Vijay Devarakonda: ఆట ఇప్పుడే మొదలైంది.. విజయ్ నట విశ్వరూపం చూస్తారు: రాహుల్‌ సాంక్రిత్యాన్‌

Vijay Devarakonda: హిట్ సినిమాల దర్శకుడు రాహుల్‌ సాంక్రిత్యాన్‌(Rahul Sankrityan) మరోసారి విజయ్ దేవరకొండతో కలిసి పని చేస్తున్నారు. వీరి కాంబినేషన్‌లో వచ్చిన మొదటి సినిమా "టాక్సీవాలా" థియేటర్లలో విజయం సాధించింది, అప్పట్లో విడుదలకు ముందే పైరసీకి గురైనా మంచి కలెక్షన్లను రాబట్టింది. ఆ తర్వాత రాహుల్, నాని నటించిన "శ్యామ్ సింగరాయ్" సినిమాతో తన దర్శకత్వ ప్రతిభను మళ్లీ నిరూపించుకున్నారు.

ఇప్పుడు రాహుల్ - విజయ్ కాంబోలో ఓ పీరియాడిక్ యాక్షన్ డ్రామా రూపొందుతోంది. ఈ సినిమా బ్యాక్‌డ్రాప్ రాయలసీమ నేపథ్యంలో సాగనుంది. ఇటీవల జరిగిన "డూడ్" ప్రమోషన్ ఈవెంట్‌లో మాట్లాడిన రాహుల్, ఈ సినిమాలో విజయ్ దేవరకొండ తన విశ్వరూపంను చూపించనున్నారని, ఆయనలో ఉన్న అసలైన నటుడిని ప్రజలు చూస్తారని చెప్పారు.

ఈ వ్యాఖ్యలు సోషల్ మీడియాలో వైరల్‌గా మారాయి. "విజయ్ దేవరకొండలోని అసలు టాలెంట్ ఇప్పటి వరకు పూర్తిగా కనిపించలేదా?" అనే ఆసక్తికరమైన చర్చ నడుస్తోంది. దర్శకుడు చేసిన కామెంట్ వల్ల ఈ సినిమాలో ఏం ప్రత్యేకత ఉండబోతోందో తెలుసుకోవాలని నెటిజన్లు ఎదురు చూస్తున్నారు.

ఈ చిత్రాన్ని మైత్రీ మూవీ మేకర్స్ నిర్మిస్తుండగా, బాలీవుడ్ పెద్ద నిర్మాణ సంస్థ టీ-సిరీస్ (Bhushan Kumar) దీనిని ప్రెజెంట్ చేయనున్నారు. దీనివల్ల ఈ సినిమా దేశవ్యాప్తంగా భారీ ప్రాజెక్ట్ అవుతుందని భావిస్తున్నారు.

ప్రస్తుతం ఈ ప్రాజెక్ట్ ప్రీ-ప్రొడక్షన్ దశలో ఉంది. త్వరలో రెగ్యులర్ షూటింగ్ మొదలు కానుంది. విజయ్ దేవరకొండ గత సినిమాల కన్నా ఈ సినిమాలో పూర్తిగా కొత్తగా కనిపించనున్నారని దర్శకుడు హింట్ ఇచ్చారు. రాయలసీమ నేపథ్యంలో, భారీ స్థాయిలో తెరకెక్కనున్న ఈ సినిమా కోసం ప్రేక్షకులు, ఫ్యాన్స్ ఆతృతగా ఎదురు చూస్తున్నారు.