Bathukamma : ఒక్కేసి పువ్వేసి చందమామ..పువ్వుపువ్వుకో సుగుణం...రంగురంగులో ఔషధం

Bathukamma : తెలంగాణ ఆత్మీయపండుగ, అంతరాత్మను ఆవిష్కరించే పండుగ బతుకమ్మ. రంగురంగు పువ్వులను దేవతలుగా కొలిచే పండుగ బతుకమ్మ. ప్రపంచంలో ఎక్కడ లేని విధంగా పూలను పూజించే ఏకైక పండుగ బతుకమ్మ. ఎంగిలిపూల బతుకమ్మతోఈ రోజు ప్రారంభమయ్యే బతుకమ్మ నవరాత్రులు సద్దుల బతుకమ్మతో ముగుస్తాయి. ఈ తొమ్మిది రోజులూ ప్రకృతిలో లభించే ప్రతి పువ్వునూ ఏరికోరి తెచ్చి, బతుకమ్మలను పేరుస్తారు. రంగురంగుల పూలతో అలంకరించిన బతుకమ్మలను ఇండ్ల ముందు ఉంచి పాటలు పాడుతూ ఆటలు ఆడుతూ ఆడుతారు. పాడుతారు. అనంతరం సమీపంలోని నదులు, బావుల్లో నిమజ్జనం చేస్తారు. ఇలా చేయడం వల్ల ఆ పుష్పాలలో ఉండే ఔషధ గుణాలతో  ఆ నీరు శుభ్రపడుతుందని విశ్వసిస్తారు.

బతుకమ్మ కోసం  ఉపయోగించే ప్రతి  పూవులోనూ అనేక ఆరోగ్య అంశాలు ఇమిడి ఉన్నాయి. గుమ్మడి, తంగేడు, గునుగు, బంతి, పట్నం బంతి, రుద్రాక్షతోపాటు వివిధ రకాల పువ్వుల్లో ఆరోగ్యానికి మేలుచేసే ఔషధ గుణాలు ఉన్నాయి. పూల నుంచి వచ్చే సువాసనలు, వాటి స్పర్శ ఆరోగ్యాన్ని పెంచుతాయని నిపుణులు అంటున్నారు. బతుకమ్మలోని ఒక్కో పువ్వు.. ఒక్కో ఔషధ గని.. ఆ పూలతో ఎన్ని ఆరోగ్యకరమైన ప్రయోజనాలున్నాయి. గుమ్మడి, తంగేడు, గునుగు, బంతి, పట్నం బంతి, రుద్రాక్ష ఇలా పువ్వు ఏదైనా పువ్వుపువ్వుకో సుగణం..రంగురంగుల్లో ఔషధ గుణం దాగి ఉంది.
 
 వర్షాకాలంలో కురిసే వర్షాల మూలంగా చెరువులు, కుంటల్లోకి కొత్త నీరు చేరుతుంది. ఈ నీటిలో అనేక రకాల సూక్ష్మక్రిములు వృద్ధి చెందుతాయి.  ఇవన్నీ వ్యాధులను వ్యాపింపజేస్తాయి. ప్రస్తుతం నీటిని వడబోసే అనేక అధునాతన యంత్రాలు అందుబాటులోకి వచ్చాయి. కానీ, పూర్వకాలంలో ఇలాంటి యంత్రాలు ఉండేవి కాదు. ఆ సమయంలో బతుకమ్మలను చెరువులు, కుంటల్లో నిమజ్జనం చేయడం ద్వారా.. ఆయా పువ్వుల్లోని యాంటీ బ్యాక్టీరియల్‌ గుణాలు ఉండటం మూలంగా అవి  సహజసిద్ధ క్రిమిసంహారకాలుగా పనిచేస్తాయి. ఆ పువ్వులు నీటిలోని విష క్రిములను నిర్మూలిస్తాయి. అలా కొత్తనీటితోపాటు వచ్చే కొత్త రోగాల నుంచి కాపాడుకునేందుకు ఈ పూలపండుగ ఎంతో దోహడపడుతుంది.  అ పూలలోని ఔషధ గుణాలు ఏంటో తెలుసుకుందాం.

గుమ్మడి పువ్వు

బతుకమ్మలో అతి ముఖ్యమైన పువ్వు గుమ్మడి. బతుకమ్మను పేర్చడానికి గుమ్మడి ఆకులతో మొదలు పెట్టి  గుమ్మడి పువ్వులోని గౌరమ్మను ప్రతిష్ఠించడంతో పూర్తవుతుంది. పండుగ మొదలవ్వడమే గుమ్మడి పాదులు మొగ్గలు వేయడంతో  ప్రారంభమవుతోంది. ఈ సమయంలోనే గుమ్మడి తీగ కూడా మొగ్గలు తొడుగుతుంది. ఈ పూలల్లో సహజసిద్ధ ‘పసుపు గౌరమ్మ’ కొలువై ఉంటుంది. గుమ్మడి పువ్వు శాస్త్రీయనామం "కుకుంబిటాపిపో’దీనిలో విటమిన్‌-ఎ, సి ఎక్కువగా ఉంటుంది.  ఈ విటమిన్‌ వయసు మీద పడ్డాక వచ్చే కాళ్ల నొప్పుల్ని నివారిస్తుంది. ప్రొస్టేట్‌ గ్రంథికి హాని కలగకుండా కాపాడుతుంది. గుమ్మడి కాయలు వివిధ రకాల వంటల్లోనూ ఉపయోగిస్తారు.

తంగేడు
బతుకమ్మలో గుమ్మడి తర్వాత ఎక్కువ ప్రాధాన్యం కలిగిన పువ్వు తంగేడు. ఇది తెలంగాణ రాష్ట్ర పుష్పం. దీని శాస్త్రీయనామం ‘కేసియా అరికులేటా’. తంగేడును ఆయుర్వేదంలో విరివిగా వాడుతారు. ఈ పూల కషాయం తాగితే మధుమేహం అదుపులో ఉంటుందని చెబుతారు తంగేడు పూల పొడిని బెల్లంతో కలిపి తీసుకుంటే.. అతిమూత్ర వ్యాధి, నరాల బలహీనత దూరం అవుతాయట. తంగేడుపూల టీ తాగితే.. నెలసరి సమస్యలు తగ్గుతాయి. కీళ్ల నొప్పులు తగ్గించడంలో, శరీరానికి చల్లదనాన్ని ఇవ్వడంలో తంగేడు సాయపడుతుంది. తంగేడు ఆకులు, పూలను చెరువులు, కుంటల్లో వేయడం వల్ల.. ఆ నీటిలోని బ్యాక్టీరియా చనిపోతుంది.

గునుగు పూలు
బతుకమ్మను పేర్చడంలో ఎక్కువగా వాడే పూలు గునుగు పూలు. ఇవి గడ్డిజాతికి చెందిన గునుగుపూల శాస్త్రీయ నామ ‘సెలోషియా’. ఈ మొక్కలో అనేక ఔషధ గుణాలు ఉన్నాయి. రక్తపోటును తగ్గించడంలో గునుగు పువ్వు ఎంతో దోహదపడుతుంది. నోటిలో పుండ్లు, ముక్కులో రక్త స్రావాన్ని తగ్గించడానికి దీన్ని వాడుతారు. గునుగు పూలు చర్మంపై గాయాలు, పొక్కులను తగ్గిస్తాయి. దగ్గు, టీబీ, డయేరియాలకు చక్కని ఔషధం. గునుగు గింజలు సహజసిద్ధ రక్తస్రావ నివారిణిగా పనిచేస్తాయి. నేత్ర సంబంధ మందుల తయారీలో వాడుతారు. వీటిని తింటే.. మూత్ర సంబంధ సమస్యలూ తగ్గుతాయి.

పట్నం బంతి
బతుకమ్మలో వాడే మరో ప్రత్యేకమైన పువ్వు.. పట్నం బంతి. దీని శాస్త్రీయ నామం సెలెండ్యులా. ఇందులోని సుగుణాలు.. కండరాలు బిగదీసుకుపోకుండా నివారిస్తాయి. గొంతు నొప్పిని తగ్గించడంలోనూ ఎంతగానో పనిచేస్తాయి.

బంతి
బంతి పువ్వు ‘ఆస్టరేసి’ కుటుంబానికి చెందింది.   దీని శాస్త్రీయ నామం క్రిసాంథిమమ్‌ బయాన్కో . ఇది శరీరంలోని వేడిని తగ్గిస్తుంది. కిడ్నీలో రాళ్లను కరిగించడంలో, చర్మంపై దద్దుర్లను తగ్గించడంలో సాయపడుతుంది. బంతి ఆకులను మెత్తగా చేసి, గాయాలు, పుండ్లపై రాస్తే.. త్వరగా నయమవుతాయి. పంటి నొప్పి, చిగుళ్ల వాపు, చిగుళ్ల నుంచి రక్తం కారడం లాంటి సమస్యలను తగ్గిస్తుంది. బంతిపూల రెక్కలను మిరియాలతో కలిపి తీసుకుంటే.. మూత్రంలో రక్తం, చీము వంటి సమస్యలను నివారిస్తుంది.

పట్టుకుచ్చు (సీత జడ) పూలు
బతుకమ్మకు చక్కటి అందాన్ని ఇచ్చేవి పట్టుకుచ్చు (సీత జడ) పూలు. దీని శాస్త్రీయ నామం ‘సిలోసియా అరెగేటియా’. ఇది అమరాంథస్‌ కుటుంబానికి చెందిన మొక్క. పట్టుకుచ్చు పూలలో జలుబు, ఆస్తమాను తగ్గించే ఔషధ గుణాలు ఉంటాయి. వీటి ఆకులు గాయాలు, నోటి పొక్కులను నివారించడంలో సాయపడుతాయి.

తామర పువ్వు
ఆయుర్వేద మందులు, సుగంధ ద్రవ్యాల తయారీలో తామర పువ్వులు, నూనెను వాడుతారు. తామర తొడిమల నుంచి స్రవించే జిగురును డయోరియా నివారణలో, కొమ్మను అజీర్తి నివారణలో వినియోగిస్తారు. మలబద్ధకాన్ని తగ్గించడంలో తామర తైలం దివ్య ఔషధం. చర్మ సంబంధ వ్యాధులనూ నివారిస్తుంది.