Union Budget : 27 ఏళ్ల తర్వాత ఆదివారం బడ్జెట్.. నిర్మలమ్మ సరికొత్త రికార్డు!

భారత ఆర్థిక చరిత్రలో మరో అరుదైన ఘట్టం ఆవిష్కృతం కాబోతోంది. సుమారు 27 ఏళ్ల సుదీర్ఘ విరామం తర్వాత, కేంద్ర బడ్జెట్ ఆదివారం నాడు విడుదల కానుంది. 2026-27 ఆర్థిక సంవత్సరానికి సంబంధించిన వార్షిక బడ్జెట్‌ను కేంద్ర ఆర్థిక మంత్రి నిర్మలా సీతారామన్(fm nirmala sitharaman) ఫిబ్రవరి 1వ తేదీ, ఆదివారం ఉదయం 11 గంటలకు లోక్‌సభలో ప్రవేశపెట్టనున్నారు. భారత బడ్జెట్ చరిత్రలో ఇలా ఆదివారం నాడు బడ్జెట్ ప్రవేశపెట్టడం ఇది రెండోసారి మాత్రమే కావడం విశేషం.

గతంలో 1999వ సంవత్సరం, ఫిబ్రవరి 28న అప్పటి అటల్ బిహారీ వాజ్‌పేయి నేతృత్వంలోని ప్రభుత్వం ఆదివారం బడ్జెట్‌ను ప్రవేశపెట్టింది. నాటి ఆర్థిక మంత్రి యశ్వంత్ సిన్హా ఈ సంప్రదాయానికి శ్రీకారం చుట్టారు. అంతకుముందు వరకు బ్రిటీష్ కాలం నాటి పద్ధతిలో సాయంత్రం 5 గంటలకు బడ్జెట్ ప్రసంగం ఉండేది, అయితే 1999 బడ్జెట్‌తోనే ఆ సమయాన్ని ఉదయం 11 గంటలకు మారుస్తూ నిర్ణయం తీసుకున్నారు. అప్పటి నుండి అదే సమయం ప్రామాణికంగా కొనసాగుతోంది.

సాధారణంగా ఫిబ్రవరి చివరి వారంలో ఉండే బడ్జెట్‌ను 2017 నుండి మోదీ(narendra-modi) ప్రభుత్వం ఫిబ్రవరి 1వ తేదీకి మార్చింది. కొత్త ఆర్థిక సంవత్సరం ప్రారంభమయ్యే ఏప్రిల్ 1 నాటికి బడ్జెట్ ప్రతిపాదనలపై పూర్తిస్థాయి చర్చలు జరిపి, వాటిని అమలులోకి తీసుకురావడమే ఈ మార్పు వెనుక ఉన్న ప్రధాన ఉద్దేశ్యం. ఆదివారం సెలవు దినమైనప్పటికీ, రాజ్యాంగ విధి నిర్వహణలో భాగంగా పార్లమెంటు యథావిధిగా సమావేశమై బడ్జెట్ ప్రక్రియను పూర్తి చేస్తుంది.

ఇక ఆదివారం బడ్జెట్ రావడంపై స్టాక్ మార్కెట్ వర్గాల్లోనూ ఆసక్తి నెలకొంది. సాధారణంగా సెలవు ఉండే ఎన్ఎస్ఈ, బీఎస్ఈలు ఈసారి ప్రత్యేక ట్రేడింగ్ సెషన్లను నిర్వహించే అవకాశం ఉంది. బడ్జెట్ ప్రకటనల వల్ల మార్కెట్‌లో వచ్చే ఒడిదుడుకులను తక్షణమే అంచనా వేయడానికి ఈ సెషన్లు దోహదపడతాయి. అదే సమయంలో, ఆదివారం ప్రకటించడం వల్ల మదుపర్లు, ఆర్థిక విశ్లేషకులు పన్ను విధానాలు, కేటాయింపులను లోతుగా విశ్లేషించడానికి కొంత సమయం లభిస్తుందని నిపుణులు భావిస్తున్నారు.

 కేంద్ర ఆర్థిక మంత్రి నిర్మలా సీతారామన్(nirmala-sitharaman) మరో అరుదైన ఘనతను సొంతం చేసుకున్నారు. ఆదివారం పార్లమెంటులో ఆమె వరుసగా 9వ సారి బడ్జెట్‌ను ప్రవేశపెట్టబోతున్నారు. దేశ చరిత్రలో వరుసగా ఇన్నిసార్లు బడ్జెట్ ప్రవేశపెట్టిన ఏకైక ఆర్థిక మంత్రిగా ఆమె రికార్డులకెక్కారు.  ఈ ఘనత సాధించిన దేశపు తొలి మహిళా ఆర్థిక మంత్రిగా నిర్మలా సీతారామన్ నిలిచారు.  

Also Read :  బడ్జెట్ ప్రసంగాల్లో రికార్డులివే.. చరిత్రలో ఎప్పటికీ నిర్మలమ్మ, మన్మోహన్ సింగ్‌ పేర్లు

వరుసగా 9 సార్లు బడ్జెట్

అంతేకాకుండా ఒకే ప్రధాన మంత్రి (నరేంద్ర మోదీ) హయాంలో వరుసగా 9 సార్లు బడ్జెట్(Union Budget 2026-27) ప్రవేశపెట్టిన తొలి ఆర్థిక మంత్రిగా నిర్మలా సీతారామన్ సరికొత్త చరిత్ర సృష్టించారు. గతంలో మొరార్జీ దేశాయ్ 10 సార్లు, పి. చిదంబరం 9 సార్లు బడ్జెట్ ప్రవేశపెట్టినప్పటికీ, వారు వేర్వేరు ప్రధానుల దగ్గర లేదా వేర్వేరు విడతలుగా (మధ్యలో గ్యాప్ ఇచ్చి) పనిచేశారు. 

2019 నుండి 2026 వరకు అంటే గత 7 బడ్జెట్లు, 1 మధ్యంతర బడ్జెట్, ఇప్పుడు రాబోయే బడ్జెట్‌తో కలిపి మొత్తం 9 సార్లు ఆమె వరుసగా ప్రవేశపెట్టినట్లవుతుంది. గతంలో ఏ ఆర్థిక మంత్రి కూడా ఒకే ప్రధాని హయాంలో ఇంత సుదీర్ఘ కాలం నిరంతరాయంగా బడ్జెట్‌ను ప్రవేశపెట్టలేదు. 

Also Read :  బడ్జెట్ తయారీ ముందు హల్వా వేడుక.. అసలు కారణం ఇదే!