Indian Railways: పండగల వేళ శుభవార్త.. ప్రయాణీకుల కోసం 150 స్పెషల్ ట్రైన్స్

పండుగల రద్దీని దృష్టిలో ఉంచుకుని భారతీయ రైల్వే కీలక నిర్ణయం తీసుకుంది. దేశవ్యాప్తంగా వివిధ ప్రధాన మార్గాల్లో 150 'పూజా స్పెషల్' రైళ్లను నడపనున్నట్లు ప్రకటించింది. ఈ రైళ్లు సెప్టెంబర్ 21 నుంచి నవంబర్ 30 వరకు అందుబాటులో ఉంటాయి. మొత్తం 2,024 ట్రిప్పులను ప్లాన్ చేశారు. ఈ ప్రత్యేక రైళ్ల ద్వారా లక్షలాది మంది ప్రయాణికులకు ప్రయాణం సులభతరం అవుతుందని భావిస్తున్నారు.

ఈ 150 రైళ్లలో అత్యధికంగా దక్షిణ మధ్య రైల్వే (SCR) జోన్‌లోనే నడుపుతున్నారు. ఈ జోన్ పరిధిలో మొత్తం 48 రైళ్లు 684 ట్రిప్పులను పూర్తి చేయనున్నాయి. ముఖ్యంగా హైదరాబాద్, సికింద్రాబాద్, విజయవాడ వంటి రద్దీ ప్రాంతాల నుంచి వివిధ గమ్యస్థానాలకు ఈ రైళ్లు ప్రయాణికులకు అందుబాటులోకి రానున్నాయి.

దక్షిణ మధ్య రైల్వేతో పాటు ఇతర జోన్‌లు కూడా ఈ ప్రత్యేక సర్వీసులను నడుపుతున్నాయి. తూర్పు మధ్య రైల్వే (ECR) 14 రైళ్లు, తూర్పు రైల్వే (ER) 24 రైళ్లు, పశ్చిమ రైల్వే (WR) 24 రైళ్లు మరియు దక్షిణ రైల్వే (SR) 10 రైళ్లను నడుపనున్నాయి. భువనేశ్వర్, పూరీ, సంబల్‌పూర్, రాంచీ, టాటానగర్, ప్రయాగ్‌రాజ్, కాన్పూర్, బిలాస్‌పూర్, రాయ్‌పూర్, భోపాల్ మరియు కోటా వంటి నగరాల నుంచి కూడా అదనపు రైలు సర్వీసులు అందుబాటులోకి వస్తాయి.

ప్రతి పండుగ సీజన్‌లో టికెట్ల కొరత మరియు రైళ్లలో అధిక రద్దీ కారణంగా ప్రయాణికులు ఎదుర్కొంటున్న ఇబ్బందులను తగ్గించడానికి ఈ నిర్ణయం తీసుకున్నట్లు రైల్వే అధికారులు తెలిపారు. ఇది మొదటి విడత ప్రకటన మాత్రమే అని, ప్రయాణికుల డిమాండ్‌ను బట్టి మరిన్ని ప్రత్యేక రైళ్లను ప్రకటించే అవకాశం ఉందని కూడా వారు స్పష్టం చేశారు. ఈ ప్రత్యేక రైళ్లకు సంబంధించిన టికెట్లను IRCTC వెబ్‌సైట్ మరియు రైల్వే స్టేషన్లలోని కౌంటర్లలో బుక్ చేసుకోవచ్చు. ప్రయాణికులు ముందస్తుగా టికెట్లు రిజర్వ్ చేసుకోవాలని రైల్వే శాఖ సూచించింది.