Telangana: రాగల రెండు రోజులు వడగాల్పులు.. బయటకు రావొద్దని హెచ్చరిక

Heat Wave in Telangana: తెలంగాణలో రాగల రెండురోజుల పాటు వడగాలులు వీచే అవకాశం ఉందని.. వాతావరణ శాఖ (IMD) హెచ్చరికలు జారీ చేసింది. ఎండలు కూడా రెండు, మూడు డిగ్రీలు పెరిగే అవకాశం ఉందని పేర్కొంది. ఇప్పటికే రాష్ట్రంలో ఉష్ణోగ్రతలు 43 డిగ్రీలకు పైగా నమోగవుతున్నాయని తెలిపింది. ఉదయం 11 గంటల నుంచి సాయంత్రం 4.30 వరకు ప్రజలు ఇళ్ల నుంచి బయటకు రావద్దని హెచ్చరిస్తోంది. ఒకవేళ అత్యవసర పరిస్థితుల్లో బయటకు వెళ్లాల్సి వస్తే.. జాగ్రత్తలు తీసుకోవాలని సూచించింది. ఎల్లుండి తర్వాత ఉష్ణోగ్రతలు కొంత తగ్గుముఖం పట్టే అవకాశం ఉందని వెల్లడించింది.

Also Read: ఎమ్మెల్సీ కవితకు ఊహించని ట్విస్ట్

శనివారం.. నాగర్‌ కర్నూల్‌, వనపర్తి, నారాయణపేట, జోగులాంబ, ఖమ్మం, నల్గొండ, సూర్యాపేట, ఆదిలాబాద్‌, ఆసిఫాబాద్‌,మహబూబ్‌నగర్‌, నిర్మల్‌, కొత్తగూడెం జిల్లాల్లో వడగాలులు వీస్తాయని వాతావరణ శాఖ తెలిపింది. ఇక ఆదివారం నల్గొండ, సూర్యాపేట, మహబూబ్‌నగర్‌, నాగర్‌ కర్నూల్‌, వనపర్తి, నారాయణపేట, ఖమ్మం, జోగులాంబ జిల్లాల్లో వడగాలులు వీస్తాయని పేర్కొంది. దీంతో ఈ జిల్లాలకు ఎల్లో అలెర్ట్‌ను (Yellow Alert) జారీ చేసింది. అలాగే ఆదివారం నిర్మల్‌, నిజామాబాద్‌, ఆదిలాబాద్‌, ఆసిఫాబాద్‌, మంచిర్యాల జిల్లాల్లో ఉరుములు, మెరుపులు, ఈదురుగాలులతో కూడిన వర్షం కురిసే అవకాశం ఉందని వెల్లడించింది.

ఇక యాదాద్రి భువనగిరి, రంగారెడ్డి, హైదరాబాద్‌, మేడ్చల్‌ మల్కాజ్‌గిరి ,పెద్దపల్లి, సిద్దిపేట, రాజన్న సిరిసిల్ల, కరీంనగర్‌ జిల్లాల్లో అక్కడక్కడ వేడి, తేమతో కూడిన పరిస్థితులు ఏర్పడే అవకాశం ఉందని పేర్కొంది. ఏప్రిల్ 9న ఉమ్మడి ఆదిలాబాద్, నిజామాబాద్ జిల్లాల్లో అక్కడక్కడ వర్షాలు కురిసే అవకాశం ఉందని చెబుతూ ఎల్లో అలెర్ట్‌ను జారీ చేసింది.

Also Read: అమెరికాలో మిస్సైన హైదరాబాద్ యువకుడు.. నెల రోజులుగా కనిపించని ఆచూకి