Israel-gaza: గాజాలో మారణహోమం.. మరో 27 మంది మృతి

గాజాపై ఇజ్రాయెల్‌ భీకర దాడులు కొనసాగిస్తూనే ఉంది. గత కొన్నిరోజులుగా జరుగుతున్న దాడుల వల్ల గాజాలో వందలాది మంది ప్రాణాలు కోల్పోతున్నారు. తాజాగా మానవతా సహాయ కేంద్రం వద్ద IDF దళాలు మరోసారి దాడులు నిర్వహించాయి. ఈ దాడుల్లో 27 మంది ప్రాణాలు కోల్పోయారు. డజన్ల కొద్ది ప్రజలు గాయాలపాలయ్యారు.  ఇక వివరాల్లోకి వెళ్తే.. ప్రస్తుతం గాజా దక్షిణ ప్రాంతంలోని సహాయ కేంద్రం దగ్గర మానవతా సాయం పంపిణీ కార్యక్రమం జరుగుతోంది. 

Also Read: ఇకనుంచి ఒకటవ తరగతి నుంచే బేసిక్‌ మిలిటరీ శిక్షణ !

ఇదే సమయంలో ఇజ్రాయెల్ కాల్పులకు దిగింది. ఈ దాడుల్లో 27 మంది అమాయకులు మృత్యువాతపడ్డారు. గత 3 రోజుల నుంచి సహాయ కేంద్రాల వద్ద ఈ దాడులు జరుగుతున్నాయి. ప్రస్తుతం వేలాది మంది పాలస్తీనియన్లు అక్కడ మానవతా సాయం తీసుకోవడం కోసం ఎదురుచూస్తున్నారు. ఈ సమయంలోనే ఇజ్రాయెల్ దాడులు జరపడం కలకలం రేపుతోంది. ఆకలితో అలమటిస్తున్న గాజా పౌరులపై ఇజ్రాయెల్ దాడులు చేయడాన్ని హమాస్‌ తీవ్రంగా ఖండించింది. 

మరోవైపు రఫాలోని తమ ఆస్పత్రిలో ఇప్పటిదాకా 180 మందికి పైగా ప్రాణాలు కోల్పోయినట్లు అంతర్జాతీయ రెడ్‌క్రాస్ కమిటీ ప్రతినిధి వెల్లడించారు. 19 మంది అక్కడికి వెళ్లే లోపు మృతి చెందినట్లు తెలిపారు. మరికొందరికి తక్షణమే వైద్యం అవసరం ఉందని పేర్కొన్నారు. ఇదిలాఉండగా 2023 అక్టోబర్‌లో ఇజ్రాయెల్‌పై హమాస్‌ మెరుపు దాడులు చేసిన సంగతి తెలిసిందే. అప్పటి నుంచి హమాస్ అంతమే లక్ష్యాంగా ఇజ్రాయెల్‌ గాజాపై విరుచుకుపడుతోంది. 

Also Read: యుద్ధాల్లో దుమ్ము రేపుతోన్న డ్రోన్లు.. వేల కి.మీ దాటి శత్రువులపై దాడులు

ఇజ్రాయెల్-హమాస్ మధ్య జరుగుతున్న పోరులో ఇప్పటిదాకా గాజాలో 54 వేల మందికి పైగా మృతి చెందినట్లు అక్కడి స్థానిక యంత్రాంగం తెలిపింది. ఇటీవలే అక్కడ మానవతా సాయాన్ని పరిమితంగా అందించేందుకు ఇజ్రాయెల్ పర్మిషన్ ఇచ్చింది. అయితే ఈ సమయంలో కూడా అక్కడ దాడులు జరగడం కలకలం రేపుతోంది. 

telugu-news | rtv-news | israel | gaza