Eyes Vs Cucumber: కళ్ళకు దోసకాయతో రిలాక్స్.. నల్లటి వలయాలతోపాటు వాపు నుంచి ఉపశమనం

Eyes Vs Cucumber: కళ్ళు మనిషి శరీరంలోని అత్యంత ముఖ్యమైన, సున్నితమైన అవయవాలలో ఒకటి. ఇవి మన ప్రపంచాన్ని చూడటానికి, రంగులు, ఆకారాలు, కదలికలను గుర్తించడానికి సహాయపడతాయి. కళ్ళు మెదడుకు సమాచారాన్ని పంపించే ఒక రకమైన కెమెరాలు లాంటివి. వీటిని జాగ్రత్తగా చూసుకోవడం చాలా అవసరం. కళ్ళ ఆరోగ్యం మన మొత్తం శారీరక ఆరోగ్యంపై కూడా ప్రభావం చూపుతుంది. ఆధునిక జీవనశైలి, నిద్రలేమి, అధిక స్క్రీన్ టైం వంటి కారణాల వల్ల కళ్ళకు సంబంధించిన సమస్యలు పెరుగుతున్నాయి. అందుకే కళ్ళను ఎలా ఆరోగ్యంగా ఉంచుకోవాలో తెలుసుకోవడం చాలా ముఖ్యం. ప్రతిరోజూ నిద్ర లేకపోవడం, మొబైల్ స్క్రీన్‌కు అతుక్కుపోయే కళ్ళు.. ఇలాంటి సమస్యల వల్ల కళ్ల కింద వాపులు, నల్లటి వలయాలతో చాలామంది బాధపడుతుంటారు. దీనికి పరిష్కారంగా చాలామంది కళ్లపై కీర దోసకాయ ముక్కలను పెట్టుకుంటూ ఉంటారు. ఈ పద్ధతి కళ్ళకు నిజంగా ఉపశమనం ఇస్తుందా..? లేదా కేవలం ఒక బ్యూటీ టిప్ మాత్రమేనా? ఈ సందేహాలు కొందరిలో ఉంటాయి. వాటి గురించి కొన్ని విషయాలు ఈ ఆర్టికల్‌లో తెలుసుకుందాం.

కళ్ల చుట్టూ ఉన్న చర్మాన్ని టోన్ చేయడంలో..

వైద్య నిపుణుల అభిప్రాయం ప్రకారం.. కీరదోసకాయలో ఉండే విటమిన్ సి, కాఫిక్ యాసిడ్, యాంటీ ఆక్సిడెంట్లు కళ్ల వాపును, డార్క్ సర్కిల్స్ తగ్గించడంలో సహాయపడతాయి. ఇది పూర్తిగా శాస్త్రీయ పద్ధతి కాకపోయినా.. ఈ చిట్కా చాలామందికి బాగా పనిచేస్తోంది. దోసకాయలో ఉండే చల్లదనం కళ్ల వాపును తగ్గిస్తుంది. ముఖ్యంగా చాలాసేపు స్క్రీన్‌పై పనిచేసిన తర్వాత కళ్లపై పెట్టుకోవడం వల్ల మంచి ఉపశమనం లభిస్తుంది. అలాగే దోసకాయలోని యాంటీ ఆక్సిడెంట్లు, సిలికా కళ్ల చుట్టూ ఉన్న చర్మాన్ని టోన్ చేయడంలో సహాయపడతాయి. ఇందులో అధికంగా నీరు ఉండటం వల్ల కళ్ల చుట్టూ ఉన్న చర్మానికి తేమ అందుతుంది. దోసకాయను ఫ్రిజ్‌లో 15 నుంచి 20 నిమిషాలు చల్లబరిచి.. ఆపై రెండు గుండ్రని ముక్కలను కట్ చేసి కళ్లపై పెట్టుకోవాలి. 10 నుంచి 15 నిమిషాల పాటు కళ్ళు మూసుకుని విశ్రాంతి తీసుకోవాలి.

 ఇది కూడా చదవండి: పిల్లల మెడలు ఇంకా వంగి ఉంటే..ఈ వ్యాధితో బాధపడుతున్నట్టే!

దోసకాయను శుభ్రంగా కడిగి మాత్రమే కళ్లపై ఉంచుకోవాలి. ఒకవేళ మీకు ఏదైనా అలెర్జీ, చర్మం దురద వంటి సమస్యలు ఉంటే.. ముందుగా ప్యాచ్ టెస్ట్ చేసుకోవడం మంచిది. దోసకాయ కేవలం అలసట, వాపులకు మాత్రమే సహాయపడుతుంది. కంటికి సంబంధించిన తీవ్రమైన వ్యాధుల విషయంలో దీనిని ఉపయోగించకూడదు. దోసకాయ కళ్ళకు ఉపశమనం కలిగించే ఒక సహజమైన, సులభమైన మార్గం. దీనిని కంటికి సంబంధించిన మందుగా భావించడం సరికాదు. కళ్లలో నిరంతరంగా మంట, వాపు, నొప్పి ఉంటే వెంటనే వైద్యుడిని సంప్రదించాలని నిపుణులు చెబుతున్నారు.

గమనిక: ఈ కథనం ఇంటర్నెట్‌లో అందుబాటులో ఉన్న సమాచారం ఆధారంగా మాత్రమే ఇచ్చినది. RTV దీనిని ధృవీకరించడం లేదు. ఆరోగ్య సమస్యల నివారణకు సంబంధిత వైద్య నిపుణుడిని సంప్రదించడం ఉత్తమం.

ఇది కూడా చదవండి: కుంగుబాటుకు దారితీసే కన్నీటి విషం