infosys: భూ కుంభకోణంలో ఐదుగురు ప్రభుత్వం ఉద్యోగులు సస్పెండ్

బెంగళూరులో ఐటీ దిగ్గజం ఇన్ఫోసిస్ భూములకు సంబంధించి జరిగిన రూ.250 కోట్ల భారీ అక్రమ రిజిస్ట్రేషన్ల వ్యవహారం ప్రస్తుతం కర్ణాటకలో సంచలనంగా మారింది. ఈ కుంభకోణంలో నిబంధనలను ఉల్లంఘించి రిజిస్ట్రేషన్లు చేసినట్లు ఆరోపణలు రావడంతో ఐదుగురు సబ్ రిజిస్ట్రార్లను ప్రభుత్వం తక్షణమే సస్పెండ్ చేస్తూ ఉత్తర్వులు జారీ చేసింది.

బెంగళూరు శివార్లలోని అనేకల్ తాలూకా, అత్తిబేలె హోబ్లీలో ఇన్ఫోసిస్ సంస్థకు చెందిన 53.5 ఎకరాల భూమి ఉంది. ఈ భూమిని ప్రముఖ రియల్ ఎస్టేట్ సంస్థ పురవంకరకు సుమారు రూ.250 కోట్లకు విక్రయించడానికి ఒప్పందం కుదిరింది. అయితే, ఈ భూమి రిజిస్ట్రేషన్ ప్రక్రియలో ప్రభుత్వ నిబంధనలను బేఖాతరు చేస్తూ అధికారులు అక్రమాలకు పాల్పడినట్లు విజిలెన్స్ దర్యాప్తులో తేలింది.

కావేరీ 2.0 సాఫ్ట్‌వేర్‌లోని లొసుగులను వాడుకుని, అక్రమ మార్గాల్లో రిజిస్ట్రేషన్లు చేసినట్లు ఆధారాలు లభించాయి. ముఖ్యంగా 'ఈ-ఖాతా' వివరాలు లేకుండానే  కోర్టు ఉత్తర్వులు ఉన్నాయని తప్పుడు సమాచారాన్ని సాఫ్ట్‌వేర్‌లో నమోదు చేసి రిజిస్ట్రేషన్ ప్రక్రియను పూర్తి చేశారు. ఈ అక్రమాల్లో భాగస్వాములైన అధికారులను ప్రభుత్వం సస్పెండ్ చేసింది. వారిలో రవి శంకనగౌడ ఒక్కరే ఇన్ఫోసిస్ భూమికి సంబంధించి దాదాపు 40 సేల్ డీడ్లను అక్రమంగా నమోదు చేసినట్లు అధికారులు గుర్తించారు.

రాజకీయ రచ్చ

ఈ వ్యవహారంపై రాజకీయంగా కూడా విమర్శలు వెల్లువెత్తాయి. గతంలో ప్రభుత్వం రాయితీ ధరపై కేటాయించిన భూమిని, నిబంధనలకు విరుద్ధంగా వాణిజ్య లాభాల కోసం విక్రయించడంపై కాంగ్రెస్ ఎంపీ కార్తీ చిదంబరం సోషల్ మీడియాలో ప్రశ్నలు లేవనెత్తారు. అయితే, ఇన్ఫోసిస్ ఈ ఆరోపణలను ఖండించింది. ఆ భూమిని తాము ప్రైవేట్ వ్యక్తుల నుండి బహిరంగ మార్కెట్లోనే కొనుగోలు చేశామని, ప్రభుత్వ రాయితీతో దీనికి సంబంధం లేదని స్పష్టం చేసింది. కర్ణాటక రెవెన్యూ శాఖ మంత్రి కృష్ణ బైరేగౌడ ఈ వ్యవహారాన్ని తీవ్రంగా పరిగణించారు. కేవలం ఈ ఒక్క భూమికే పరిమితం కాకుండా, బెంగళూరు వ్యాప్తంగా జరిగిన సుమారు 1,332 అక్రమ రిజిస్ట్రేషన్లపై సమగ్ర విచారణ జరిపించాలని అధికారులను ఆదేశించారు. డిప్యూటీ కమిషనర్ నేతృత్వంలో జరిగే ఈ దర్యాప్తులో మరిన్ని వివరాలు వెలుగులోకి వచ్చే అవకాశం ఉంది.