Warren Buffett: కార్పొరేట్ చరిత్రలో పెను సంచలనం. సీఈఓగా వైదొలిగిన వారెన్ బఫెట్

Warren Buffett : ప్రపంచ ఆధునిక కార్పొరేట్‌(corporates) నాయకత్వ చరిత్రలో ఈ రోజు పెను సంచలనం చోటు చేసుకుంది. దిగ్గజ ఇన్వెస్టర్ వారెన్ బఫెట్ బుధవారం రోజు బెర్క్‌షైర్ హ్యాథవే కంపెనీ సీఈఓ పదవి నుంచి రిటైర్ అవుతున్నారు. ఈ ఏడాది 95వ పుట్టిన రోజు జరుపుకొన్న బఫెట్, ఆరు దశాబ్ధాల పాటు అంటే 60 ఏళ్ల పాటు బెర్క్‌షైర్ హ్యాథవే సీఈఓగా సేవలు అందించడం విశేషం. ప్రపంచ కార్పొరేట్ చరిత్రలో ఇదొక మైలురాయి. అంతేకాదు అత్యంత అసాధారణ నాయకత్వ పటిమను కనబర్చిన సీఈఓల్లో ఒకరిగా ఆయన ప్రసిద్ధి చెందారు. బఫెట్ తొలిసారి1965లో అమెరికాలోని రోడ్ ఐలాండ్ రాష్ట్రంలో ఆర్థిక సంక్షోభంలో చిక్కుకొని విలవిలలాడుతున్న న్యూ ఇంగ్లండ్ టెక్స్‌టైల్ మ్యానుఫ్యాక్చరర్ కంపెనీని కొన్నారు. తొలుత దాని టెక్స్‌టైల్ వ్యాపారాన్ని గట్టెక్కించిన ఆయన ఆ తదుపరి దశల్లో క్రమంగా తన పెట్టుబడులను బీమా, రైలుమార్గాలు, విద్యుత్ సరఫరా, నీటి సరఫరా, కన్జూమర్ బ్రాండ్స్, షేర్లలోకి మళ్లించడం మొదలు పెట్టారు. దీర్ఘకాలిక వ్యూహంతో ఆయన దిగ్గజ అమెరికన్ కంపెనీల్లో పెట్టిన క్రమశిక్షణాయుత పెట్టుబడులు అత్యద్భుత లాభాలను ఆర్జించాయి. దీంతో ఆయన సారథ్యంలోని బెర్క్‌షైర్ హ్యాథవే మార్కెట్ విలువ ఏకంగా రూ.89 లక్షల కోట్లకు చేరింది. ప్రపంచంలోనే గొప్ప ఇన్వెస్టర్‌గా బఫెట్‌కు ఖ్యాతి మిగిల్చింది.ఆయనతో పాటు వాటాదారులకు భారీ లాభాలను తెచ్చిపెట్టాయి. 

Also Read :  చైనాకు భారీ షాక్ ఇచ్చిన భారత్..- రాత్రికి రాత్రే ఏం చేసిందంటే?

కంపెనీలన్నీ అదుర్స్‌..

వారెన్ బఫెట్ దీర్ఘకాలిక పెట్టుబడులు పెట్టిన కంపెనీ(corporate-company)లన్నీ ప్రపంచంలోనే అగ్రస్థాయికి చేరుకున్నాయి. దీంతో ఆయనపై లాభాల వర్షం కురిసింది. యాపిల్‌లో 21 శాతం, కోక కోలాలో 9.3 శాతం, అమెరికన్ ఎక్స్‌ప్రెస్‌లో 17.8 శాతం, బ్యాంక్ ఆఫ్ అమెరికాలో 9.8 శాతం, చెవ్రాన్‌లో 5.9 శాతం చొప్పున బఫెట్‌కు వాటాలు ఉండటం విశేషం. బెర్క్‌షైర్ హ్యాథవే‌ పూర్తిస్థాయి అనుబంధ కంపెనీల జాబితాలో బీఎన్‌ఎస్‌ఎఫ్ రైల్వే, జీకో, బెర్క్‌షైర్ హ్యాథవే ఎనర్జీ తదితరాలున్నాయి. చాలా తయారీరంగ, రిటైల్ వ్యాపారాల్లోనూ బఫెట్ పెట్టుబడులు పెట్టారు. వారెన్ బఫెట్ ఏటా నిర్వహించే సమావేశాలు, ప్రతి సంవత్సరం ఆయన విడుదల చేసే వాటాదారుల లేఖలను యావత్ ప్రపంచం నిశితంగా పరిశీలిస్తుంది.  అయితే ఇక మీదట  ఆ అవకాశం ఉండదు. ఎందుకంటే బెర్క్‌షైర్ హ్యాథవే సీఈఓ పదవి నుంచి బఫెట్ రిటైర్(retirement) అవుతుండటమే.

నూతన సీఈఓగా గ్రెగ్ అబెల్

ఇక బఫెట్‌ స్థానంలో బెర్క్‌షైర్ హ్యాథవే నూతన సీఈఓగా గ్రెగ్ అబెల్ 2026 జనవరి 1న బాధ్యతలు చేపట్టనున్నారు. కెనడా వ్యాపారవేత్త అయిన  గ్రెగ్ అబెల్ 2000 సంవత్సరంలో బెర్క్‌షైర్ హ్యాథవే‌‌కు చెందిన జియో థర్మల్ ఎలక్ట్రిసిటీ కంపెనీ ‘మిడ్ అమెరికన్‌’లో సీఏగా చేరారు. అంచెలంచెలుగా ఎదిగి 2008లో ఆ కంపెనీకి సీఈఓ అయ్యారు. ఆయన చేస్తున్న కృషికి గాను 2018 జనవరిలో బెర్క్‌షైర్ హ్యాథవే‌లోని ఇంధన విభాగానికి ఛైర్మన్, సీఈఓగా ప్రమోషన్ లభించింది. ఇప్పటివరకు బెర్క్‌షైర్ హ్యాథవే‌కు చెందిన బీమాయేతర విభాగాలకు వైస్ ఛైర్మన్‌గా వ్యవహరిస్తున్నారు. గ్రెగ్ అబెల్ సారథ్యంలో బెర్క్‌షైర్ హ్యాథవేకు చెందిన ఇంధన, మౌలిక వసతుల కల్పన విభాగాల వ్యాపారాలు వేగంగా పురోగతిని సాధించాయి. ఆయన కృషిని వారెన్ బఫెట్ గుర్తించారు. అందుకే తన తర్వాత బెర్క్‌షైర్ హ్యాథవే సీఈఓగా గ్రెగ్ అబెల్‌ను నియమిస్తానని 2025 మే నెలలోనే ప్రకటించడం గమనార్హం.

Also Read :  Ind Vs Pak War: 2026లో భారత్-పాక్ మధ్య యుద్ధం.. US షాకింగ్ రిపోర్ట్!

గ్రెగ్ అబెల్‌ ఎదుట ఎన్నో సవాళ్లు

ప్రస్తుతం బెర్క్‌షైర్ హ్యాథవే సీఈఓగా పగ్గాలు చేపట్టనున్న గ్రెగ్ అబెల్ ఎదుట పలు సవాళ్లు ఉన్నాయి. బెర్క్‌షైర్ హ్యాథవే‌‌ వద్ద దాదాపు రూ.34 లక్షల కోట్లు విలువైన భారీ నగదు నిల్వలు ఉన్నాయి. ఈ నగదు నిల్వలను బఫెట్ తరహాలో వ్యూహాత్మక పెట్టుబడుల్లోకి మరల్చడంలో గ్రెగ్ అబెల్ సక్సెస్ అవుతారో లేదో వేచి చూడాల్సి ఉంది. ఆర్థిక సంక్షోభాలు ఉన్న టైంలో పెద్దసంఖ్యలో షేర్లు, కంపెనీలను కొనేందుకు ఇంత భారీ నగదు నిల్వలను వారెన్ బఫెట్ నిర్వహిస్తారు. బఫెట్ బాటలో పయనించేందుకు, తనపై ఆయన ఉంచిన ప్రగాఢ విశ్వాసాన్ని నిలుపుకునేందుకు గ్రెగ్ అబెల్ ప్రయత్నించే అవకాశాలు స్పష్టంగా కనపడుతున్నాయి.