olive oil: ఆలివ్ ఆయిల్ తో ఆరోగ్యానికి ప్రమాదం.. ఎందుకో తెలుసా?

గత కొన్ని సంవత్సరాలుగా మార్కెట్లో ఆలివ్ నూనె డిమాండ్ బాగా పెరిగింది. దీనిలోని యాంటీ ఇన్ఫ్లమేటరీ, యాంటీఆక్సిడెంట్ లక్షణాలు ఆరోగ్యానికి చాలా ప్రయోజనకరంగా పరిగణించబడతాయి. అంతేకాదు ఇందులో గుండెకు మేలు చేసే మోనో శాచురేటెడ్ ఫ్యాట్స్, పాలీఅన్‌శాచురేటెడ్ ఫ్యాట్స్ ఉంటాయి.

అయితే అతిగా శుద్ధి చేసిన ఆలివ్ ఆయిల్ లో ఒమేగా 3 ఫ్యాటీ యాసిడ్స్ పరిమాణం చాలా తక్కువగా ఉంటుంది. ఇది దాని ప్రయోజనాలను తగ్గిస్తుందని ఆరోగ్య నిపుణులు అంటున్నారు. ఈ రకమైన ఆయిల్ తీసుకోవడం ద్వారా శరీరంలో మంచి కొలెస్ట్రాల్ స్థాయిలు తగ్గిపోయి.. చెడు కొలెస్ట్రాల్ పెరగడం ప్రాంభమవుతుంది. దీనివల్ల గుండె జబ్బుల ప్రమాదం పెరుగుతుంది.

ఆలివ్ నూనెలో విటమిన్ ఈ, యాంటీ ఆక్సిడెంట్లు, ఆరోగ్యకరమైన కొవ్వులు ఉంటాయి. ఇవి చర్మాన్ని రక్షించడానికి, హైడ్రేట్ చేయడానికి సహాయపడతాయి. కానీ.. ఆలివ్ ఆయిల్ ఎక్కువగా వాడడం వల్ల మొహంపై రంధ్రాలు మూసుకుపోతాయి.

ఈ రంధ్రాలు మూసుకుపోయినప్పుడు వాటిలో బ్యాక్టీరియా పేరుకుపోయి మొటిమలు, ఇన్ఫెక్షన్ కు దారితీస్తుంది. ముఖ్యంగా ఆయిలీ స్కిన్, మొటిమల బారిన పడే చర్మం ఉన్నవారు ఆలివ్ నూనెను అతిగా అప్లై చేసుకోవడం మానుకోవాలి.

సాధారణంగా ఆలివ్ ఆయిల్ అధిక ఉష్ణోగ్రత, పీడనం కింద శుద్ధి చేయబడుతుంది. దీనివల్ల నూనెలోని ఒమేగా-3 ఆమ్లాలు బర్న్ అయిపోతాయి. ఇది రక్తంలోని కొలెస్ట్రాల్ స్థాయిలపై చెడు ప్రభావాన్ని చూపుతుంది.

ఈ రకమైన ఆలివ్ నూనెను తీసుకోవడం వల్ల మీ శరీరంలో చెడు కొలెస్ట్రాల్ స్థాయి పెరుగుతుంది. అంతేకాదు దీని అధిక వినియోగం గుండె సమస్యలు, హైపోగ్లైసీమియా, జీర్ణ సమస్యలు , బరువు పెరగడం వంటి దీర్ఘకాలిక ఆరోగ్య ప్రమాదాలను కలిగిస్తుంది.

ఆలివ్ ఆయిల్ ఆరోగ్యానికి మంచిదే అయినప్పటికీ.. ప్రమాదాలను నివారించడానికి మితంగా తీసుకోవాలి. అలాగే అధిక నాణ్యత, శుద్ధి చేయని రకాలను ఎంచుకోవడం ముఖ్యం.

గమనిక: ఈ కథనం ఇంటర్నెట్‌లో అందుబాటులో ఉన్న సమాచారం ఆధారంగా మాత్రమే ఇచ్చినది. RTV దీనిని ధృవీకరించడంలేదు. ఆరోగ్య సమస్యల నివారణకు సంబంధిత వైద్య నిపుణుడిని సంప్రదించడం ఉత్తమం.