BREAKING: మార్చి 16 నుంచి అసెంబ్లీ బడ్జెట్ సమావేశాలు.. 20న రాష్ట్ర బడ్జెట్!

తెలంగాణ CM అధ్యక్షతన సోమవారం జరిగిన మంత్రివర్గ సమావేశంలో సర్కార్ కీలక నిర్ణయాలు తీసుకుంది. రాష్ట్రానికి సంబంధించిన పలు కీలక అంశాలపై చర్చించి కేబినెట్ ఆమోదం తెలిపింది. ఈ సమావేశంలో ముఖ్యంగా అసెంబ్లీ సమావేశాల నిర్వహణ, మెట్రో రైలు భవిష్యత్తు, విద్యా, వైద్య రంగాలపై ఫోకస్ పెట్టారు.

అసెంబ్లీ సమావేశాల షెడ్యూల్

రాష్ట్ర శాసనసభ బడ్జెట్ సమావేశాలను మార్చి 16 నుండి 30వ తేదీ వరకు నిర్వహించాలని కేబినెట్ నిర్ణయించింది. మార్చి 16న గవర్నర్ ప్రసంగంతో ప్రారంభమయ్యే ఈ సమావేశాల్లో, మార్చి 20వ తేదీన రాష్ట్ర ప్రభుత్వం వార్షిక బడ్జెట్‌ను ప్రవేశపెట్టనుంది.

హైదరాబాద్ మెట్రోపై కీలక నిర్ణయం

ప్రస్తుతం ఎల్&టీ (L&T) సంస్థ ఆధ్వర్యంలో ఉన్న హైదరాబాద్ మెట్రో ప్రాజెక్టును ప్రభుత్వం పూర్తిగా తన స్వాధీనంలోకి తీసుకోవాలని నిర్ణయించింది. దీనివల్ల నిర్వహణ, విస్తరణ పనులు మరింత వేగవంతం అయ్యే అవకాశం ఉంది.

వైద్య మరియు విద్యా రంగాలు:

వైద్య ఆరోగ్య శాఖలో పరిపాలనను మరింత బలోపేతం చేసేందుకు 'తెలంగాణ వైద్య విధాన పరిషత్' పేరును 'డైరెక్టరేట్ ఆఫ్ సెకండరీ హెల్త్'గా మారుస్తూ నిర్ణయం తీసుకున్నారు. ఇందులో పనిచేస్తున్న ఉద్యోగులను కూడా ప్రభుత్వ పరిధిలోకి తీసుకువచ్చారు. విద్యా రంగానికి సంబంధించి గుమ్మడూరులో జేఎన్‌టీయూ (JNTU) కాలేజీ ఏర్పాటు కోసం 70 ఎకరాల భూమిని కేటాయించారు. ఆధ్యాత్మిక రంగానికి పెద్దపీట వేస్తూ ఖమ్మంలో తిరుమల తిరుపతి దేవస్థానం (TTD) నిర్మాణానికి 20 ఎకరాల భూమిని కేటాయించడంతో పాటు, జిల్లాల్లో కాంగ్రెస్ పార్టీ కార్యాలయాల నిర్మాణానికి అవసరమైన స్థలాల కేటాయింపులకు కూడా కేబినెట్ గ్రీన్ సిగ్నల్ ఇచ్చింది.