Visakhapatnam: విశాఖలో సంచలనం..పుట్టిన బిడ్డను ముక్కలుగా నరికి కల్వర్టులో..

Visakhapatnam: సమాజంలో మానవత్వం రోజురోజుకు మంటగలుస్తోంది. కుటుంబాల్లో నెలకొన్న విభేదాల నేపథ్యంలో సొంతవాళ్లనే చంపుకుంటున్నారు. పిల్లలు, ఆడవారు, వృద్దులు అనే తేడా లేకుండా ఒకరిని ఒకరు చంపుకుంటున్నారు. ఆస్తి, డబ్బు కోసం ఎంత దూరమైనా వెళ్లిపోతున్నారు. విచక్షణ మరచి హత్యలకు పాల్పడుతున్నారు. కొన్ని సమయాల్లో పెద్ద వారిని ఏం చేయలేక పసివారిపట్ల తమ రాక్షసత్వాన్ని ప్రదర్శిస్తున్నారు.  అలాంటిదే విశాఖలో ఘోరం వెలుగు చూసింది. ఓ చిన్నారిని గుర్తు తెలియని వ్యక్తులు  హత్య చేసిన తీరు ఒళ్లు గగుర్పొడిచేలా చేస్తోంది 

 విశాఖ నగరం కంచరపాలెం  పోలీస్ స్టేషన్ పరిధిలో ఒక సంచలన ఘటన చోటుచేసుకుంది, తాడిచెట్లపాలెం నుంచి కంచరపాలెం సర్వీస్ రోడ్డు వెళ్లే మార్గంలో, సంజీవయ్య కాలనీ -1 నివాసితులు మధ్యలో ఉన్నటువంటి కాలువలో ఓ చిన్నారి శరీర భాగాలు దర్శన మిచ్చాయి. కొందరు గుర్తు తెలియని వ్యక్తులు చిన్నారిని హత్య చేయడంతో పాటు శరీర భాగాలను వేరు చేశారు. అనంతరం ఆ భాగాలను  కల్వర్టులో పడేశారు.

కల్వర్టులో చిన్నారి శరీర విడి భాగాలు పడేసి వెళ్లడంతో ఉదయం అటుగా వెళ్లిన స్థానికులు.. కల్వర్టులో చిన్నారికి సంబంధించిన కాళ్లు, చేతులు కనిపించడంతో భయాందోళనకు గురయ్యారు. చిన్నారి శరీర భాగాలను నరికి పడేసినట్లుగా పోలీసులకు సమాచారం అందించారు.ఈ సంఘటన తెలుసుకుని వెంటనే కంచరపాలెం పోలీసులు అక్కడ చేరుకొని పూర్తి దర్యాప్తు ప్రారంభించారు