పట్టుదలే ఆయన్ను గెలిపించింది:
ప్రతీ ఒక్కరికి జీవిత లక్ష్యం ఉంటుంది. కలలు ఉంటాయి.. అయితే సాధించాలన్న పట్టుదల, సంకల్పం మాత్రం కొద్ది మందిలోనే ఉంటుంది. 1969 నవంబరు 8న పుట్టారు రేవంత్‌రెడ్డి. ఉమ్మడి మహబూబ్‌నగర్‌ జిల్లా కల్వకుర్తి దగ్గరలోని కొండారెడ్డిపల్లిలో అనుముల నర్సింహారెడ్డి, రామచంద్రమ్మ దంపతులకు జన్మించిన రేవంత్‌రెడ్డిది సాధారణ రైతు కుటంబం. ఏవీ కాలేజీలో డిగ్రీ చదువుతున్న సమయంలో ఏబీపీవీకి పనిచేశారు రేవంత్‌. డిగ్రీ తర్వాత కాంగ్రెస్‌ నేత జైపాల్‌రెడ్డి తమ్ముడి కుమార్తె గీతారెడ్డిని ప్రేమించి పెళ్లి చేసుకున్నారు. రియల్‌ఎస్టేట్‌ వ్యాపారంతో పాటు జూబ్లీహిల్స్‌ కో-ఆపరేటివ్‌ హౌసింగ్‌ సొసైటీ డైరెక్టర్‌గా పని చేసిన రేవంత్‌ తర్వాత రాజకీయాలవైపు అడుగులు వేశారు.

2002లో టీఆర్‌ఎస్‌(బీఆర్‌ఎస్‌)లో చేరిన రేవంత్‌రెడ్డి ఆ తర్వాత కల్వకుర్తి టికెట్ ఆశించారు. అయితే టికెట్ దక్కలేదు.. అయినా ఆయన వెనక్కి తగ్గలేదు. తానెంటో నిరూపించుకోవాలనుకున్నారు. ముందు జడ్పీటీసీ సభ్యుడిగా గెలవాలని నిర్ణయించుకున్నారు. స్వతంత్ర అభ్యర్థిగా బరిలోకి దిగాలని డిసైడ్ అయిన రేవంత్‌ కాంగ్రెస్‌ మినహా ఇతర పార్టీల మద్దతు కూడగట్టారు. నాడు కాంగ్రెస్‌ అధికారంలో ఉంది. వైఎస్‌ గాలి రాష్ట్రవ్యాప్తంగా వీస్తోంది. నాటి బలమైన కాంగ్రెస్‌ అభ్యర్థిని ఢీకొట్టి గెలవడం రేవంత్‌లోని పట్టుదలనకు నిదర్శనం. అక్కడ నుంచి మొదలైన అసలుసిసలైన రేవంత్‌రెడ్డి రాజకీయ ప్రస్థానం ఒక్కొ మెట్టు ఎక్కుతూ.. మధ్యలో కిందపడుతూ, పైకి లేస్తూ అందరి మనసులను కొల్లగొట్టే వరకు చేరింది.

నేను సీఎం అవుతా:
జడ్పీటీసీ సభ్యునిగా గెలిచిన తర్వాత ఏడాదికి అంటే 2007లో స్థానిక సంస్థల కోటాలో మహబూబ్‌నగర్‌ శాసనమండలి ఎన్నికల్లో పోటీ చేసి గెలిచారు. ఎమ్మెల్సీగా శాసనమండలిలో అడుగుపెట్టారు. 2008లో నాడు ప్రతిపక్షంలో ఉన్న టీడీపీలో చేరారు. కాంగ్రెస్‌ వేవ్‌ బలంగా ఉన్న సమయంలోనూ ప్రతిపక్ష పార్టీలో సాధారణ లీడర్‌గా అడుగుపెట్టిన రేవంత్‌ తన జీవిత లక్ష్యాలు ఎంత పెద్దవో, ఎలాంటివో నాడు ప్రొఫెసర్ నాగేశ్వర్‌కు చెప్పారు. తనతో పాటే ఎమ్మెల్సీగా, తన బెంచ్‌లో ఉన్న ప్రొఫెసర్ నాగేశ్వర్‌తో ఏదో ఒక రోజు తాను సీఎం అవుతానని ఆనాడే రేవంత్‌ చెప్పారంటే ఆయన విజన్‌ ఎలాంటిదో అర్థం చేసుకోవచ్చు. టీడీపీ అంటే చంద్రబాబు, చంద్రబాబు అంటే టీడీపీ అని ప్రజలు భావించే రోజులవి. ఎన్టీఆర్‌ తర్వాత టీడీపీ అంటే ప్రజలు చంద్రబాబే అంటారు. అప్పటికీ ఏపీ వీడిపోలేదు.. తెలంగాణ ఆవిర్భవించలేదు.. అయినా రేవంత్‌ ‘నేను ఏదో ఒక రోజు సీఎం అవుతా’ అని చెప్పడం మేధవుల్లో ప్రముఖలైన ప్రొఫెసర్‌ నాగేశ్వర్‌ను సైతం ఆశ్చర్యపరిచింది. ఈ విషయాన్ని ఆయనే తాజాగా చెప్పుకొచ్చారు.

ఓటుకు నోటు:
2009లో తొలిసారి కొడంగల్‌ నుంచి పోటి చేసి ఎమ్మెల్యేగా గెలిచిన రేవంత్‌ అసెంబ్లీలో అడుగుపెట్టారు. రాష్ట్ర విభజన తర్వాత జరిగిన తొలి 2014 అసెంబ్లీ ఎన్నికల్లోనూ గెలిచారు. అయితే ఆ తర్వాత రేవంత్‌ను కేసులు చుట్టుముట్టాయి. 2015లో ఓటుకు నోటు కేసులో రేవంత్‌ అరెస్ట్ అవడం తెలుగు రాష్ట్రాల్లో సంచలనం రేపింది. ఎక్కడ చూసినా ఈ కేసు గురించే చర్చ జరిగింది. రేవంత్‌ ఇలా చేయడం వెనుక నాటి ఏపీ ముఖ్యమంత్రి చంద్రబాబు నాయుడు ఉన్నారన్న ప్రచారం విషయం రాజకీయ వర్గాల్లో ప్రకంపనలు సృష్టించింది. టీడీపీ వర్సెస్‌ టీఆర్‌ఎస్‌(బీఆర్‌ఎస్‌) యుద్ధంలా మారిన నాటి ఘటనలో రేవంత్‌ జైలుకు వెళ్లారు. తన ఒక్కగాన ఒక్క కూతురి పెళ్లి సమయంలో ఇలా జరగడం ఆయన్ను ఎంతగానో బాధపెట్టింది.

జైలు నుంచి బయటకు వచ్చిన తర్వాత 2017లో కాంగ్రెస్‌లో చేరారు రేవంత్‌. అప్పటికీ కాంగ్రెస్‌ పరిస్థితి ఏం బాలేదు. తొలి విడుత పాలనలో కేసీఆర్‌ ఎన్నో సంక్షేమ పథకాలతో ప్రజలకు మరింత దగ్గరయ్యారు. ముందస్తుగా వెళ్లాలని నిర్ణయించుకున్నారు. 2019లో జరగాల్సిన ఎన్నికలు.. 2018 డిసెంబర్‌లోనే జరిగాయి.

కిందపడేశారు.. పైకి లేచి దూసుకెళ్లాడు:
తెలంగాణ రాజకీయాల్లో రేవంత్‌ వర్సెస్‌ కేసీఆర్‌ ముదురుతున్న సమయంలోనే 2018 తెలంగాణ అసెంబ్లీ ఎన్నికలు వచ్చాయి. కేసీఆర్‌పై నేరుగా విమర్శల బాణాలు ఎక్కుపెట్టడంలో అప్పటికీ అందరికంటే ముందున్న రేవంత్‌ను ఓడించేందుకు టీఆర్‌ఎస్‌(బీఆర్‌ఎస్‌) కొడంగల్‌పై ఎక్కువగా ఫోకస్‌ చేసింది. రేవంత్‌ ఓడిపోయారు. అయితే కుంగిపోలేదు.. బాధపడలేదు.. ఎందుకు ఓడిపోయానోనని లెక్కలేసుకోలేదు.. తర్వాత ఏం చేయలన్నదే ఆలోచించాడు. తనను కిందపడేసి నవ్వుతున్న ప్రత్యర్థులను చూసి నవ్వుకుంటూ పైకి లేచాడు. 2019 జనరల్‌ ఎలక్షన్స్‌లో మల్కాజ్‌గిరి నుంచి ఎంపీగా పోటి చేశాడు.. గెలిచాడు.. పార్లమెంట్‌లో అడుగుపెట్టాడు. తెలంగాణ కాంగ్రెస్‌ను ముందుండి నడిపించాడు.

పనితనం ఉంటే పదవులు అవే వస్తాయ్:
పదవుల వెనక పడితే పవర్‌ రాదు.. పవర్‌ ఉంటే పదవులు అవే వస్తాయ్. రేవంత్‌రెడ్డిలోని ఓ లీడర్‌ని కాంగ్రెస్‌ గుర్తించింది. రేవంత్ మాటలు, ప్రజలను ఇంప్రెస్‌ చేసే తీరు, ఆయన డైనమిజం, వర్కింగ్ మెకానిజం, ఆయన ధైర్యం, పోరాటం, పట్టుదల, సంకల్పం ఆయన్ను టీపీసీసీ ప్రెసిడెంట్‌ను చేసేలా చేశాయి. 2021లో రేవంత్‌కు టీపీసీసీ పగ్గాలు ఇవ్వడం సొంతపార్టీ నేతల్లోని కొందరికి ఏ మాత్రం నచ్చలేదు. ఆయనను బహిరంగంగా విమర్శించిన వాళ్లు, మీడియా ముందే బహిరంగంగా తిట్టిన వాళ్ల మధ్యే తిరుగుతూ రేవంత్‌ పార్టీని ముందుండి నడిపించాడు. ఆ సమయంలో ఆయన ముందున్న లక్ష్యం ఒక్కటే.. అదే 2023 అసెంబ్లీ ఎన్నికల్లో కాంగ్రెస్‌ను గెలిపించడం. అందుకోసమే అవమానాలను భరించాడు, అలకలను అర్థం చేసుకున్నాడు, ఆవేశం సమస్యకు పరిష్కారం కాదనుకున్నాడు. ఆలోచనతో అడుగులు ముందుకేశాడు..దీంతో సీనియర్లు కూడా కలిసి వచ్చారు. అదిష్టానం అండ తోడైంది. దీంతో బీఆర్‌ఎస్‌ టైరు పంక్చర్‌ అయ్యింది. నెల రోజుల ముందువరకు గెలవదులే అనుకున్న కాంగ్రెస్‌ తెలంగాణలో పాగా వేసిందంటే దాని వెనుక రేవంత్‌ మొక్కవోని దీక్ష ఉంది.. ఆయన పోరాటం ఉంది. ఇదే ఆయన్ను అందరిలో ఒకడిగా నిలబెట్టింది.. అందరూ గుర్తించేలా చేసింది. 21ఏళ్ల ప్రత్యక్ష రాజకీయ జీవితంలో 15ఏళ్ల ముందే తాను సీఎం అవుతానని రేవంత్‌ చెప్పిన మాటలు నిజం కావొచ్చు.. కాకపోనూ వచ్చు..! సీఎంగా రేవంత్‌ను కాంగ్రెస్‌ హైకమాండ్‌ ఎన్నుకోవచ్చు.. లేదా ఆ పని చేయకపోనూవచ్చు.. అయితే అదంతా సెకండరీ.. ఎందుకంటే ఇప్పుడు రేవంత్‌ అంటే పేరు కాదు.. ఇట్స్‌ ఏ బ్రాండ్‌..!

Also Read: ‘గులాబీ జెండా ఎగరలేదు’.. ‘మార్పురావాలి’ అందరి నోళ్లలో నానింది..బీఆర్‌ఎస్‌ ఫెయిల్ అయింది అక్కడే!

WATCH: