Follow Us
పాలకుర్తి నియోజకవర్గం అభివృద్ధి విషయంలో తనకో విజన్ ఉందని ఎమ్మెల్యే యశస్విని రెడ్డి అన్నారు. ఎవరు ఎన్ని విమర్శలు చేసిన అనుకున్న టైమ్ లోపు అన్ని పనులు జరుగుతాయని తేల్చి చెప్పారు. బుధవారం ఎమ్మెల్యే క్యాంపు ఆఫీసులో ఆమె మీడియాతో మాట్లాడారు. అమ్మాయి చిన్నగా ఉంది.. సాఫ్ట్ గా ఉందని అనుకుంటే అది మీ తప్పే అని అన్నారు. ఇంకోసారి అత్తాకోడళ్ళు అని ఇష్టమోచ్చినట్లు మాట్లాడితే మర్యాదగా ఉండదని.. మీకు అంతా ఇంట్రెస్ట్ ఉంటే అత్తా-కోడళ్ళ సినిమా, సీరియల్ తాను చూపిస్తానని హెచ్చరించారు. మాజీ మంత్రి ఎర్రబెల్లి దయాకర్ రావు వయస్సుతో పాటు హుందాతనాన్ని కాపాడుకోవాలని ఎమ్మెల్యే యశస్విని రెడ్డి చెప్పారు. ఏదీ పడితే మాట్లాడితే బాగుండదన్నారు. కాంగ్రెస్ సత్తా ఏంటో లోకల్ బాడీ ఎన్నికల్లో చూపిస్తామని అన్నారు. ఇప్పుడే కాదు తెలంగాణలో మరోసారి రాబోయేది కూడా కాంగ్రెస్ సర్కారే అంటూ ధీమా వ్యక్తం చేశారు. ఏడాది పాలనకే ఇంత ఫ్రస్టేషన్ కు లోనైతే మళ్లీ కాంగ్రెస్ అధికారంలోకి వస్తే ఏం అయిపోతారో.. ఆరోగ్యాలు చూసుకోవాలంటూ మాస్ వార్ని్ంగ్ ఇచ్చారు.
ఎర్రబెల్లి బస్తిమే సవాల్
అంతకుముందు రేవంత్ సర్కార్‌ పై మాజీ మంత్రి ఎర్రబెల్లి దయాకర్ రావు సంచలన కామెంట్స్ చేశారు. మంత్రి వర్గ విస్తరణ పూర్తి కాగానే ప్రభుత్వం కుప్పకూలిపోతుందని అన్నారు. మంగళవారం ఉమ్మడి వరంగల్ జిల్లాలోని తొర్రూరులో బీఆర్ఎస్ పార్టీ సన్నాహాక సమావేశం జరిగింది. ఈ సమావేశంలో ఎర్రబెల్లి దయాకర్ రావు చీఫ్ గెస్టుగా పాల్గొని మాట్లాడారు. స్థానిక సంస్థల ఎన్నికలు పెట్టేందుకు ప్రభుత్వం భయపడుతుందని అన్నారు. రాసిపెట్టుకోండి.. స్థానిక సంస్థల్లో వార్ వన్ సైడ్.. ఎప్పుడు ఎన్నికలు పెట్టిన సరే.. బీఆర్ఎస్ సత్తా చాటడం ఖాయమని ఎర్రబెల్లి అన్నారు. సర్వేలన్ని కాంగ్రెస్ కు వ్యతిరేకంగా ఉన్నాయన్న ఎర్రబెల్లి.. ఎన్నికలు పెట్టి చూడండి .. తమ సత్తా ఏంటో చూపిస్తామని అన్నారు. తాను చెప్పింది నిజం కాకపోతే రాజకీయాల నుంచి తప్పుకుంటానని ఎర్రబెల్లి సవాల్ విసిరారు. మొత్తం రాష్ట్రంలో 119 అసెంబ్లీ స్థానాలు ఉంటే.. అందులో కేవలం 10 నియోజకవర్గాల్లో మాత్రమే కాంగ్రెస్ పార్టీకి ఫేవర్‌గా ఉందని.. మిగతా చోట్ల బీఆర్ఎస్ పార్టీ గెలుస్తోందని జోస్యం చెప్పారు. స్థానిక సంస్థల ఎన్నికల నిర్వహిస్తే కాంగ్రెస్ పార్టీ నిజ స్వరూపం బయటపడుతోందని ఎర్రబెల్లి స్పష్టం చేశారు.
