Rohit Sharma: వన్డేల్లో అత్యధిక సిక్స్‌లతో రోహిత్‌ శర్మ సరికొత్త రికార్డు

 Rohit Sharma:  భారత మాజీ కెప్టెన్, స్టార్ ఓపెనర్ రోహిత్ శర్మ వన్డే క్రికెట్‌లో సరికొత్త ప్రపంచ రికార్డు సృష్టించాడు.ఈ ఫార్మాట్‌లో అత్యధిక సిక్స్‌ల వీరుడిగా నిలిచాడు. రాంచిలో దక్షిణాఫ్రికా, టీమ్‌ఇండియా మధ్య జరుగుతున్న తొలి మ్యాచ్‌ దీనికి వేదికైంది. ఈ క్రమంలో, పాకిస్థాన్ మాజీ ఆల్‌రౌండర్ షాహిద్ అఫ్రిది పేరిట ఉన్న రికార్డును 'హిట్‌మ్యాన్' అధిగమించాడు.  ప్రేనెలన్‌ సుబ్రాయెన్‌ బౌలింగ్‌లో (14.1; 14.2) రోహిత్‌ రెండు వరుస సిక్స్‌లు బాదాడు. ఈ మ్యాచ్‌ ముందు వరకు రోహిత్‌ శర్మ ఖాతాలో వన్డేల్లో 349 సిక్స్‌లున్నాయి. ఈ మ్యాచ్‌కు ముందు అఫ్రిది (351 సిక్సర్లు) రికార్డును సమం చేయడానికి రోహిత్‌కు రెండు సిక్సర్లు అవసరమయ్యాయి. 

ప్రేనెలన్‌ సుబ్రాయెన్‌ బౌలింగ్‌లో వచ్చిన రెండు వరుస సిక్స్‌లతో రోహిత్‌ శర్మ.. పాకిస్థాన్‌ బ్యాటర్‌ షాహిద్‌ అఫ్రిది పేరిట ఉన్న అత్యధిక సిక్స్‌ల (351) రికార్డ్‌ను సమం చేశాడు. అనంతరం మార్కో యాన్సన్‌  బౌలింగ్‌లో (19.4) బౌలింగ్‌లో అతడు అద్భుతమైన సిక్స్‌ బాదాడు. దీంతో హిట్‌మ్యాన్‌ వన్డేల్లో అత్యధిక సిక్స్‌ల (352) వీరుడిగా నిలిచాడు.   38 ఏళ్ల వయసులోనూ తనదైన శైలిలో బ్యాటింగ్ కొనసాగిస్తూ ఈ అరుదైన ఘనతను తన ఖాతాలో వేసుకున్నాడు. విశేషమేమిటంటే, అఫ్రిది కంటే దాదాపు 100 ఇన్నింగ్స్‌లు తక్కువ ఆడి రోహిత్ ఈ మైలురాయిని చేరుకోవడం గమనార్హం.

ఈ మ్యాచ్‌లో ఆరంభంలోనే 1 పరుగు వద్ద టోనీ డి జోర్జి క్యాచ్ జారవిడచడంతో రోహిత్‌కు లైఫ్ లభించింది. ఆ తర్వాత విరాట్ కోహ్లీతో కలిసి ఇన్నింగ్స్‌ను చక్కదిద్దాడు. ఆటలో నిలదొక్కుకున్నాక బౌండరీలతో విరుచుకుపడ్డాడు. రికార్డు సాధించిన తర్వాత దూకుడుగా ఆడుతూ యన్‌సెన్ బౌలింగ్‌లో ఎల్బీడబ్ల్యూగా వెనుదిరిగాడు. కోహ్లీతో చర్చించినా డీఆర్‌ఎస్ తీసుకోకుండా పెవిలియన్‌కు చేరాడు. మొత్తం 51 బంతులాడిన రోహిత్ 5 ఫోర్లు, 3 సిక్సులతో 57 పరుగులు చేశాడు. ఈ రికార్డుతో క్రిస్ గేల్, ధోనీ, జయసూర్య వంటి దిగ్గజాల సరసన రోహిత్ అగ్రస్థానంలో నిలిచాడు.