Chest Phlegm: ఛాతీలో పేరుకుపోయిన కఫంకు చెక్ పెట్టే వంటింటి చిట్కాలు ఇవే

ఆయుర్వేదం ప్రకారం.. కఫం శరీరంలోని మూడు దోషాలలో ఒకటి. ఇది శ్లేష్మం, నీరు, కందెన లాంటి ద్రవాలతో రూపొంది శరీరానికి స్థిరత్వం, బలం, కందెనను అందిస్తుంది. కఫం గుణాలు చల్లగా, బరువుగా, నెమ్మదిగా, మృదువుగా, స్థిరంగా ఉంటాయి. ఇది ప్రధానంగా ఛాతీ, గొంతు, ముక్కు, నాలుక, తలలో ఉంటుంది. సమతుల్యంగా ఉన్నప్పుడు.. కఫం శరీరానికి రోగనిరోధక శక్తిని, చల్లగా, ప్రశాంతతను అందిస్తుంది. అయితే అది పెరిగినప్పుడు బరువు పెరగడం, మందకొడిగా ఉండడం, దగ్గు, శ్వాస సమస్యలు వంటి ఆరోగ్య సమస్యలకు దారితీస్తుంది. కఫాన్ని అదుపులో ఉంచుకోవడానికి సరైన ఆహారం, జీవనశైలి మార్పులు అవసరం. తరచుగా వచ్చే జలుబు, దగ్గు వల్ల ఛాతీలో కఫం పేరుకుపోవడం సర్వసాధారణం. ఇది శ్వాస తీసుకోవడంలో ఇబ్బందులు, గొంతు నొప్పి, కొన్నిసార్లు జ్వరం వంటి సమస్యలకు దారితీస్తుంది. ఈ సమస్యకు పరిష్కారంగా వంటింట్లో లభించే సహజసిద్ధమైన పదార్థాలతో సులభంగా ఉపశమనం పొందవచ్చు.

వంటింటి చిట్కాలు.. 

అల్లం టీ: అల్లంలో ఉండే యాంటీ-ఇన్‌ఫ్లమేటరీ, యాంటీ బాక్టీరియల్ గుణాలు కఫాన్ని పల్చగా మార్చి గొంతు నొప్పిని తగ్గిస్తాయి. వేడి వేడిగా అల్లం టీ తాగడం వల్ల మంచి ఉపశమనం లభిస్తుంది.

పసుపు పాలు: పసుపులో ఉండే కర్కుమిన్ అనే పదార్థం కఫాన్ని విచ్ఛిన్నం చేసి రోగనిరోధక శక్తిని పెంచుతుంది. రాత్రి పడుకునే ముందు పసుపు కలిపిన పాలు తాగడం ఎంతో ప్రయోజనకరం.

తేనె, మిరియాలు: తేనె గొంతు నొప్పిని తగ్గిస్తే.. మిరియాలు కఫాన్ని వదులు చేస్తాయి. ఈ రెండింటినీ కలిపి తీసుకోవడం వల్ల శ్వాస తీసుకోవడం సులభం అవుతుంది.

ఆవిరి పట్టడం: వేడి నీటి ఆవిరి పట్టడం వల్ల ఛాతీలో పేరుకుపోయిన కఫం త్వరగా కరిగి బయటకు వస్తుంది. నీటిలో కొన్ని పుదీనా చుక్కలు వేయడం వల్ల మరింత ప్రభావవంతంగా పనిచేస్తుంది.

ఇది కూడా చదవండి: ఆరోగ్యంగా ఉండాలంటే ఏ టిఫిన్ మంచిది.. తట్టే ఇడ్లీ గురించి మీకు తెలుసా?

తులసి ఆకులు: తులసిలో సహజమైన యాంటీ బయాటిక్ లక్షణాలు ఉన్నాయి. తులసి ఆకులను నమలడం లేదా తులసి టీ తాగడం వల్ల కఫం క్రమంగా బయటకు పోతుంది.

ఉప్పు నీటితో పుక్కిలించడం: గోరు వెచ్చని ఉప్పు నీటితో పుక్కిలించడం వల్ల గొంతు నొప్పి తగ్గి.. గొంతులో ఉండే కఫం సులభంగా బయటకు వస్తుంది.

వెల్లుల్లి: వెల్లుల్లిలో ఉండే యాంటీ మైక్రోబియల్ గుణాలు కఫాన్ని తగ్గిస్తాయి. వెల్లుల్లిని పాలలో మరిగించి తాగడం లేదా ఆహారంలో చేర్చుకోవడం వల్ల రోగనిరోధక శక్తి కూడా పెరుగుతుంది. ఈ సహజ చిట్కాలు సురక్షితమైనవి ప్రభావవంతమైనవి. అయినప్పటికీ సమస్య తీవ్రంగా ఉంటే.. వైద్య సలహా తీసుకోవడం తప్పనిసరి.

గమనిక:ఈ కథనం ఇంటర్నెట్‌లో అందుబాటులో ఉన్న సమాచారం ఆధారంగా మాత్రమే ఇచ్చినది. RTV దీనిని ధృవీకరించడం లేదు. ఆరోగ్య సమస్యల నివారణకు సంబంధిత వైద్య నిపుణుడిని సంప్రదించడం ఉత్తమం.

ఇది కూడా చదవండి:మీరు రోజూ తినే ఆహారంలో ఈ విషాలు ఉన్నాయని తెలుసా..?