Vinayaka Immersion: 3,5,7,9,11 రోజుల్లో..  వినాయక నిమజ్జనం ఎప్పుడు చేస్తే మంచిది?

Vinayaka Immersion: వినాయక చవితి అనేది హిందువులు అత్యంత భక్తిశ్రద్ధలతో జరుపుకునే ఒక ముఖ్యమైన పండుగ. దీనిని వినాయక చతుర్థి, గణేష్ చతుర్థి లేదా వినాయక చవితి అని కూడా పిలుస్తారు. ఈ పండుగను గణేశుని జన్మదినంగా హిందువులు భావిస్తారు. ఇది భాద్రపద మాసంలోని శుక్ల పక్ష చవితి రోజున జరుపుకుంటారు. సాధారణంగా ఆగస్టు చివరిలో లేదా సెప్టెంబర్ నెలలో వస్తుంది.  భక్తులు తమ ఇళ్లలో లేదా బహిరంగ ప్రదేశాలలో పందిళ్లను వేసి, మట్టితో చేసిన వినాయకుడి ప్రతిమలను ప్రతిష్ఠిస్తారు. గణపతికి ఇష్టమైన 21 రకాల పత్రాలతో (ఆకులతో) పూజ చేస్తారు. ఉండ్రాళ్లు, కుడుములు, మోదకాలు వంటి ప్రత్యేక వంటకాలను నైవేద్యంగా సమర్పిస్తారు.

11వ రోజున నిమజ్జనం

వినాయక నిమజ్జనం సాధారణంగా అనంత చతుర్దశి రోజున జరుగుతుంది. అంటే, వినాయక చవితి రోజున ప్రతిష్ఠించిన విగ్రహాన్ని 10 రోజుల తర్వాత, అనగా 11వ రోజున నిమజ్జనం చేయాలి. ఈ పది రోజుల పాటు వినాయకుడిని పూజించి, చివరి రోజున ఘనంగా నిమజ్జనం చేస్తారు. అయితే, కొందరు తమ వీలును బట్టి, ఒక రోజు, మూడు రోజులు, ఐదు రోజులు, ఏడు రోజులు లేదా తొమ్మిది రోజులు పూజించి కూడా నిమజ్జనం చేస్తారు. కానీ, సంప్రదాయబద్ధంగా మాత్రం అనంత చతుర్దశి రోజున చేయడం అత్యంత శుభప్రదంగా భావిస్తారు.

నిమజ్జనానికి శుభ ముహూర్తం అంటూ ప్రత్యేకంగా ఏమీ ఉండదు. హిందూ సంప్రదాయం ప్రకారం, ఉదయం సూర్యోదయం తర్వాత నుండి సూర్యాస్తమయం వరకు లేదా సంధ్యా సమయంలో నిమజ్జనం చేయవచ్చు. చాలామంది సాయంత్రం వేళల్లో ఊరేగింపుతో నిమజ్జనం చేస్తుంటారు. ఇది భక్తిని, సంప్రదాయాన్ని ప్రతిబింబిస్తుంది. నిమజ్జనం చేసే ముందు, వినాయకుడికి చివరిసారిగా పూజ చేసి, ఇష్టమైన ఉండ్రాళ్లు, మోదకాలు, లడ్డూలు వంటి వాటిని నైవేద్యంగా సమర్పించాలి. పూజ పూర్తయ్యాక, వినాయకుడికి హారతి ఇచ్చి, కుటుంబ సభ్యులందరూ కలిసి ఆశీస్సులు తీసుకోవాలి.

"యాత్రా సుస్థిర" అంటూ శ్లోకం పఠించి, పూజలో ఏవైనా తప్పులు జరిగి ఉంటే క్షమించమని వేడుకోవాలి.  నిమజ్జనం చేసే నీటి వనరు వద్దకు చేరుకున్న తర్వాత, విగ్రహానికి చివరిసారిగా హారతి ఇచ్చి, పూలు చల్లుతారు. "గణపతి బప్పా మోరియా, అగలే బరస్ తు జల్దీ ఆ" (గణపతి తండ్రీ, వచ్చే ఏడాది త్వరగా రా) అంటూ నినాదాలు చేస్తూ విగ్రహాన్ని నెమ్మదిగా నీటిలోకి వదులుతారు.