CM Revanth Reddy: సీఎం రేవంత్ రెడ్డి సినీ కార్మికులతో కీలక భేటీ..

CM Revanth Reddy: తెలంగాణ రాష్ట్ర ముఖ్యమంత్రి శ్రీ రేవంత్ రెడ్డి తాజాగా తెలుగు ఫిల్మ్ ఇండస్ట్రీ ఎంప్లాయిస్ ఫెడరేషన్ ప్రతినిధులతో(Film Workers) ప్రత్యేకంగా సమావేశమయ్యారు. ఈ సమావేశంలో సినీ కార్మికుల సంక్షేమం, పరిశ్రమ అభివృద్ధిపై ముఖ్యంగా చర్చ జరిగింది.

సినిమా కార్మికుల వృత్తిపరమైన భద్రత, శిక్షణ, ఆరోగ్య భీమా వంటి అంశాలపై ముఖ్యమంత్రి వారు స్వయంగా ఆరా తీశారు. ఈ సమావేశానికి తెలంగాణ ఫిల్మ్ డెవలప్‌మెంట్ కార్పొరేషన్ ఛైర్మన్ దిల్ రాజు, తెలుగు ఫిల్మ్ ఫెడరేషన్ అధ్యక్షుడు వల్లభనేని అనిల్, కార్యదర్శి అమ్మిరాజు కానుమిల్లి, ఇతర సంఘాల ప్రతినిధులు హాజరయ్యారు.

హైదరాబాద్‌ను హాలీవుడ్ తరహాలో తీర్చిదిద్దే లక్ష్యం

ఈ సందర్భంగా సీఎం రేవంత్ రెడ్డి మాట్లాడుతూ, హైదరాబాద్‌ను హాలీవుడ్‌ తరహాలో గొప్ప ఫిలిం హబ్‌గా అభివృద్ధి చేయాలన్నదే ప్రభుత్వ దృష్టి అని తెలిపారు. అందుకోసం సినీ కార్మికులు ఎదుర్కొంటున్న సమస్యలను ప్రభుత్వం వరకు చేరవేయాలని సూచించారు. వారికి అవసరమైన మద్దతు అందించేందుకు రాష్ట్ర ప్రభుత్వం సిద్ధంగా ఉందని హామీ ఇచ్చారు.

సినిమా రంగంలో సమ్మెలు, వాదనలు పరిశ్రమను దెబ్బతీస్తాయని, కార్మికులు, నిర్మాతలు ఇద్దరికీ నష్టమేనని సీఎం హెచ్చరించారు. అందువల్ల సమస్యలను చర్చల ద్వారా పరిష్కరించుకోవాలని సూచించారు. సమస్యల పరిష్కారానికి ప్రభుత్వం సానుకూలంగా స్పందించి అవసరమైన చర్యలు తీసుకుంటుందని హామీ ఇచ్చారు.

Also Read: Sootravakyam: ఓటీటీలో రికార్డులు దుల్లగొడుతున్న మలయాళ మూవీ.. ఆలస్యమెందుకు ఈ థ్రిల్లర్ మూవీ చూసేయండి!

స్కిల్స్ యూనివర్సిటీ ద్వారా శిక్షణ

సినీ రంగంలోని ఉద్యోగులు ప్రొఫెషనల్ గా మరింత అభివృద్ధి చెందాలంటే సాంకేతిక పరిజ్ఞానం, శిక్షణ అవసరం. దీన్ని దృష్టిలో పెట్టుకుని, ప్రభుత్వం ఏర్పాటు చేసిన స్కిల్స్ యూనివర్సిటీ ద్వారా ప్రత్యేక శిక్షణా కార్యక్రమాలను అమలు చేయనున్నట్లు తెలిపారు. ఇందులో ప్రతి ఒక్క సినీ కార్మికుడు పాల్గొనాలని ఆయన కోరారు.

చిన్న సినిమాలకు ప్రోత్సాహం.. 

తెలంగాణలో అన్ని భాషల సినిమాల షూటింగ్‌కు ప్రోత్సాహం అందించాలని, ముఖ్యంగా చిన్న సినిమాలకు ప్రభుత్వం మద్దతుగా నిలుస్తుందని ముఖ్యమంత్రి పేర్కొన్నారు. చిన్న, మధ్య తరహా నిర్మాతలు ముందుకు వచ్చి తెలంగాణలో షూటింగ్ చేయాలన్నదే ప్రభుత్వ ఉద్దేశం అని వెల్లడించారు.

గద్దర్ అవార్డుల పునరుద్ధరణ.. 

సీఎం రేవంత్ రెడ్డి ప్రభుత్వం కళాకారుల గౌరవార్థం కొన్ని కీలక కార్యక్రమాలు తీసుకువచ్చింది. గతంలో నిలిచిపోయిన ‘గద్దర్ అవార్డులు’ మళ్లీ ప్రారంభించబోతున్నట్లు చెప్పారు. ఇది తాత్కాలిక చర్య కాదు, ప్రభుత్వ సంకల్పాన్ని చాటే చర్య అని ఆయన చెప్పారు.

ఆరోగ్య భీమా

సినీ కార్మికులకు ఆరోగ్య భీమా అందించాలనే పథకంపై కూడా సీఎం దృష్టి సారించారు. ప్రతి ఒక్క కార్మికుడికి ఆరోగ్య పరంగా సాయం చేయాలన్నదే ప్రభుత్వ ధ్యేయం అని చెప్పారు. దీనికి సంబంధించిన విధివిధానాలు త్వరలో ప్రకటించనున్నట్లు వెల్లడించారు.

తెలంగాణలో సినిమా పరిశ్రమ అభివృద్ధి చెందేందుకు అవసరమైన అన్ని మౌలిక వసతులు, సహకారం అందిస్తామని సీఎం రేవంత్ రెడ్డి హామీ ఇచ్చారు. పరిశ్రమతో పాటు కార్మికుల సంక్షేమం కూడా సమానంగా ముఖ్యం అనే దృక్పథంతో ప్రభుత్వం ముందుకు సాగుతోందని స్పష్టం చేశారు.