New defense strategy : బంగ్లాదేశ్, పాకిస్తాన్ లకు చెక్.. సిలిగురిలో కొత్త ఆర్మీ బేస్..

భారతదేశ ఈశాన్య రాష్ట్రాలను ప్రధాన భూభాగంతో అనుసంధానం చేసే ఏకైక భూమార్గం సిలిగురి కారిడార్. ఇది దేశ రక్షణ వ్యూహంలో అత్యంత కీలకమైన ప్రాంతంగా ఉంది. గత కొన్ని వారాలుగా ఇక్కడ వరుస భద్రతా సమావేశాలు, సైనిక కార్యకలాపాలు జరిగాయి. ఈ క్రమంలో ఇక్కడ కొత్త ఆర్మీ బేస్ ను స్థాపించాలని కేంద్ర ప్రభుత్వం, ఆర్మీ నిర్ణయం తీసుకున్నాయి. రీసెంట్ గా బంగ్లాదేశ్, పాకిస్తాన్ లు కలవడం..వీటితో చైనాతో కూడా చేతుల కలుపుతున్న నేపథ్యంలో ఈ చోక్ పాయింట్ ను కాపాడ్డానికి, ఈశాన్య రాష్ట్రాకలు భద్రత కల్పించడానికి సిలిగురిలో మూడు ఫార్వార్డ్ స్థావరాలను నిర్మిస్తోంది.

మూడు చోట్ల..మూడు బేస్ లు..

ఇవి అస్సాంలోని ధుబ్రీ సమీపంలో బాముని, బీహార్‌లోని కిషన్‌గంజ్, పశ్చిమ బెంగాల్‌లోని చోప్రా వద్ద నెలకొల్పబడ్డాయి. ధుబ్రీ సదుపాయాన్ని పూర్తి స్థాయి సైనిక స్థావరంగా అభివృద్ధి చేస్తుండగా, కిషన్‌గంజ్ (బీహార్), చోప్రా (ఉత్తర బెంగాల్) గ్యారిసన్లు "కనీస సమయ వ్యవధి" ఆదేశం కింద ఏర్పాటు చేయబడ్డాయి. ఈ అంశాలను గమనిస్తే వేగవంతమైన ఆపరేషనల్ మోహరింపుపై దృష్టి సారించారు అని తెలుస్తోంది. చోప్రా డిఫెన్స్ ల్యాండ్ బంగ్లాదేశ్ పంచగర్ జిల్లా, రంగ్‌పూర్ డివిజన్‌లోని టెటులియా నుండి ఒక కిలోమీటర్ కంటే తక్కువ దూరంలో ఉంది. ఈ సదుపాయం బ్రహ్మాస్త్ర కార్ప్స్ కింద పనిచేస్తుంది. బాముని వద్ద ఏర్పాటవుతున్నలచిత్బోర్ఫుకన్ మిలిటరీ స్టేషన్ తేజ్‌పూర్ ప్రధాన కార్యాలయంగా ఉన్న 4 కార్ప్స్ (గజరాజ్ కార్ప్స్) కింద పనిచేస్తుంది. ఈ బేస్ సాంకేతిక నిఘా, ప్రాంత నియంత్రణ, చొరబాటు నిరోధక కార్యకలాపాలకు కేంద్రంగా పనిచేస్తుంది. పశ్చిమ సెక్టార్‌లో భారత-పాక్ ఉద్రిక్తతల తర్వాత బెంగాల్‌లో 31 ప్రదేశాల్లో బహుళ-ఏజెన్సీ భద్రతా డ్రిల్స్ జరుగుతున్నాయి. వాటిలో 17 చికెన్ నెక్ కోసం ప్రత్యేకంగా నిర్వహిస్తున్నారు. ఈ డ్రిల్స్ ద్వారా వివిధ భద్రతా సంస్థల మధ్య సమన్వయం పరీక్షించబడుతోంది, ఏదైనా అత్యవసర పరిస్థితిలో వేగంగా స్పందించే సామర్థ్యం మెరుగుపడుతోంది.

మొత్తం ఫోర్స్ ను దింపేశారు..

సిలిగురి ప్రాంతం చాలా ఇరుకుగా ఉంటుంది. 22 కిలోమీటర్ల వెడల్పుతో, ఈశాన్యంలోని 45 మిలియన్లకు పైగా ప్రజలను దేశంలోని మిగిలిన ప్రాంతాలతో కలుపుతుంది. ఇది పొరుగు దేశాలకు సరిహద్దుగా ఉండడంతో ఎ్పుడైనా, ఎలాంటి అటాక్ అయినా ఈజీగా చేయవచ్చును. అందుకే ఇక్కడ సైనిక స్థావరాలను ఏర్పాటు చేశారు. ఇది బంగ్లాదేశ్ సరిహద్దు నుంచి కేవలం ఒక కిలోమీటర్ దూరంలోనే ఉంటుంది. దీని ద్వారా బంగ్లా లోపల లోతుగా నిఘా పెట్టడానికి కూడా వీలవుతుంది. అలాగే ఇక్కడ రాఫెల్యుద్ధవిమానాలను, బ్రహ్మోస్ క్షిపణులను కూడా మోహరిస్తున్నారు. ఈ రక్షణ వ్యవస్థతో ఈ స్థానం బలోపేతం అవుతుందని చెబుతున్నారు. ఆర్మీ చీఫ్ జనరల్ ఉపేంద్ర ద్వివేది చికెన్ నెక్‌ను భారతదేశ "అత్యంత బలమైన రక్షణ కారిడార్"గా అభివర్ణించారు. భారత సాయుధ బలగాలు ఇప్పుడు సిలిగురి కారిడార్‌ను కొత్త వ్యూహాత్మక దృష్టికోణంతోచూస్తున్నాయని, ఉత్తరం నుండి దాడి జరిగితే పశ్చిమ బెంగాల్, సిక్కిం, ఈశాన్య ప్రాంతాల నుండి సైన్యాలు వేగంగా సమీకరించగలవని ఆయన నొక్కి చెప్పారు.

సిలిగురి కారిడార్ వ్యూహాత్మక ప్రాముఖ్యత

సిలిగురి కారిడార్, సాధారణంగా "చికెన్ నెక్" అని పిలువబడే ఈ ప్రాంతం కేవలం 20-22 కిలోమీటర్ల వెడల్పు మాత్రమే ఉన్న సన్నని భూభాగం. ఇది అరుణాచల్ ప్రదేశ్, అస్సాం, మణిపూర్, మేఘాలయ, మిజోరాం, నాగాలాండ్, సిక్కిం, త్రిపుర అనే ఎనిమిది ఈశాన్య రాష్ట్రాలను భారత ప్రధాన భూభాగంతో అనుసంధానం చేస్తుంది. నేపాల్, భూటాన్, బంగ్లాదేశ్ మధ్య ఇరుక్కున్న ఈ ప్రాంతం చైనా-భూటాన్-భారత్ త్రిజంక్షన్‌కు సమీపంలో ఉంది. ఈ కారిడార్ రవాణా, వాణిజ్యానికి అత్యంత కీలకమైనది. ప్రతిరోజూ దాదాపు పది లక్షల వాహనాలు - ట్రక్కులు, బస్సులు, SUVలు, ప్రైవేట్ కార్లు, ద్విచక్ర వాహనాలు - ఈ కారిడార్ గుండా ప్రయాణిస్తాయి. 2,400 మెట్రిక్ టన్నుల సరుకులు రవాణా అవుతాయి, రూ. 142 కోట్ల ఆదాయం లభిస్తుంది. అనేక చమురు, గ్యాస్ పైప్‌లైన్లు, విద్యుత్ గ్రిడ్‌లు ఈ ప్రాంతం గుండా వెళ్తాయి.