ఏడాది ట్రంప్ పాలన.. ఇండియాకి ప్లస్సా..? మైనస్సా..?

డొనాల్డ్ ట్రంప్ అగ్రరాజ్యం పగ్గాలు చేపట్టి ఏడాది అయ్యింది. అమెరికా ఫస్ట్ నినాదంతో రెండోసారి అధికారంలోకి వచ్చిన ట్రంప్ పాలన ఇండియాకు అనుకూలంగా ఉందా లేక వ్యతిరేకంగా ఉందా అనేది ఇప్పుడు చూద్దాం. ప్రధాని మోదీతో వ్యక్తిగత స్నేహం ఉన్నప్పటికీ, వాణిజ్యం, వలసల విషయంలో ట్రంప్ అనుసరించిన కఠిన వైఖరి భారతీయులపై తీవ్ర ప్రభావం చూపింది. ట్రంప్ పాలనలో ఈ ఏడాది ప్రధానంగా 'టారిఫ్ వార్' (సుంకాల యుద్ధం) నడిచింది. భారత్‌ను టారిఫ్ కింగ్ అని పిలిచే ట్రంప్, భారతీయ ఎగుమతులపై 25% నుండి 50% వరకు అదనపు సుంకాలు విధించారు. ముఖ్యంగా వస్త్రాలు, తోలు ఉత్పత్తులు, ఐటీ సేవలపై దీని ప్రభావం పడింది. రష్యా నుండి చమురు కొనుగోలు చేస్తున్నందుకు భారత్‌పై పెనాల్టీలు విధిస్తామని హెచ్చరించడం దౌత్యపరమైన ఉద్రిక్తతలకు దారితీసింది.

వలస విధానం - హెచ్-1బి షాక్

అమెరికాలో ఉన్న భారతీయులకు, ముఖ్యంగా ఐటీ నిపుణులకు ఈ ఏడాది గండ కాలంగా మారింది. H-1B వీసా నిబంధనలను కఠినతరం చేయడం, కనీస వేతన పరిమితిని పెంచడం వల్ల అనేక కంపెనీలు భారతీయులను తీసుకోవడానికి వెనకాడుతున్నాయి. అక్రమంగా ఉన్నారనే నెపంతో వేలమంది భారతీయులను స్వదేశానికి పంపించివేయడం ప్రవాస భారతీయుల్లో ఆందోళన నింపింది.

రష్యా- భారత్ స్నేహం

రష్యా-ఉక్రెయిన్ యుద్ధం నేపథ్యంలో భారత్ రష్యా నుండి చమురు కొనడంపై ట్రంప్ ప్రభుత్వం మొదట్లో అసహనం వ్యక్తం చేసినప్పటికీ, చివరకు వాస్తవిక దృక్పథంతో భారత్ ఇంధన అవసరాలను గుర్తించింది. మరోవైపు, పారిస్ పర్యావరణ ఒప్పందం నుండి అమెరికా వైఖరి మారడం వల్ల గ్రీన్ ఎనర్జీ రంగంలో పెట్టుబడులపై ప్రభావం పడింది.

పాకిస్థాన్‌తో ట్రంప్ ఫ్రెండ్‌షిప్ పెంచడం భారత్‌కు మింగుడుపడని అంశం. భారత్-పాక్ మధ్య అణ్వాయుధ యుద్ధం రాకుండా తానే ఆపానని ట్రంప్ పదేపదే ప్రకటించడం దౌత్యపరంగా చర్చనీయాంశమైంది. అయితే, చైనాను అడ్డుకునే విషయంలో మాత్రం భారత్-అమెరికా వ్యూహాత్మక భాగస్వామ్యం బలంగానే ఉంది. 'క్వాడ్' కూటమి ద్వారా ఇండో-పసిఫిక్ ప్రాంతంలో రక్షణ సహకారం కొనసాగుతోంది. మొత్తంగా, ట్రంప్ 2.0 తొలి ఏడాది భారత్‌తో సంబంధాలను లావాదేవీల ధోరణి వైపు మళ్లించింది. స్నేహం కంటే వ్యాపార ప్రయోజనాలకే ట్రంప్ పెద్దపీట వేయడం భారత్‌కు కొత్త సవాల్‌గా మారింది.