Telangana Ration: ఉచిత బియ్యంతో పాటు ప్రత్యేక సంచుల్లో సంక్షేమ పథకాలు

రాష్ట్రంలో సెప్టెంబర్ నెల నుంచి రేషన్ పంపిణీ తిరిగి ప్రారంభం కానున్న నేపథ్యంలో.. ప్రభుత్వం లబ్ధిదారులకు ఉచిత సంచులను కూడా అందజేయనుంది. ఈ సంచులలో సన్న బియ్యంతో పాటు రాష్ట్ర ప్రభుత్వం అమలు చేస్తున్న సంక్షేమ పథకాల వివరాలు ముద్రించి ఉంటాయని అధికార వర్గాలు తెలిపాయి. గతంలో మూడు నెలల రేషన్ ఒకేసారి పంపిణీ చేయడంతో.. ఆగస్టు వరకు సరఫరా నిలిచిపోయింది. సివిల్ సప్లైస్ అధికారులు తెలిపిన వివరాల ప్రకారం.. ఈ ప్రత్యేక సంచులకు బయట మార్కెట్‌లో దాదాపు రూ. 50 వరకు ఖర్చు అవుతుందని అంచనా వేశారు.

సరుకులు తెచ్చుకోవడానికి ఉపయోగపడే విధంగా..

ఈ సంచులపై ముఖ్యమంత్రి రేవంత్ రెడ్డి, ఉప ముఖ్యమంత్రి భట్టి విక్రమార్క, పౌరసరఫరాల శాఖ మంత్రి ఉత్తమ్ కుమార్ రెడ్డి ఫోటోలతోపాటు ఇందిరమ్మ అభయహస్తం పేరుతో రాష్ట్ర ప్రభుత్వం అమలు చేస్తున్న ఆరు గ్యారెంటీల వివరాలు ముద్రించి ఉంటాయని తెలిపారు. ఈ సంచులు నాణ్యతతో కూడుకొని ఉంటాయని, రేషన్ తీసుకున్న తర్వాత ఇతర వస్తువులు, కూరగాయలు, కిరాణా సరుకులు తెచ్చుకోవడానికి ఉపయోగపడే విధంగా వీటిని రూపొందించారు.

ఇది కూడా చదవండి: తెలంగాణ రైతులకు శుభవార్త.. కొత్త పాస్‌బుక్ వచ్చిన వారందరికీ ఈ నెలలో రైతు బీమా

ఇప్పటికే కొన్ని జిల్లాల్లో రేషన్ దుకాణాలకు ఈ సంచులు చేరుకున్నాయని అధికారులు పేర్కొన్నారు. సెప్టెంబర్ నెలలో లబ్ధిదారులు ఈ ప్రత్యేక సంచులలో సన్న బియ్యం, సంక్షేమ పథకాల వివరాలను అందుకోనున్నారు. ఈ కొత్త విధానం ద్వారా ప్రజలకు ప్రభుత్వ పథకాలపై మరింత అవగాహన కలుగుతుందని ప్రభుత్వం ఆశిస్తోంది. రేషన్ పంపిణీలో ఈ మార్పు ఒక కొత్త అధ్యాయానికి శ్రీకారం చుట్టింది. ప్రభుత్వం చేపట్టిన ఈ కార్యక్రమం ద్వారా లబ్ధిదారులకు నాణ్యమైన బియ్యంతోపాటు సంక్షేమ పథకాలపై సమగ్ర సమాచారం ఒకే చోట లభిస్తుందని అధికారులు చెబుతున్నారు. ఇది పారదర్శకతను పెంచడంతోపాటు ప్రజలకు ప్రభుత్వ పాలన పట్ల నమ్మకాన్ని కలిగించే అవకాశం ఉందని విశ్లేషకులు అభిప్రాయపడుతున్నారు.

ఇది కూడా చదవండి: కొత్త రేషన్‌కార్డుదారులకు అదిరిపోయే శుభవార్త.. ఆ స్కీమ్స్ కూడా.. రేవంత్ సర్కార్ కీలక నిర్ణయం!