TG Rains: తెలంగాణలో దంచికొడుతున్న వానలు.. ఈ జిల్లాల్లో స్కూళ్లకు సెలవులు!

తెలంగాణలో వర్షాలు దంచికొడుతున్నాయి. మరో రెండు రోజులు కూడా ఇదే పరిస్థితి కొనసాగనుండడంతో రాష్ట్ర వ్యాప్తంగా పలు జిల్లాల్లో స్కూళ్ళకు సెలవు ప్రకటించారు. జీహెచ్ ఎంసీ పరిధిలో అయితే రేపు ఒంటిపూట బడులు మాత్రమే నిర్వహించాలని ఆదేశించారు.

By Manogna alamuru 13 Aug 2025 in తెలంగాణ హైదరాబాద్

New Update

వర్షాలు, వరదల్లో తెలంగాణ మునిగి తేలుతోంది. బుధవారం, గురువారాల్లో ఇవి మరింత ఎక్కువగా పడనుండడంతో రాష్ట్ర వ్యాప్తంగా రెడ్ అలెర్ట్ ప్రకటించింది వాతావరణ శాఖ. పశ్చిమ మధ్య బంగాళాఖాతంలో ఏర్పడిన అల్పపీడనం కారణంగా రాష్ట్రంలో వర్షాలు కొనసాగుతాయని, ముఖ్యంగా ఉత్తర తెలంగాణలో 17న వర్షాల తీవ్రత మరింత పెరిగే అవకాశం ఉందని తెలిపారు. ఈ నేపథ్యంలో రాష్ట్రంలో చాలా జిల్లాల్లో స్కూళ్ళకు సెలవు ప్రకటించారు. జనగామ, హనుమకొండ, వరంగల్, మహబూబాబాద్, యాదాద్రి భువనగిరి జిల్లాల్లో గురువారం ప్రభుత్వ, ప్రైవేట్ విద్యాసంస్థలు మూసివేయాలని విద్యాశాఖ ఆదేశాలు జారీ చేసింది. అలాగే జీహెచ్‌ఎంసీ పరిధిలో గురువారం ఒంటి పూట బడులు మాత్రమే నిర్వహించాలని చెప్పింది. తెలంగాణలో సంగారెడ్డి, మెదక్‌, వికారాబాద్‌, హైదరాబాద్‌, మేడ్చల్ మల్కాజిగిరి, యాదాద్రి భువనగిరి, సూర్యాపేట, ఖమ్మం, భద్రాద్రి కొత్తగూడెం, ములుగు, జయశంకర్ భూపాలపల్లి జిల్లాలు రెడ్ అలెర్ట్ లో ఉన్నాయి. ఆదిలాబాద్‌, కొమురంభీం, మంచిర్యాల, కామారెడ్డి, సిద్దిపేట, హనుమకొండ, జనగామ, వరంగల్‌, నల్గొండ, రంగారెడ్డి జిల్లాలు ఆరెంజ్ అలెర్ట్ లో ఉండగా..నారాయణపేట, జోగులాంబ గద్వాల, వనపర్తి, నాగర్‌కర్నూల్‌, మహబూబ్‌నగర్‌, కరీంనగర్‌, పెద్దపల్లి, రాజన్న సిరిసిల్ల, జగిత్యాల, నిజామాబాద్‌, నిర్మల్‌ లకు ఎల్లో అలెర్ట్ జారీ చేశారు. హైదరాబాద్ లో కూడా కుండపోతగా వర్షాలు కురుస్తున్నాయి. దీని వలన చాలాచోట్ల ట్రాఫిక్ జామ్ లు అవుతున్నాయి. రూడ్లపై నీరు నిలిచిపోవడంతో జనజీవనం అస్తవ్యస్తంగా తయారయ్యింది.

సూర్యాపేటలో కూడా..

భారీ వర్షాల నేపథ్యంలో ఈ నెల 14 న సూర్యాపేట జిల్లావ్యాప్తంగా పాఠశాలలకు సెలవు ప్రకటిస్తున్నట్లు జిల్లా కలెక్టర్ తేజస్ నంద్ లాల్ పవార్ ఒక ప్రకటనలో తెలిపారు. గురువారం కూడా జిల్లాలో భారీ,అతి భారీ వర్షాలు కురిసే అవకాశం ఉందన్న వాతావరణ శాఖ హెచ్చరికల నేపథ్యంలో ఈ నిర్ణయం తీసుకోవడం జరిగిందని, జిల్లాలోని అన్ని పాఠశాలల యాజమాన్యాలు గురువారం పాఠశాలలకు సెలవు పాటించాలని ఆయన ఆదేశించారు. ఒకవేళ అలా కాదని ఎవరైనా యాజమాన్యాలు పాఠశాలలు నడిపించినట్లయితే వారిపై కఠిన చర్యలు తీసుకుంటామని హెచ్చరించారు.

suryapet