Terrorist : ధర్మవరంలో ఉగ్రవాదుల కలకలం..  20సిమ్ కార్డులు లభ్యం..  టెర్రరిస్ట్ అరెస్ట్!

శ్రీ సత్యసాయి జిల్లాలోని  ధర్మవరంలో ఉగ్రవాదుల కదలికలు కలకలం రేపాయి. ధర్మవరం కోట కాలనీలో నూర్ అనే వ్యక్తిని NIA అధికారులు అరెస్టు చేశారు. ఉగ్రవాదులతో నూర్ సంబంధాలపై అధికారులు ఆరా తీస్తున్నారు. నూర్ నివాసంలో దాదాపు 20 సిమ్ కార్డులతో పాటు కీలక ఆధారాలు సేకరించారు అధికారులు. నూర్ సోషల్‌మీడియా అకౌంట్లపై NIA నజర్ పెట్టింది. స్థానికంగా ఓ హోటల్‌లో కుక్‌గా పని చేస్తున్నాడు నూర్. అసలు ఈ 20 సిమ్ కార్డులతో అతను ఎవరెవరకి ఫోన్ చేశాడనేదానినపై అధికారులు ఆరా తీస్తున్నారు.  ఎన్ఐఏ అధికారులు అతని కదలికలపై నిఘా ఉంచారు. అతడు ఉగ్రవాదులతో వాట్సాప్ కాల్స్‌లో మాట్లాడినట్లు అనుమానిస్తున్నారు. ఈ సమాచారం ఆధారంగా, అధికారులు నూర్‌ను అదుపులోకి తీసుకుని విచారణ జరుపుతున్నారు. ఈ సంఘటన ధర్మవరం ప్రాంతంలో భయాందోళనలకు దారితీసింది. ఎన్ఐఏ బృందం దర్యాప్తును అత్యంత గోప్యంగా కొనసాగిస్తోంది. ఈ సంఘటన శ్రీ సత్యసాయి జిల్లాలో ఉగ్రవాద సంబంధాలపై మొదటిసారిగా నమోదైన కేసుల్లో ఒకటి. ఈ కేసులో మరింత సమాచారం ఇంకా తెలియాల్సి ఉంది.

మాడ్యూల్‌ కూల్చివేత 

మరోవైపు పంజాబ్ పోలీసులు, కేంద్ర ఇంటెలిజెన్స్ ఏజెన్సీలు సంయుక్తంగా ఒక ఆపరేషన్ నిర్వహించి, పాకిస్తాన్‌కు చెందిన బబ్బర్ ఖల్సా ఇంటర్నేషనల్ (BKI) ఉగ్రవాద సంస్థకు చెందిన ఒక మాడ్యూల్‌ను కూల్చివేశాయి. ఈ ఆపరేషన్‌లో ఐదుగురు అనుమానితులను అరెస్టు చేశారు. ఇందులో ముగ్గురు మైనర్లు ఉన్నారు. వీరు రాజస్థాన్‌లోని టోంక్, జైపూర్ జిల్లాల నుంచి అదుపులోకి తీసుకున్నారు.  అదుపులోకి తీసుకున్న వారి నుంచి ఒక హ్యాండ్ గ్రెనేడ్, 0.30 క్యాలిబర్ పిస్టల్ మరియు మందుగుండు సామాగ్రిని స్వాధీనం చేసుకున్నారు. వీరు స్వాతంత్ర్య దినోత్సవం సందర్భంగా పంజాబ్‌లో దాడులకు ప్లాన్ చేశారని పోలీసులు తెలిపారు. ఈ ఉగ్రవాద మాడ్యూల్ పాకిస్తాన్‌కు చెందిన BKI ఆపరేటివ్ హర్విందర్ సింగ్ రిండా ఆదేశాలతో పనిచేస్తున్నట్లు దర్యాప్తులో తేలింది. వీరికి బ్రిటన్, అమెరికా మరియు యూరోప్‌లోని హ్యాండ్లర్ల నుంచి కూడా ఆదేశాలు వస్తున్నట్లు పోలీసులు తెలిపారు. దీనితో పాటు, ఫిరోజ్‌పూర్ జిల్లాలో కూడా పోలీసులు మరో ఇద్దరు BKI ఆపరేటివ్‌లను అరెస్టు చేశారు. వీరి నుంచి రెండు హ్యాండ్ గ్రెనేడ్లు మరియు ఒక 9mm పిస్టల్ స్వాధీనం చేసుకున్నారు. ప్రభుత్వ భవనాలు మరియు పోలీస్ స్టేషన్‌లపై దాడులు చేయాలని వీరు కుట్ర పన్నినట్లు అధికారులు తెలిపారు.