USA: కొంప ముంచిన కాల్పులు..గ్రీన్ కార్డ్ హోల్డర్లపై ఫోకస్

వైట్ హౌస్ దగ్గరలో జరిపిన కాల్పులతో అమెరికా మొత్తం ఒక్కసారి ఉలిక్కిపడింది. ఆ దేశంలో గన్ కల్చర్ కామన్, కాల్పులు తరుచూ జరుగుతుంటాయి. కానీ వైట్ హౌస్ దగ్గరలోనేజరిగేసరికి మొత్తం ఫోకస్ వచ్చేసింది. దీంతో అధ్యక్షుడు ట్రంప్ గ్రీన్ కార్డ్ హోల్డర్స్ ను లక్ష్యంగా చేసుకున్నారని చెబుతున్నారు. వారందరినీ మరోసారి పరీక్షించాలని ప్రకటించారు. ఈ క్రమంలో అఫ్గాన్‌తో సహా మరో 18 దేశాలకు చెందిన గ్రీన్‌ కార్డ్‌ హోల్డర్స్‌ను సమీక్షించనున్నట్లు యూఎస్‌ సిటిజన్‌షిప్‌, ఇమిగ్రేషన్‌ సర్వీసెస్‌ డైరెక్టర్‌ జోసెఫ్‌ ఎడ్లో తెలిపారు. దీని కంటే ముందే ట్రంప్ పదవి తీసుకున్న వెంటనే 12 దేశాలపై నిషేధాన్ని విధించారు. అందులో అఫ్గానిస్థాన్‌, ఇరాన్‌, యెమెన్‌, మయన్మార్‌, చాద్‌, కాంగో, ఈక్వెటోరియల్‌ గినియా, ఎరిట్రియా, హైతీ, లిబియా, సోమాలియా, సూడాన్‌ దేశాలు ఉన్నాయి. మరో ఏడు దేశాలపై కూడా పాక్షికంగా నిషేధం విధించారు.

ఇంటర్వ్యూకు పిలిచి అరెస్ట్..

తాజాగా గ్రీన్ కార్డుల విషయంలో మరో విషయం కూడా బయటపడింది. గ్రీన్ కార్డ్ ఇంటర్వ్యూలని పిలిచి..వచ్చిన వారిని భద్రతాధికారులు అరెస్ట్ చేస్తున్నారని తెలుస్తోంది. శాన్‌డియాగోలోని యూఎస్‌ సిటిజన్‌షిప్‌, ఇమిగ్రేషన్‌ సర్వీసెస్‌(USCIS) కార్యాలయంలో గ్రీన్‌ కార్డు ఇంటర్వ్యూ కోసం వచ్చిన ఓ వ్యక్తితో పాటు వారి అమెరికన్‌ భాగస్వామిని కూడా అదుపులోకి తీసుకున్నట్లు కథనాలు వెలువడ్డాయి. దీంతో అంతకు ముందు జరిగిన అరెస్ట్ గురించి కూడా వెలుగులోకి వచ్చింది. వీసా గడువు ముగిసినా కూడా ఇంకా దేశంలోనే ఉన్న వారినే లక్ష్యంగా చేసుకుని ఈ అరెస్ట్ లను చేస్తున్నారని చెబుతున్నారు. దీని కంటే ముందు ఐదుగురు క్లయింట్లను అదుపులోకి తీసుకున్నట్టలు చెప్పారు. అయితే వీరందరికీ ఎలాంటి నేర చరిత్రా లేదని..గతంలోను ఎలాంటి అరెస్టులు జరగలేదని స్పష్టంచేశారు. వీసా గడువు ముగిసిన తర్వాత కూడా వారు ఇంకా దేశంలోనే ఉన్నారనే కారణంతో ఈ అరెస్టులు చేశారన్నారు. పైగా వీరంతా యూఎస్ పౌరులను పెళ్ళి చేసుకున్నవారు కూడాను.

కాల్పులు చేసిన నిందితుడు అఫ్గానిస్థాన్‌(afghanistan)కు చెందిన రెహ్మనుల్లా లఖన్‌వాల్‌ అని లా ఎన్‌ఫోర్స్‌మెంట్ అధికారులు వెల్లడించారు. 2021లో అఫ్గానిస్థానీయులకు ఇచ్చిన స్పెషల్ వీసాపై అమెరికాకు వచ్చినట్లు పేర్కొన్నారు. కాల్పుల్లో నిందితుడికి గాయాలు కావడంతో అతడిని ఆస్పత్రికి తరలించామని.. అయితే అతడు ఒక్కడే ఈ దాడికి పాల్పడ్డట్లు దర్యాప్తు అధికారులు చెబుతున్నారు.  

వైట్‌హౌస్‌ సమీపంలో కాల్పులు జరడంతో యూఎస్‌ సిటిజన్‌షిప్‌ అండ్‌ ఇమిగ్రేషన్‌ సర్వీసెస్‌ (USCIS) సంచలన నిర్ణయం తీసుకుంది. అఫ్గానిస్థాన్ ఇమిగ్రేషన్ దరఖాస్తులు వెంటనే నిలిపివేస్తున్నట్లు ప్రకటన చేసింది. ఇది తక్షణమే అమల్లోకి వస్తుందని పేర్కొంది. అమెరికన్ల భద్రతే తమకు ముఖ్యమని స్పష్టం చేసింది. ఈ కాల్పుల్లో ఇద్దరు నేషనల్ గార్డులు కూడా మృతి చెందినట్లు వెస్ట్ వర్జీనియా గవర్నర్‌ చెప్పారు. కానీ వాళ్లు చనిపోలేదని తీవ్రంగా గాయాలపాలయ్యారని డైరెక్టర్ కాష్‌ పటేల్‌ అన్నారు.