Nepal: మాజీ ప్రధాని కెపి ఓలి ఇప్పుడు ఎక్కడ, ఎలా ఉన్నాడో తెలుసా..?

నేపాల్ రాజకీయాల్లో గత కొద్ది రోజులుగా అనూహ్య పరిణామాలు చోటు చేసుకుంటున్నాయి. ప్రధాని పదవికి రాజీనామా చేసి, సైనిక రక్షణలో ఉన్న కేపీ శర్మ ఓలీ తాజాగా ఆర్మీ బ్యారక్స్ నుండి బయటకొచ్చి, మరో అద్దె ఇంట్లోకి మారారు. నేపాల్‌లో 'జెడ్జనరేషన్' నిరసనలు ఉధృతమవడంతో ఆయన భద్రతా కారణాల దృష్ట్యా ఈ నిర్ణయం తీసుకున్నారు.

Just few days back KP Sharma Oli was enjoying VVIP treatment in China as Nepal PM, now he is on the run & his house is burning

Time & conditions changed so quickly for him pic.twitter.com/az3nmsGoNz

— Veena Jain (@Vtxt21) September 9, 2025

గత కొన్ని రోజులుగా నేపాల్ రాజధాని కాఠ్మాండూ సహా దేశవ్యాప్తంగా యువత నేతృత్వంలో పెద్ద ఎత్తున నిరసనలు చెలరేగాయి. ప్రధానంగా అవినీతి, ప్రభుత్వంలో జరుగుతున్న అక్రమాలు, సోషల్ మీడియాపై నిషేధం వంటి అంశాలపై ఈ ఆందోళనలు తీవ్రమయ్యాయి. ఈ నిరసనలు హింసాత్మకంగా మారడంతో ప్రధాని పదవికి కేపీ శర్మ ఓలీ రాజీనామా చేయాల్సి వచ్చింది. ఆ తర్వాత ఆయన తన ఇంటికి తిరిగి వెళ్ళడం సురక్షితం కాదని భావించి, సైన్యం ఆధ్వర్యంలో ఉన్న శివపురి ప్రాంతంలోని ఆర్మీ బ్యారక్స్‌కు తరలి వెళ్లారు.

అయితే, ఆయన ఆర్మీ బ్యారక్స్‌లో ఉండటంపై కూడా నిరసనకారులు ఆగ్రహం వ్యక్తం చేశారు. ప్రభుత్వంలో కీలక పదవిలో లేని ఓ నాయకుడు సైనిక రక్షణలో ఉండటంపై విమర్శలు వెల్లువెత్తాయి. దాదాపు తొమ్మిది రోజుల పాటు సైనిక రక్షణలో ఉన్న ఓలీ, ప్రస్తుతం భక్త్‌పూర్ జిల్లాలోని గుండు ప్రాంతంలో ఓ ప్రైవేట్ ఇంటికి మారినట్లు సమాచారం. నిరసనల సమయంలో ఆయన అధికారిక నివాసం, ప్రధాని కార్యాలయం కూడా పాక్షికంగా ధ్వంసమయ్యాయి.

ఈ విప్లవం పూర్తిగా యువత నేతృత్వంలో జరిగింది. సోషల్ మీడియా ద్వారా సంఘటితమైన ఈ యువత, దేశంలో దశాబ్దాలుగా పాతుకుపోయిన అవినీతి, బంధుప్రీతిని అంతం చేయాలని డిమాండ్ చేస్తోంది. ఓలీ రాజీనామా, ఆయన ఆర్మీ బ్యారక్స్ నుండి తరలింపు వంటివి నిరసనకారుల పట్టుదలకు నిదర్శనంగా కనిపిస్తున్నాయి. కొత్త ప్రభుత్వం ఏర్పాటు ప్రక్రియ జరుగుతున్నప్పటికీ, దేశంలో ఇంకా అస్థిరత కొనసాగుతోంది. భవిష్యత్తులో ఈ 'జనరేషన్ జెడ్' ఉద్యమం నేపాల్ రాజకీయాలను ఏ విధంగా ప్రభావితం చేస్తుందో చూడాలి.