BREAKING: సి.పి.రాధాకృష్ణన్‌ రాజీనామా.. ఆయన బాధ్యతలు మరొకరికి

మహారాష్ట్ర గవర్నర్‌గా సీ.పీ. రాధాకృష్ణన్‌ తన పదవికి రాజీనామా చేశారు. భారతదేశ నూతన ఉపరాష్ట్రపతిగా ఎన్నికైన నేపథ్యంలో ఆయన ఈ నిర్ణయం తీసుకున్నారు. రాధాకృష్ణన్‌ రాజీనామాను రాష్ట్రపతి ద్రౌపదీ ముర్ము ఆమోదించారు. ఆయన ఉపరాష్ట్రపతిగా త్వరలో ప్రమాణస్వీకారం చేయనున్నారు. ఈ నేపథ్యంలో మహారాష్ట్ర గవర్నర్‌గా గుజరాత్ గవర్నర్ ఆచార్య దేవవ్రత్‌కు అదనపు బాధ్యతలు అప్పగించారు.

జగదీప్ ధన్‌ఖర్ ఇటీవల ఉపరాష్ట్రపతి పదవికి రాజీనామా చేయడంతో ఈ పదవికి ఉపఎన్నిక అనివార్యమైంది. భారత రాజ్యాంగం ప్రకారం, ఉపరాష్ట్రపతి పదవికి మధ్యంతర ఎన్నికలు జరిగినా, కొత్తగా ఎన్నికైన వ్యక్తి ఐదేళ్ల పూర్తి పదవీ కాలం కొనసాగుతారు. ఈ ఉపఎన్నికలో ఎన్డీయే కూటమి తరపున సీ.పీ. రాధాకృష్ణన్‌ పోటీ చేసి, విపక్ష ఇండియా కూటమి అభ్యర్థి జస్టిస్ బి. సుదర్శన్ రెడ్డిపై 152 ఓట్ల మెజార్టీతో విజయం సాధించారు. మొత్తం 767 ఓట్లలో రాధాకృష్ణన్‌కు 452 ఓట్లు రాగా, సుదర్శన్ రెడ్డికి 300 ఓట్లు వచ్చాయి.

VP-elect CP Radhakrishnan demits office as Maha Guv, Acharya Devvrat gets additional charge https://t.co/eljOTsyoR0

— India News (@dailyindia) September 11, 2025

మహారాష్ట్ర గవర్నర్‌గా బాధ్యతలు చేపట్టి కేవలం 13 నెలలు మాత్రమే అయినా, రాధాకృష్ణన్ తన పదవిలో అత్యంత క్రియాశీలకంగా వ్యవహరించారు. ప్రజా జీవితంలో గవర్నర్‌గా తన కాలం అత్యంత సంతోషకరమైనదిగా ఆయన అభివర్ణించారు. పరిపాలన, రాజకీయాలకు సంబంధించిన అనేక విషయాలను మహారాష్ట్ర తనకు నేర్పించిందని, ఇది తన జీవితంలో ఒక గొప్ప అనుభూతి అని అన్నారు.

తన రాజీనామా నేపథ్యంలో బుధవారం మహారాష్ట్ర రాజ్ భవన్‌లో ఆయనకు సత్కారం జరిగింది. ఈ కార్యక్రమంలో మహారాష్ట్ర ముఖ్యమంత్రి దేవేంద్ర ఫడ్నవీస్ సహా పలువురు ప్రముఖులు పాల్గొన్నారు. ఈ సందర్భంగా మాట్లాడిన రాధాకృష్ణన్, తాను రాజీపడని జాతీయవాదినని పేర్కొన్నారు. తమిళనాడు నుంచి ఉపరాష్ట్రపతి పదవిని అలంకరించిన మూడో వ్యక్తిగా రాధాకృష్ణన్ నిలిచారు. గతంలో ఆయన రెండుసార్లు కోయంబత్తూరు లోక్‌సభ నియోజకవర్గం నుంచి ఎంపీగా కూడా ఎన్నికయ్యారు. కొత్తగా ఎన్నికైన ఉపరాష్ట్రపతి రాధాకృష్ణన్‌కు రాష్ట్రపతి ద్రౌపదీ ముర్ము, ప్రధానమంత్రి నరేంద్ర మోదీ, ఇతర ప్రముఖులు అభినందనలు తెలిపారు.