పాక్‌లో ఆత్మాహుతి దాడి.. ఆరోపణలను ఖండించిన భారత్!

PAK: పాకిస్థాన్ లో జరిగిన అత్మాహుతి దాడిలో భారత్ హస్తం ఉందనే వాదనలను భారత విదేశాంగ మంత్రిత్వ శాఖ ఖండించింది. ఉత్తర వజీరిస్తాన్‌లో జరిగిన ఆత్మాహుతి బాంబు దాడిలో 13 మంది పాక్ సైనికులు మృతి చెందారు. అయితే ఇందులో భారత్ ప్రమేయం ఉందనే పార్ ఆర్మీ ఆరోపణలను ఇండియా తోసిపుచ్చింది. 

పాక్ సైన్యం అబద్ధాలు..

ఈ మేరకు భారత విదేశాంగశాఖ (MEA) ప్రకటన విడుదల చేసింది. ఆత్మాహుతి దాడి నేపథ్యంలో భారత్‌పై నిందలు వేస్తూ పాక్‌ సైన్యం చేసిన అధికారిక ప్రకటనను తాము తీవ్రంగా ఖండిస్తున్నామని స్పష్టం చేసింది.  శనివారం ఖైబర్ పఖ్తుంఖ్వా ప్రావిన్స్‌లోని ఉత్తర వజీరిస్తాన్ జిల్లాలో పేలుడు పదార్థాలు నిండిన వాహనం సైనిక కాన్వాయ్‌పైకి దూసుకెళ్లింది. ఈ పేలుడులో 13 మంది సైనికులు మరణించగా, 10 మంది తీవ్రంగా గాయపడ్డారు. మరో 19 మంది పౌరులు గాయపడ్డారని స్థానిక ప్రభుత్వ అధికారి తెలిపారు. పాకిస్తాన్ గిరిజన ప్రాంతాలలో హింసాకాండ పెరగడానికి మరో ఉదాహరణగా నిలిచిన ఈ దాడిని, తెహ్రిక్-ఇ-తాలిబాన్ పాకిస్తాన్ (TTP)తో జతకట్టిన హఫీజ్ గుల్ బహదూర్ గ్రూప్ ఆత్మాహుతి విభాగం ప్రకటించింది. ఈ సంఘటన ఇటీవలి నెలల్లో ఉత్తర వజీరిస్తాన్‌లో జరిగిన అత్యంత ఘోరమైన సంఘటనలలో ఒకటిగా వర్ణించబడింది.

Also Read: సంచలనం.. బయటపడ్డ 4500 ఏళ్ల క్రితం నాటి నాగరికత

2021లో ఆఫ్ఘనిస్తాన్‌లో తాలిబన్లు తిరిగి అధికారంలోకి వచ్చినప్పటి నుండి పాకిస్తాన్ తన సరిహద్దు ప్రాంతాల్లో దాడులు పెరిగాయి. ఈ సరిహద్దు దాడులకు కారణమైన ఉగ్రవాదులకు ఆఫ్ఘన్ తాలిబన్లు ఆశ్రయం కల్పిస్తున్నారని పాక్ తరచుగా ఆరోపిస్తోంది. ఈ ఆరోపణను కాబూల్ ఖండించింది. ఈ సంవత్సరం ఇప్పటివరకు ఖైబర్ పఖ్తుంఖ్వా, బలూచిస్తాన్లలో ప్రభుత్వ వ్యతిరేక గ్రూపుల దాడుల్లో దాదాపు 290 మంది చనిపోయారు. ఎక్కువగా భద్రతా దళాలు ప్రాణాలు కోల్పోయాయి. గ్లోబల్ టెర్రరిజం ఇండెక్స్ 2025లో పాకిస్తాన్ రెండవ స్థానంలో నిలిచింది. గత సంవత్సరంలో ఉగ్రవాద సంబంధిత మరణాలు 45 శాతం పెరిగి 1,081కి చేరుకున్నాయి.

Also Read: త్వరలోనే డిజిటల్ హైవే.. రూల్స్ అతిక్రమిస్తే జేబులకి చిల్లే!