CM Kejriwal : సీఎం కేజ్రీవాల్‌కు ఊరట దక్కేనా?

Verdict On CM Arvind Kejriwal : లిక్కర్ స్కామ్ కేసు (Liquor Scam Case) లో ఈడీ అరెస్ట్‌ను సవాల్ చేస్తూ ఢిల్లీ సీఎం కేజ్రీవాల్ (CM Arvind Kejriwal) దాఖలు చేసిన పిటిషన్‌పై ఈరోజు సుప్రీం కోర్టు తీర్పు వెలువరించనుంది. కేజ్రీవాల్ పిటిషన్‌పై తీర్పును మే 17న రిజర్వ్‌ చేసింది. కాగా ఈ కేసులో కేజ్రీవాల్ ను మార్చి 21న ఈడీ అరెస్ట్ చేసిన సంగతి తెలిసిందే. కాగా సుప్రీం కోర్టు ఇచ్చే తీర్పుపై ఆప్ నేతలతో పాటు యావత్ దేశం వేచి చూస్తుంది. కేజ్రీవాల్ కు బెయిల్ వస్తుందా? లేదా? అనే ఉత్కంఠ నెలకొంది. దాదాపు ఐదు నెలలుగా ఈ కేసులో సీఎం కేజ్రీవాల్ తీహార్ జైలులో గడుపుతున్నారు.

మధ్యలో మధ్యంతర బెయిల్..

మే 10న, ఢిల్లీ ఎక్సైజ్ పాలసీకి సంబంధించి ఈడీ నమోదు చేసిన మనీలాండరింగ్ కేసు (Money Laundering Case) లో జూన్ 1 వరకు అతనికి మధ్యంతర బెయిల్ మంజూరు చేసిన అత్యున్నత న్యాయస్థానం, అయితే, అతను ముఖ్యమంత్రి కార్యాలయం, ఢిల్లీ సెక్రటేరియట్‌ను సందర్శించకూడదని ఆదేశించింది. జూన్ 2న లొంగిపోవాల్సిందిగా బెంచ్ కేజ్రీవాల్‌ను కోరింది. జూన్ 2న ఆయన లొంగిపోయారు.

ఈడీ అరెస్టును వ్యతిరేకిస్తూ, ఆ తర్వాత ఎక్సైజ్ పాలసీ కేసులో రిమాండ్ విధించడాన్ని వ్యతిరేకిస్తూ ఢిల్లీ హైకోర్టు (Delhi High Court) ఇచ్చిన తీర్పుపై కేజ్రీవాల్ చేసిన అప్పీల్‌పై సుప్రీం కోర్టు తీర్పు వెలువడనుంది. సార్వత్రిక ఎన్నికల ప్రకటన తర్వాత తన అరెస్టు "అన్యమైన పరిశీలనల ద్వారా ప్రేరేపించబడింది" అని కేజ్రీవాల్ సుప్రీంకోర్టులో అప్పీల్ దాఖలు చేస్తూ వాదించారు. ఏప్రిల్ 9న, జైలు నుంచి విడుదల కోసం ఆయన చేసిన అభ్యర్థనను హైకోర్టు కొట్టివేసింది.

Also Read : ఆర్‌ఆర్‌ఆర్‌ కి అవార్డుల పంట..మెరిసిన సీతామహాలక్ష్మి!