Reliance: వెనెజువెలా నుంచి రిలయన్స్‌ చమురు దిగుమతులు.. అమెరికా గ్రీన్‌సిగ్నల్

ఇంటర్నేషనల్‌ ఇంధన మార్కెట్‌లో భారత ఇంధన దిగ్గజం రిలయన్స్ ఇండస్ట్రీస్ లిమిటెడ్‌ విజయం సాధించింది. వెనెజువెలా నుంచి నేరుగా ముడి చమురు కొనుగోలు చేసేందుకు అమెరికా ప్రభుత్వం ఈ కంపెనీకి 'జనరల్ లైసెన్స్'ను మంజూరు చేసింది. ఈ నిర్ణయంతో గతేడాది కాలంగా ఉన్న అడ్డంకులు తొలగిపోనున్నాయి. డిస్కౌంట్ ధరకే భారీగా చమురు దిగుమతి చేసుకునేందుకు అవకాశం ఉంటుంది. ఈ లైసెన్స్‌తో రిలయన్స్ కంపెనీ ఎలాంటి మధ్యవర్తులు లేకుండా నేరుగా వెనెజువెలా నుంచి చమురును కొనుగోలు చేసుకోవచ్చు. అలాగే ఎగుమతి చేయవచ్చు, తన రిఫైనరీలలో శుద్ధి చేసుకోవచ్చు.

Also Read: బంగ్లాదేశ్‌ ప్రధానిగా తారిక్ రెహమాన్.. భారత్‌కు లాభమా? నష్టమా ?

రష్యా చమురుపై ఆంక్షలు కొనసాగుతున్న సంగతి తెలిసిందే. దీంతో వెనెజువెలా నుంచి లభించే భారీ ముడి చమురును రిలయన్స్‌ తక్కువ ధరకే కొనుగోలు చేయనుంది. అయితే ఈ మార్పు రావడానికి ఓ కారణం ఉంది. 2025లో అమెరికా విధించిన ఆంక్షల వల్ల రిలయన్స్ వెనెజువెలా నుంచి దిగుమతులు ఆపేసింది. ఈ ఏడాది జనవరిలో వెనెజువెలా అధ్యక్షుడు నికోలస్ మదురోను అమెరికా దళాలు అదుపులోకి తీసుకున్నాయి. ఆ తర్వాత అక్కడ రాజకీయ మార్పులు జరిగాయి. దీంతో అమెరికా ట్రెజరీ విభాగం వెనెజువెలా ఇంధన రంగంపై ఆంక్షలను సడలించింది. తాము ఎంపిక చేసిన కంపెనీలకు లైసెన్సులు జారీ చేస్తూ వస్తోంది. ఈ క్రమంలోనే రిలయన్స్‌కు కూడా లైసెన్స్‌ వచ్చింది. 

Also Read: 85 శాతం కంటి చూపు కోల్పోయిన ఇమ్రాన్: పాక్ సుప్రీంకోర్టు సంచలన నిర్ణయం!

ఇదిలాఉండగా గుజరాత్‌లోని జామ్‌నగర్‌లో ఉన్న రిలయన్స్ రిఫైనరీ ప్రపంచంలోనే అతిపెద్దది. ఈ సంస్థకు వెనెజువెలా నుంచి వచ్చే భారీ ముడి చమురును శుద్ధి చేయగల సామర్థ్యం ఉంది. ఈ ఒప్పందం వల్ల రిలయన్స్ లాభాలు గణనీయంగా పెరిగే అవకాశం ఉందని నిపుణులు భావిస్తున్నారు. అయితే రిలయన్స్‌తో పాటు ప్రభుత్వ రంగ సంస్థలైన IOC (ఇండియన్ ఆయిల్ కార్పొరేషన్), HPCL కు కూడా ఇప్పటికే వెనెజువెలా నుంచి చమురు కొనుగోళ్లను ప్రారంభించాయి. ఈ రెండు ప్రభుత్వ రంగం సంస్థలు కలిసి సుమారు 2 మిలియన్ బారెళ్ల ముడి చమురును వెనెజువెలా నుంచి కొనుగోలు చేసేందుకు ఒప్పందం చేసుకున్నాయి.