IND vs PAK : పాకిస్థాన్‌కు బిగ్ షాక్.. సూపర్ ఫోర్ మ్యాచ్‌కు కూడా అతనే

ఆసియా కప్ 2025లో భారత్, పాకిస్తాన్ మధ్య జరిగే సూపర్ ఫోర్ మ్యాచ్‌కి జింబాబ్వేకు చెందిన ఆండీ పైక్రాఫ్ట్ మళ్లీ మ్యాచ్ రెఫరీగా వ్యవహరించనున్నారు. ఈ నిర్ణయం వివాదాస్పదంగా మారినప్పటికీ, అంతర్జాతీయ క్రికెట్ మండలి (ICC) తన వైఖరిని స్పష్టం చేసింది. గతంలో గ్రూప్ దశ మ్యాచ్ తర్వాత జరిగిన 'కరచాలనం వివాదం'లో, పాకిస్తాన్ క్రికెట్ బోర్డు (PCB) పైక్రాఫ్ట్‌ను తొలగించాలని డిమాండ్ చేసింది. దీనిపై ఐసీసీ తమ నిర్ణయాన్ని గట్టిగా సమర్థించింది. 

పీసీబీ పైక్రాఫ్ట్‌పై రెండు ఈమెయిళ్లు పంపింది, మొదట అతడిని టోర్నమెంట్ నుండి, తర్వాత పాకిస్తాన్ ఆడే మ్యాచ్‌ల నుండి తొలగించాలని కోరింది. ఐసీసీ ఈ రెండు అభ్యర్థనలను తిరస్కరించింది. ఈ నిర్ణయం వల్ల పాకిస్తాన్ తమ యూఏఈతో జరిగే మ్యాచ్‌ను బాయ్‌కాట్ చేస్తామని హెచ్చరించింది. అయితే, ఐసీసీ, ఏసీసీ, పీసీబీ మధ్య జరిగిన చర్చల అనంతరం, పాకిస్తాన్ తమ నిర్ణయాన్ని వెనక్కి తీసుకుంది. 

సెప్టెంబర్ 21న సూపర్ ఫోర్ మ్యాచ్‌

ఈ పరిణామాల నేపథ్యంలో, భారత్-పాకిస్తాన్ మధ్య సెప్టెంబర్ 21న జరిగే సూపర్ ఫోర్ మ్యాచ్‌కు కూడా పైక్రాఫ్ట్ మ్యాచ్ రెఫరీగా ఉంటారని వివిధ వార్తా సంస్థలు నివేదించాయి. ఐసీసీ ఈ విషయంలో రాజీపడకుండా, తమ ఎలైట్ ప్యానెల్ రెఫరీకి మద్దతుగా నిలిచింది. ఒకవేళ పైక్రాఫ్ట్‌ను తొలగించి ఉంటే, అది భవిష్యత్తులో తప్పుడు సంప్రదాయానికి దారితీసి ఉండేదని ఐసీసీ భావించింది. ఈ నిర్ణయంతో పీసీబీకి మరోసారి ఇబ్బందికర పరిస్థితి ఎదురైంది.

భారత్-పాకిస్తాన్ మధ్య జరిగిన ఆసియా కప్ 2025 క్రికెట్ మ్యాచ్ తర్వాత షేక్ హ్యాండ్ వివాదం తీవ్ర చర్చనీయాంశమైంది. మ్యాచ్ ముగిసిన తర్వాత భారత క్రికెటర్లు పాకిస్తాన్ ఆటగాళ్లతో కరచాలనం చేయకుండా నేరుగా డ్రెస్సింగ్ రూమ్‌కు వెళ్లిపోయారు.   భారత ఆటగాళ్ల చర్య క్రీడాస్ఫూర్తికి విరుద్ధమని పాకిస్తాన్ క్రికెట్ బోర్డు (PCB) ఆరోపించింది. ఈ విషయమై అంతర్జాతీయ క్రికెట్ మండలి (ICC)కి ఫిర్యాదు చేసింది. 

అంతేకాకుండా, మ్యాచ్ రిఫరీ ఆండీ పైక్రాఫ్ట్‌ను తొలగించాలని కూడా డిమాండ్ చేసింది. ఈ డిమాండ్లను తీర్చకపోతే తదుపరి మ్యాచ్‌ను బహిష్కరిస్తామని పాకిస్తాన్ బెదిరించింది. పాకిస్తాన్ ఫిర్యాదుపై ICC స్పందిస్తూ, మ్యాచ్ రిఫరీ పైక్రాఫ్ట్ పాత్ర ఇందులో లేదని, షేక్ హ్యాండ్ ఇవ్వాలని MCC మాన్యువల్‌లో లేదని పేర్కొంటూ పాకిస్తాన్ డిమాండ్లను తోసిపుచ్చింది.