Silver anklets: వెండి పాదరక్షలు ఇంటి వద్దనే మిలమిలా మెరిసేలా చేసుకోవచ్చు.. ఎలానో తెలుసుకోండి

పండుగలు ప్రారంభం కాగానే ఇల్లు శుభ్రం చేయడంతోపాటు మహిళలు తమ ఆభరణాలను కూడా శుభ్రపరుచుకోవడానికి ప్రాధాన్యత ఇస్తారు. ముఖ్యంగా వెండి పట్టీలు, కాలి మట్టెలకు ప్రత్యేక శ్రద్ధ తీసుకుంటారు. ఎందుకంటే.. వీటిని రోజూ ధరించడం వల్ల వెండి ఆభరణాల మెరుపు క్రమంగా తగ్గిపోయి, అవి నల్లగా లేదా మందంగా కనిపిస్తాయి. దీని కారణంగా. చాలామంది వాటిని ప్రత్యేక సందర్భాలలో ధరించడానికి సందేహిస్తారు. అయితే కొన్ని సులభమైన ఇంటి నివారణ పద్ధతులు ఉపయోగించి వెండి ఆభరణాల మెరుపును సులువుగా తిరిగి తీసుకురావచ్చు. ఆ చిట్కాల గురించి కొన్ని  విషయాలు ఈ ఆర్టికల్‌లో తెలుసుకుందాం.

మెరుపును పునరుద్ధరించే సులభమైన ఇంటి చిట్కాలు:

వెండి నల్లబడటానికి కారణం: వెండి గాలిలో ఉండే సల్ఫర్ సమ్మేళనాలతో (Sulfur Compounds) రసాయనికంగా చర్య జరపడం వలన నల్లబడుతుంది. ఈ ప్రక్రియను టార్నిషింగ్ (Tarnishing) అంటారు. దీని వలన వెండి ఉపరితలంపై సిల్వర్ సల్ఫైడ్ (Silver Sulfide) అనే నల్లటి పూత ఏర్పడుతుంది. ఇది ఆభరణం యొక్క మెరుపును తగ్గిస్తుంది. తేమ, చెమట, సుగంధ ద్రవ్యాలు (Perfumes), లోషన్లు, ఇతర రసాయనాలతో వెండికి తాకిడి పెరిగినప్పుడు ఈ టార్నిషింగ్ వేగంగా జరుగుతుంది.

బేకింగ్ సోడా: వెండి ఆభరణాల మెరుపు తగ్గిపోయి ఉంటే వాటిని బేకింగ్ సోడా సహాయంతో తిరిగి పాలిష్ చేయవచ్చు. ఒక గిన్నెలో గోరు వెచ్చని నీరు తీసుకుని.. అందులో ఒక చెంచా బేకింగ్ సోడా కలిపి చిక్కటి పేస్ట్ తయారు చేయాలి. ఈ పేస్ట్‌ను మెత్తని టూత్‌బ్రష్ లేదా గుడ్డ సహాయంతో ఆభరణాలకు పూయండి. కొన్ని నిమిషాలు అలాగే ఉంచి.. తేలికపాటి చేతులతో సున్నితంగా రుద్దాలి. కొద్దిసేపటికే నలుపు,  మురికి తొలగిపోయి వెండి ఆభరణాలు కొత్త వాటిలా మెరిసిపోతాయి.

ఇది కూడా చదవండి: బ్లాక్ కాఫీతో బోలెడు లాభాలు.. అవేంటో తెలుసా?

సబ్బు- గోరువెచ్చని నీరు: వెండి పట్టీలు, మట్టెలను శుభ్రం చేయడానికి సబ్బు, గోరువెచ్చని నీటిని ఉపయోగించడం చాలా సులభమైన పద్ధతి. ముందుగా నీటిని కొద్దిగా వేడి చేసి అందులో వెండి ఆభరణాలను కొంతసేపు నానబెట్టాలి. తరువాత వాటిని బయటకు తీసి.. కొద్దిగా సబ్బు రాసి మెల్లగా రుద్దుతూ శుభ్రం చేయాలి. మురికి పూర్తిగా తొలగిపోయిన తర్వాత వాటిని గోరు వెచ్చని నీటితో తిరిగి కడిగి.. చివరగా మెత్తని పత్తి గుడ్డతో పూర్తిగా తుడవాలి. ఇది వెండి ఆభరణాల అసలు మెరుపును తిరిగి తెస్తుంది.

అల్యూమినియం ఫాయిల్: అల్యూమినియం ఫాయిల్ సహాయంతో కూడా వెండి ఆభరణాలను సమర్థవంతంగా శుభ్రం చేయవచ్చు. దీనికోసం ఒక గిన్నెలో వేడి నీరు తీసుకుని అందులో అల్యూమినియం ఫాయిల్ ముక్కను వేయాలి. ఇప్పుడు రెండు టేబుల్‌ స్పూన్ల బేకింగ్ సోడా, కొద్దిగా ఉప్పు కలపాలి. ఈ మిశ్రమం సిద్ధమైన తర్వాత ఆభరణాలను సుమారు 10 నిమిషాలు అందులో నానబెట్టండి. ఆ తర్వాత వాటిని బయటకు తీసి శుభ్రమైన నీటితో కడగాలి. ఈ ప్రక్రియ ఆభరణాల నలుపును తొలగించి వాటిని కొత్త వాటిలా మెరిసేలా చేస్తుంది.

గమనిక: ఈ కథనం ఇంటర్నెట్‌లో అందుబాటులో ఉన్న సమాచారం ఆధారంగా మాత్రమే ఇచ్చినది. RTV దీనిని ధృవీకరించడం లేదు. 

 ఇది కూడా చదవండి: బ్లాక్ హెడ్స్ మీ ముఖం అందాన్ని తగ్గిస్తున్నాయా..? అయితే వైద్యులు సూచించే ఈ ఇంటి చిట్కా ట్రై చేయండి!!