Skin Cancer: పుట్టుమచ్చను చూసి క్యాన్సర్ పసిగట్టొచ్చు.. ఎలానో తెలుసా..?

ప్రపంచవ్యాప్తంగా వేగంగా పెరుగుతున్న వ్యాధుల్లో చర్మ క్యాన్సర్ ఒకటి. భారతదేశంలో కూడా చర్మ క్యాన్సర్ కేసులు వేగంగా పెరుగుతున్నాయి. నిపుణుల అభిప్రాయం ప్రకారం.. ఈ క్యాన్సర్ ప్రారంభ లక్షణాలు చర్మంపై స్పష్టంగా కనిపిస్తాయి. అందువల్ల దీనిని ముందుగా గుర్తిస్తే.. చికిత్స సులభంగా, విజయవంతంగా పూర్తి చేయవచ్చు. చర్మంపై వచ్చే తొలి మార్పులను సాధారణ సమస్యలుగా భావించి నిర్లక్ష్యం చేయడం వల్లే సమస్య తీవ్రమవుతుంది. శరీరంలో పుట్టుమచ్చలు, మచ్చలు, చిన్న చిన్న మచ్చల్లో వచ్చే మార్పులు లేదా కొత్తగా ఏర్పడే అసాధారణ వృద్ధి చర్మ క్యాన్సర్‌కు తొలి సంకేతాలు కావచ్చు. ఈ మార్పులను గమనిస్తే వెంటనే వైద్యుడిని సంప్రదించాలి.  ఇంకా ఎప్పటికీ నిర్లక్ష్యం చేయకూడని చర్మ క్యాన్సర్ లక్షణాల గురించి కొన్ని విషయాలు ఈ ఆర్టికల్‌లో తెలుసుకుందాం.

చర్మ క్యాన్సర్ ప్రారంభ లక్షణాలు:

చాలా మందికి శరీరంలో పుట్టుమచ్చలు, మచ్చల గురించి తెలుసు. చర్మ క్యాన్సర్ ప్రారంభ లక్షణాలు తరచుగా వీటిలో వచ్చే మార్పులుగా కనిపిస్తాయి. చర్మంపై కొత్త మచ్చ కనిపించినా లేదా పాత పుట్టుమచ్చ రంగు లేదా ఆకృతిలో అకస్మాత్తుగా మారినా.. ఇది చర్మ క్యాన్సర్ ప్రారంభ సంకేతంగా చెబుతారు.చర్మ క్యాన్సర్‌ను గుర్తించడానికి నిపుణులు ABCDE నియమాన్ని అనుసరించాలని సిఫార్సు చేస్తున్నారు. 

 A - Asymmetry (సమరూపత లేకపోవడం): పుట్టుమచ్చలో ఒక భాగం మరో భాగంతో సరిపోలకపోవడం.

B - Border (అంచు): పుట్టుమచ్చ అంచు అసాధారణంగా, అస్పష్టంగా లేదా చిరిగిపోయినట్లు కనిపించడం.

C - Color (రంగు): గోధుమ, నలుపు లేదా తెలుపు వంటి ఒకటి కంటే ఎక్కువ రంగులు కనిపించడం కూడా క్యాన్సర్ సంకేతం కావచ్చు.

D - Diameter (వ్యాసం): పుట్టుమచ్చ పరిమాణం పెరగడం, ముఖ్యంగా అది 6 మి.మీ. కంటే ఎక్కువగా ఉండటం.

E - Evolving (మారుతున్న): కాలక్రమేణా పుట్టుమచ్చలో మార్పు రావడం. దురద, నొప్పి, రక్తస్రావం, కొత్త మచ్చ ఏర్పడటం.

అంతేకాకుండా ఇతర ముఖ్యమైన ప్రారంభ సంకేతాలు కూడా ఉన్నాయి. చర్మంపై కొత్తగా ఏర్పడిన గడ్డ లేదా గాయం వారాల్లో కూడా నయం కాకపోవడం. పుట్టుమచ్చ, మచ్చలో నిరంతరంగా దురద, నొప్పి లేదా మంట (Burning) కలగడం. పుండు నుంచి తరచుగా గట్టి పొర ఏర్పడటం (Crusting) లేదా రక్తస్రావం కావడం. చర్మంపై ఒక మచ్చ పరిమాణం నిరంతరం పెరగడం లేదా చుట్టుపక్కల చర్మానికి వ్యాపించడం. చర్మంపై మెరుస్తూ లేదా మైనంలా ఉండే గడ్డలు. చర్మంపై ఎరుపు, గరుకుగా లేదా పొలుసులుగా ఉండే మచ్చలు వంటి ఉంటాయి. చాలా లేత చర్మం ఉన్నవారు, ఎక్కువ సమయం ఎండలో గడిపేవారు, లేదా కుటుంబ చరిత్ర ఉన్నవారు అధిక ప్రమాదంలో ఉంటారని నిపుణులు చెబుతున్నారు. వృద్ధులు, రోగనిరోధక శక్తి బలహీనంగా ఉన్నవారు, ఎక్కువ పుట్టుమచ్చలు ఉన్నవారు కూడా అధిక ప్రమాదానికి గురవుతారు. చర్మంపై అసాధారణ మార్పులు, త్వరగా మానని గాయాలు లేదా పుట్టుమచ్చలో ఆకస్మిక మార్పులను ఎప్పుడూ నిర్లక్ష్యం చేయవద్దని.. తక్షణమే వైద్యుడిని సంప్రదించాలని నిపుణులు సూచిస్తున్నారు.

గమనిక: ఈ కథనం ఇంటర్నెట్‌లో అందుబాటులో ఉన్న సమాచారం ఆధారంగా మాత్రమే ఇచ్చినది. RTV దీనిని ధృవీకరించడం లేదు. ఆరోగ్య సమస్యల నివారణకు సంబంధిత వైద్య నిపుణుడిని సంప్రదించడం ఉత్తమం.

ఇది కూడా చదవండి: జనపనార గింజల్లో ఎన్నో పోషకాలు.. పోషకాహార నిపుణుల సలహా మీరూ తెలుసుకోండి