Mahatma Gandhi : ఆస్ట్రేలియాలో దారుణం.. మహాత్మా గాంధీ విగ్రహాన్ని కోసుకుని ఎత్తుకెళ్లారు!

ఆస్ట్రేలియాలో దారుణం జరిగింది. రోవిల్లేలోని ఆస్ట్రేలియన్ ఇండియన్ కమ్యూనిటీ సెంటర్ ప్రాంగణంలో ఉన్న మహాత్మా గాంధీ(Mahatama Gandhi) కాంస్య విగ్రహాన్ని కొంతమంది దొంగలు కట్ చేసుకుని ఎత్తుకెళ్లారు. ఈ ఘటన స్థానికంగానే కాకుండా భారతీయ సమాజంలో కూడా కలకలం రేపుతోంది. పోలీసులు ఈ ఘటనపై కేసు నమోదు చేసుకుని దర్యాప్తు చేపట్టారు. 

Also Read :  ఇండియాకు ట్రంప్ గుడ్‌న్యూస్.. భారీగా టారిఫ్‌లు తగ్గింపు

గుర్తుతెలియని వ్యక్తులు కారులో వచ్చి

స్థానిక పోలీసుల వెల్లడించిన వివరాల ప్రకారం.. జనవరి 12వ తేదీ అర్ధరాత్రి దాటిన తర్వాత (సుమారు 12:50 గంటల సమయంలో) ముగ్గురు గుర్తుతెలియని వ్యక్తులు కారులో వచ్చి ఈ చోరీకి పాల్పడ్డారు. వారు చాలా ప్లాన్‌ ప్రకారం.. మెటల్ కట్ చేసే 'యాంగిల్ గ్రైండర్' మిషన్‌తో విగ్రహాన్ని పాదాల దగ్గర కట్ చేసి తీసుకెళ్లారు. ఇందుకు సంబంధించిన దృశ్యాలన్నీ సీసీటీవీ ద్వారా తెలుస్తోంది.

ఆస్ట్రేలియాకు బహుమతిగా

ఈ విగ్రహం మామూలుది కాదు. భారత ప్రభుత్వం (ICCR) తరపున ఆస్ట్రేలియాకు బహుమతిగా ఇచ్చినది. 2021లో అప్పటి ఆస్ట్రేలియా(australia) ప్రధాని స్కాట్ మోరిసన్ దీనిని ఎంతో ఘనంగా ఆవిష్కరించారు. అయితే ఈ విగ్రహం మీద దాడులు జరగడం ఇది మొదటిసారి కాదు. గతంలో 2021లో విగ్రహాన్ని ప్రతిష్టించిన కేవలం 24 గంటల్లోనే, కొందరు దుండగులు దీనిని ధ్వంసం చేసే ప్రయత్నం చేశారు. అప్పట్లో ఈ చర్యను రెండు దేశాలు తీవ్రంగా ఖండించాయి. ఇప్పుడు ఏకంగా విగ్రహాన్నే ఎత్తుకెళ్లడంతో దీని వెనుక ఏదైనా విద్వేషపూరిత కుట్ర ఉందా అనే కోణంలో పోలీసులు దర్యాప్తు చేస్తున్నారు.

నిందితులు ఈ కాంస్య విగ్రహాన్ని ముక్కలుగా చేసి స్క్రాప్ వ్యాపారులకు అమ్మే అవకాశం ఉందని పోలీసులు అనుమానిస్తున్నారు. అందుకే, ఎవరైనా అనుమానాస్పదంగా భారీ కాంస్య ముక్కలను అమ్మడానికి వస్తే వెంటనే సమాచారం ఇవ్వాలని విక్టోరియా పోలీసులు హెచ్చరించారు.

Also Read :  వీర మరణం పొందిన ఇద్దరు బలూచ్‌ మహిళలు .. వణికిపోతున్న పాకిస్థాన్

కఠినంగా శిక్షించాలని

శాంతిని బోధించిన మహాత్ముడి విగ్రహాన్ని ఇలా ముక్కలు చేయడం ప్రపంచవ్యాప్తంగా ఉన్న భారతీయులను కలచివేస్తోంది. నిందితులను పట్టుకుని కఠినంగా శిక్షించాలని ప్రవాస భారతీయులు డిమాండ్ చేస్తున్నారు.