Jammu and Kashmir: పాక్ దంపతులకు జమ్మూకశ్మీర్‌ హైకోర్టు మాస్ వార్నింగ్

గత 37 ఏళ్లుగా భారతదేశంలో అక్రమంగా నివసిస్తున్న ఓ పాకిస్తానీ దంపతులను తక్షణమే దేశం విడిచి వెళ్ళాలని జమ్మూ కాశ్మీర్ హైకోర్టు ఆదేశించింది. మహ్మద్ ఖలీల్ ఖాజీ, ఆయన భార్య ఆరిఫా ఖాజీ 1988లో పాకిస్తాన్ పాస్‌పోర్టులతో భారతదేశంలోకి ప్రవేశించారు. వారి వీసా గడువు ముగిసినప్పటికీ, వారు శ్రీనగర్‌లోనే నివసిస్తూ వస్తున్నారు. ఖాజీ దంపతులు తాము భారతీయులమని, తాము పాకిస్తాన్ పౌరసత్వాన్ని బలవంతంగా పొందాల్సి వచ్చిందని కోర్టులో వాదించారు. తమకు శ్రీనగర్‌లో పూర్వీకుల ఆస్తులు ఉన్నాయని, తాము భారత్‌లోనే ఉండటానికి అనుమతించాలని కోరారు. అయితే, వారి వాదనలను కోర్టు తోసిపుచ్చింది.

ప్రధాన న్యాయమూర్తి అరుణ్ పల్లి, జస్టిస్ రజనీష్ ఓస్వాల్‌తో కూడిన ధర్మాసనం ఈ కేసును విచారించింది. దంపతులు వాస్తవాలను దాచిపెట్టారని, తమ అక్రమ నివాసాన్ని పొడిగించుకోవడానికి తప్పుడు కథలు అల్లారని కోర్టు స్పష్టం చేసింది. ఖాజీ 1955-57లో శ్రీనగర్‌లో పాఠశాలకు వెళ్ళినట్లు ఆధారాలు ఉన్నాయని, ఇది 1948 యుద్ధం కారణంగా పాకిస్తాన్‌లో చిక్కుకుపోయారన్న వారి వాదనకు విరుద్ధంగా ఉందని కోర్టు పేర్కొంది.

కోర్టు తన తీర్పులో, దంపతులు భారత పౌరులు కాదని, పాకిస్తాన్ పౌరులుగా భారతదేశంలో ప్రవేశించారని స్పష్టం చేసింది. చెల్లుబాటు అయ్యే వీసా లేదా ఇతర పత్రాలు లేకుండా ఒక విదేశీయుడు ఒక్క క్షణం కూడా భారతదేశంలో ఉండటానికి వీల్లేదని కోర్టు తేల్చి చెప్పింది. పౌరసత్వ చట్టం, 1955లోని సెక్షన్ 9(1) ప్రకారం, ఒక భారత పౌరుడు స్వచ్ఛందంగా మరొక దేశ పౌరసత్వం పొందితే, ఆటోమెటిక్‌గా భారత పౌరసత్వం రద్దవుతుందని కోర్టు వివరించింది. ఈ దంపతులు కావాలనే పాకిస్తాన్ పౌరసత్వాన్ని పొందారని, కాబట్టి వారిని దేశం నుండి బహిష్కరించడం సరైనదేనని కోర్టు అభిప్రాయపడింది.

గత 35 ఏళ్లుగా ఈ కేసు పెండింగ్‌లో ఉన్నప్పటికీ, సుప్రీంకోర్టు తీర్పులను ఉటంకిస్తూ, కోర్టును తప్పుదోవ పట్టించే ప్రయత్నం చేశారని ధర్మాసనం పేర్కొంది. ఈ అప్పీల్‌లో ఎటువంటి మెరిట్ లేదని చెబుతూ, పిటిషన్‌ను కొట్టివేసింది. జమ్మూ కాశ్మీర్ హైకోర్టు ఆదేశాలతో ఖాజీ దంపతులు తక్షణమే భారతదేశాన్ని వీడాల్సి ఉంటుంది. ఈ తీర్పు దేశంలో విదేశీయుల అక్రమ నివాసంపై ఒక ముఖ్యమైన సందేశాన్ని ఇస్తుంది.