Sonia Gandhi: ఢిల్లీ కోర్టులో సోనియా గాంధీకి ఊరట.. FIR నమోదు రిజర్వ్

ఓటర్ల జాబితాలో పేరు నమోదు చేసుకునే నాటికి కాంగ్రెస్ అగ్రనాయకురాలు సోనియా గాంధీ భారత పౌరురాలు కాదంటూ దాఖలైన పిటిషన్‌పై ఢిల్లీ కోర్టు విచారణ జరిపింది. ఆ పిటిషన్‌పై విచారణను నిలిపివేస్తూ, కోర్టు తన తీర్పును రిజర్వులో ఉంచింది. దీంతో సోనియా గాంధీకి తాత్కాలికంగా ఊరట లభించినట్లయింది. ఢిల్లీ కోర్టులో న్యాయవాది వికాస్ త్రిపాఠి దాఖలు చేసిన క్రిమినల్ ఫిర్యాదులో ఈ ఆరోపణలు చేశారు. సోనియా గాంధీ 1983లో భారత పౌరసత్వం పొందక ముందే 1980 నాటి ఓటర్ల జాబితాలో ఆమె పేరు ఉందని, ఇది ఫోర్జరీకి సంబంధించిన నేరం కావచ్చని, దీనిపై పోలీసులతో దర్యాప్తు చేయించాలని కోర్టును కోరారు. ఈ ఆరోపణల నేపథ్యంలో ఐపీ ఎస్టేట్ పోలీస్ స్టేషన్‌లో ఎఫ్ఐఆర్ నమోదు చేయించాలని కూడా పిటిషనర్ అభ్యర్థించారు.

#Breaking
Delhi court refuses to order an FIR against Congress leader Sonia Gandhi for her name allegedly featuring in the electoral roll three years before she became an Indian citizen. #SoniaGandhi@INCIndia#FIR#Citizenpic.twitter.com/PomfpbB5Qw

— Bar and Bench (@barandbench) September 11, 2025

అదనపు చీఫ్ జ్యుడిషియల్ మేజిస్ట్రేట్ వైభవ్ చౌరాసియా ఈ కేసును గురువారం విచారించారు. పిటిషనర్ తరపు న్యాయవాది పవన్ నారంగ్ వాదనలు వినిపించారు. సోనియా గాంధీ 1983, ఏప్రిల్ 30న భారత పౌరసత్వం పొందారని, అయితే 1980లో న్యూఢిల్లీ నియోజకవర్గం ఓటర్ల జాబితాలో ఆమె పేరు కనిపించిందని నారంగ్ కోర్టుకు తెలిపారు. 1982లో ఆమె పేరును ఓటర్ల జాబితా నుంచి తొలగించారని, ఆ తర్వాత మళ్ళీ 1983లో పౌరసత్వం పొందిన తర్వాత తిరిగి చేర్చారని ఆయన అన్నారు. ఈ తొలగింపు, తిరిగి చేర్చడం వెనుక కారణాలు దర్యాప్తు చేయాల్సిన అవసరం ఉందని ఆయన పేర్కొన్నారు.

#BREAKING Delhi Court dismisses plea seeking FIR against Sonia Gandhi for getting her name added in electoral rolls of 1980, three years before getting Indian citizenship. #SoniaGandhi#Elections#Citizenshippic.twitter.com/2R5Ii99uXb

— Live Law (@LiveLawIndia) September 11, 2025

అయితే, ఈ పిటిషన్‌పై విచారణను నిలిపివేసిన న్యాయస్థానం తన తీర్పును రిజర్వ్ చేసింది. ఈ అంశంపై కోర్టు తీర్పు త్వరలో వెలువడనుంది. గతంలో కూడా సోనియా గాంధీ పౌరసత్వంపై అనేక విమర్శలు, కోర్టు కేసులు ఎదురయ్యాయి. ఈ కేసు కూడా రాజకీయంగానూ, చట్టపరంగానూ చర్చనీయాంశంగా మారింది. పిటిషనర్ ఆరోపణలు నిరూపితమైతే, ఇది ప్రజాప్రాతినిధ్య చట్టం కింద తీవ్ర పరిణామాలకు దారితీయవచ్చు. అయితే, ఓటర్ల జాబితాలో జరిగిన తప్పులు లేదా అజాగ్రత్తల వల్ల కూడా ఇలాంటివి జరగవచ్చని కొందరు విశ్లేషకులు అభిప్రాయపడుతున్నారు.