Road Accident: ఘోర రోడ్డు ప్రమాదం..RTC బస్సులు ఢీకొని 11 మంది మృ‌తి

Road Accident:  ఆదివారం తమిళనాడులోని శివగంగా జిల్లాలో ఘోర రోడ్డు ప్రమాదం చోటు చేసుకుంది. రెండు ప్రభుత్వ బస్సులు ఎదురెదురుగా ఢీకొన్నాయి. ఈ ప్రమాదంలో 11 మంది మృతి చెందగా, 40 మంది గాయపడ్డారని పోలీసులు తెలిపారు. శివగంగా రాష్ట్ర రాజధాని చెన్నై నుండి దాదాపు 460 కి.మీ దూరంలో ఉంది.

శివగంగ జిల్లాలోని తిరుపత్తూరులో రెండు ఆర్టీసీ బస్సులు ఢీకొన్నాయి. అతివేగమే ఈ ప్రమాదానికి కారణమని స్థానికులు చెబుతున్నారు. ఇప్పటికి వరకు ఈ ప్రమాదంలో 11 మంది ప్రాణాలు కోల్పోగా.. మరికొంత మందికి తీవ్ర గాయాలయ్యాయి. చనిపోయిన వారిలో 9 మంది మహిళలు ఉన్నారు. 

తిరుపత్తూరు ప్రాంతంలోని పిల్లయార్‌పట్టి నుండి ఐదు కిలోమీటర్ల దూరంలో ఈ ప్రమాదం చోటు చేసుకుంది. ప్రమాదం జరిగిన వెంటనే పోలీసులు హుటాహుటిన సంఘటన స్థలానికి చేరుకుని సహాయక చర్యలు చేపట్టారు. బస్సుల్లో  చిక్కుకుపోయిన వారిని బయటకు తీశారు.ఒక బస్సు తిరుప్పూర్ నుండి కరైకుడికి వెళుతుండగా, మరొకటి కరైకుడి నుండి దిండిగల్ జిల్లా వైపు వెళుతున్నట్లు తెలుస్తోంది.

అయితే మృతుల సంఖ్య ఇంకా పెరిగే అవకాశాలు ఉన్నట్లు తెలుస్తోంది. ప్రమాదం జరిగిన వెంటనే కొందరు మహిళలు బస్సుల్లోంచి బయటకు దూకారు.ప్రమాదంతో రహదారి రక్తసిక్తమైపోయింది. అత్యవసర బృందాలు గాయపడిన వారిని సమీపంలోని ఆసుపత్రులకు తరలించాయి. ప్రమాదానికి గల కారణాలు, ఆసుపత్రిలో చేరిన వారి పరిస్థితిపై పోలీసులు, అధికారులు తెలుసుకుంటున్నారు.

రెండు బస్సులు అత్యంత వేగంతో రావడంతోనే ఈ ప్రమాదం జరిగినట్లు వార్తలు వస్తున్నాయి. ఈ ప్రమాదంపై పోలీసులు కేసు నమోదు చేసి దర్యాప్తు జరుపుతున్నారు. ఈ సంఘటనకు సంబంధించి పూర్తి వివరాలు తెలియాల్సి ఉంది.