీసుకోవడం వల్ల కేవలం బరువు తగ్గడమే కాకుండా.. నడుము, తుంటి సైజు తగ్గాయి, ట్రైగ్లిసరైడ్స్ స్థాయిలు కూడా తగ్గాయి. ట్రైగ్లిసరైడ్స్ గుండె ఆరోగ్యానికి చాలా ముఖ్యమైనవి. ఇది కేవలం బరువు తగ్గించే మందు కాదు. మొత్తం జీవక్రియ వ్యవస్థకు ప్రయోజనం చేకూర్చే ఔషధం అని పరిశోధకులు చెబుతున్నారు. ఈ మందును రోగులు బాగా తట్టుకున్నారు. కొందరికి వికారం, అతిసారం వంటి తేలికపాటి దుష్ప్రభావాలు కలిగాయి. కానీ కాలక్రమేణా అవి తగ్గిపోయాయి. తక్కువ మోతాదులో కూడా ఇది డ్యులగ్లుటైడ్‌ కంటే ప్రభావవంతంగా ఉందని పరిశోధకులు పేర్కొన్నారు. భవిష్యత్తులో జరిగే ట్రయల్స్ కూడా విజయవంతమైతే.. ఎక్నోగ్లుటైడ్ బరువు తగ్గించడం,  మధుమేహాన్ని నియంత్రించడానికి ఒక గొప్ప మార్పు తీసుకురావచ్చని నిపుణులు చెబుతున్నారు.

గమనిక: ఈ కథనం ఇంటర్నెట్‌లో అందుబాటులో ఉన్న సమాచారం ఆధారంగా మాత్రమే ఇచ్చినది. RTV దీనిని ధృవీకరించడం లేదు. ఆరోగ్య సమస్యల నివారణకు సంబంధిత వైద్య నిపుణుడిని సంప్రదించడం ఉత్తమం.

ఇది కూడా చదవండి: మెడ చుట్టూ నల్లటి వలయం ఏర్పడిందా!! అయితే ఈ వ్యాధి మీకుందేమో చెక్ చేసుకోండి