Sajjanar: ఆడపిల్లను కిడ్నాప్‌ చేశారంటూ బెదిరింపు కాల్స్‌..జాగ్రత్త

ఈ మేరకు ఎక్స్ వేదికగా పేర్కొన్నారు. తాజాగా, హైదరాబాద్‌లోని రాయ‌దుర్గంలో ఓ విద్యార్థిని తల్లిదండ్రులకు ఇలాగే విదేశీ ఫోన్ నంబ‌ర్‌తో సైబ‌ర్ నేర‌గాళ్లు వాట్సాప్ కాల్ చేశారని తెలిపారు. మీ అమ్మాయిని కిడ్నాప్ చేశామని, అడిగినంత డబ్బును పంపించకుంటే చంపేస్తామని సైబర్ నేరగాళ్లు ఆమె తల్లిదండ్రులకు ఫోన్ చేసి బెదిరించారని సజ్జనార్ తెలిపారు. ఆ నేరగాళ్లు మీ అమ్మాయి ఏడుస్తోందంటూ ఓ వాయిస్‌ని కూడా వినిపిస్తారని తెలిపారు.

ఏడుస్తున్న గొంతు వినిపించ‌డంతో కాలేజీకి వెళ్లిన త‌మ‌ కూతురు కిడ్నాప్‌న‌కు గురైంద‌ని త‌ల్లిదండ్రులు భావించి… డ‌బ్బులు పంపించేందుకు సిద్ధపడినట్లు చెప్పారు. అయితే మోస‌గాళ్ల‌తో ఫోన్‌లో మాట్లాడుతూనే త‌మ బంధువుల‌కు ఈ విష‌యాన్ని చెప్పారని పేర్కొన్నారు. తమ కూతురు కాలేజీలో ఉందో లేదో తెలుసుకోవాలని వారికి చెప్పినట్లు తెలిపారు.

తమ కూతురు కాలేజీలో క్షేమంగా ఉందని తెలియడంతో అది ఫేక్‌ కాల్ అని ఊపిరి పీల్చుకున్నారని వెల్లడించారు. వెంటనే స్థానిక పోలీస్ స్టేషన్‌కి వెళ్లి ఫిర్యాదు చేసినట్లు వివరించారు.ఈ త‌ర‌హా బెదిరింపు ఫోన్ కాల్స్ తెలుగు రాష్ట్రాల్లో ఎక్కువ‌గా వస్తున్నాయని, ఆడపిల్ల‌లను కిడ్నాప్ చేశార‌ని చెప్ప‌గానే న‌మ్మి వారికి డ‌బ్బులు పంపిస్తున్నారని పేర్కొన్నారు.

అజ్ఞాత వ్య‌క్తుల నుంచి… విదేశీ ఫోన్ నంబ‌ర్ల‌తో వ‌చ్చే వాట్సాప్ కాల్స్‌కు అన్సర్‌ చేయోద్దని సజ్జనార్‌ తెలిపారు.. బెదిరింపుల‌కు జంక‌కుండా స్థానిక పోలీస్ స్టేష‌న్ల‌లో ఫిర్యాదు చేయాలని సజ్జనార్‌ పేర్కొన్నారు.