Grok AI Issue: గ్రోక్ ఏఐపై కేంద్రం కఠిన చర్యలు.. 'X'కు నోటీసు, 72 గంటల గడువు!

Grok AI Issue: ఎలాన్ మస్క్‌కు(Elon Musk) చెందిన సోషల్ మీడియా ప్లాట్‌ఫామ్ 'X' (మునుపటి ట్విట్టర్) మరోసారి వివాదంలో చిక్కుకుంది. ఈ ప్లాట్‌ఫామ్‌లో ఉపయోగిస్తున్న Grok AI కారణంగా మహిళలు, పిల్లల గోప్యతకు భంగం కలుగుతోందని కేంద్ర ప్రభుత్వం తీవ్ర ఆందోళన వ్యక్తం చేసింది. ఈ నేపథ్యంలో కేంద్ర సమాచార సాంకేతిక శాఖ (MeitY), 'X' సంస్థకు అధికారికంగా నోటీసులు పంపింది.

Centre issues notice to social media platform 'X' over obscene content targeting women, children on AI tool Grok.#Akashvani#Newspic.twitter.com/tGh4R3wEgi

— All India Radio News (@airnewsalerts) January 3, 2026

Grok AI ద్వారా అశ్లీల, అసభ్య, లైంగికంగా అవమానకరమైన కంటెంట్ తయారవుతోందని, ముఖ్యంగా మహిళల ఫోటోలను అనుమతి లేకుండా మార్ఫ్ చేసి షేర్ చేస్తున్నారని కేంద్రం స్పష్టం చేసింది. ఇది కేవలం అనైతికమే కాదు, చట్టవిరుద్ధమని కూడా పేర్కొంది.

Also Read: ఐరన్‌ డాన్‌ వర్సెస్‌ గ్రానైట్‌ కింగ్... 20 ఏళ్లుగా..వాల్మీకి సాక్షిగా..

మహిళల గోప్యతకు ముప్పు

ఇటీవలి కాలంలో 'X' ప్లాట్‌ఫామ్‌లో ఒక ప్రమాదకరమైన ట్రెండ్ మొదలైంది. సాధారణ మహిళల ఫోటోలను Grok AIకి ఇచ్చి, వాటిని అశ్లీలంగా మార్చేలా ప్రాంప్ట్‌లు ఇస్తున్నారు. Grok వాటికి ఎలాంటి ఆప్షన్ లేకుండా సమాధానాలు ఇస్తుండటమే అసలు సమస్యగా మారింది. ఇలా మార్ఫ్ చేసిన ఫోటోలు సోషల్ మీడియాలో విస్తృతంగా షేర్ అవుతున్నాయి.

ఈ విషయంపై శివసేన (UBT) ఎంపీ ప్రియాంక చతుర్వేది తీవ్రంగా స్పందించారు. మహిళల గోప్యత, భద్రత పూర్తిగా ప్రమాదంలో ఉందని పేర్కొంటూ కేంద్ర ఐటీ మంత్రి అశ్వినీ వైష్ణవ్‌కు లేఖ రాశారు. AIను ఇలా దుర్వినియోగం చేయడం నేరమని, వెంటనే చర్యలు తీసుకోవాలని ఆమె డిమాండ్ చేశారు.

‘రిమూవ్ దిస్ పిక్చర్’ ట్రెండ్‌పై ఆందోళన

Grok AIలో మరో వివాదాస్పద ట్రెండ్ కూడా వైరల్ అయింది. దీనిని “Remove This Picture” అని పిలుస్తున్నారు. ఇందులో కొందరు ప్రముఖుల ఫోటోలు ఇచ్చి, “వీరిలో నేరస్తుడిని తొలగించు”, “నటన రాని వ్యక్తిని తీసేయి” వంటి ప్రాంప్ట్‌లు ఇస్తున్నారు. Grok ఇచ్చే సమాధానాలను సోషల్ మీడియాలో పోస్ట్ చేయడంతో తీవ్ర వాగ్వాదాలు జరుగుతున్నాయి.

ఈ ట్రెండ్‌లో మహాత్మా గాంధీ, జవహర్‌లాల్ నెహ్రూ, ప్రధాని మోదీ, రాహుల్ గాంధీ, డొనాల్డ్ ట్రంప్, షారుక్ ఖాన్, ఆమిర్ ఖాన్ వంటి ప్రముఖులు కూడా టార్గెట్ కావడం గమనార్హం.

కేంద్రం జారీ చేసిన నోటీసు వివరాలు Notice Issued by Central Government

ఈ పరిణామాల నేపథ్యంలో, MeitY X సంస్థ చీఫ్ కంప్లయన్స్ ఆఫీసర్‌కు నోటీసు జారీ చేసింది. ఇందులో ముఖ్యంగా ఈ అంశాలను ప్రస్తావించింది:

• IT చట్టం 2000
• IT ఇంటర్మీడియరీ రూల్స్ 2021

ఈ రెండు చట్టాల ప్రకారం 'X' తన బాధ్యతలను సరిగా పాటించడం లేదని కేంద్రం పేర్కొంది.

Grok AI ద్వారా అశ్లీల చిత్రాలు, అసభ్య వీడియోలు, మహిళలు, పిల్లలను లక్ష్యంగా చేసుకున్న కంటెంట్ ఉత్పత్తి అవుతుండటం తీవ్రమైన చట్ట ఉల్లంఘన అని కేంద్రం స్పష్టం చేసింది.

72 గంటల గడువు - ATR తప్పనిసరి

కేంద్ర ప్రభుత్వం 'X'కి 72 గంటల గడువు ఇచ్చింది. ఈ లోపు.. 

1. Grok AI టెక్నికల్ వ్యవస్థను పూర్తిగా సమీక్షించాలి
2. అశ్లీల కంటెంట్‌ను వెంటనే తొలగించాలి
3. తప్పు చేసిన అకౌంట్లపై చర్యలు తీసుకోవాలి
4. Action Taken Report (ATR) సమర్పించాలి

ఈ నివేదికలో... Grokలో చేసిన మార్పులు, చీఫ్ కంప్లయన్స్ ఆఫీసర్ పాత్ర, తొలగించిన కంటెంట్ వివరాలు, నేరాలను అధికారులకు ఎలా నివేదిస్తున్నారో వివరించాలని కేంద్రం ఆదేశించింది.

చట్టపరమైన హెచ్చరిక

కేంద్రం చాలా స్పష్టంగా హెచ్చరించింది. నిబంధనలు పాటించకపోతే.. IT చట్టం సెక్షన్ 79 కింద ఉన్న రక్షణ తొలగిపోతుంది, X సంస్థపై నేర చర్యలు, కంపెనీ అధికారులపై కూడా కేసులు వేసే అవకాశం ఉందని తెలిపింది.

అలాగే,  

• Bharatiya Nyaya Sanhita (BNS)
• BNSS
• POCSO చట్టం
• మహిళల అశ్లీల చిత్రాల నిషేధ చట్టం వంటి అనేక చట్టాల కింద శిక్షలు పడతాయని స్పష్టం చేసింది.

సోషల్ మీడియా బాధ్యత తప్పనిసరి

ఈ విషయంపై కేంద్ర మంత్రి అశ్వినీ వైష్ణవ్ కూడా స్పందించారు. సోషల్ మీడియా ప్లాట్‌ఫామ్‌లు తమ వేదికల్లో వచ్చే కంటెంట్‌కు బాధ్యత వహించాల్సిందేనని అన్నారు. ఇప్పటికే పార్లమెంటరీ స్టాండింగ్ కమిటీ కూడా కఠిన చట్టాలను సిఫార్సు చేసిందని చెప్పారు. AI టెక్నాలజీని ఉపయోగించి మహిళల ఫోటోలను మార్ఫ్ చేయడం, షేర్ చేయడం పూర్తిగా నేరమని ఆయన స్పష్టం చేశారు.

AI దుర్వినియోగంపై భయం భయం.. 

Grok AI ఘటన ప్రపంచవ్యాప్తంగా చర్చకు దారి తీసింది. AI వల్ల లాభాలున్నప్పటికీ, సరైన నియంత్రణ లేకపోతే అది ప్రమాదంగా మారుతుందని ఈ ఘటన మరోసారి చూపించింది. మహిళలు, పిల్లల గోప్యత, భద్రతను కాపాడేందుకు కఠిన చర్యలు అవసరమని నిపుణులు చెబుతున్నారు.

మొత్తానికి, Grok AI వివాదం 'X' సంస్థకు పెద్ద హెచ్చరికగా మారింది. కేంద్రం ఇచ్చిన 72 గంటల గడువులో X ఎలా స్పందిస్తుందో చూడాలి. నిబంధనలు పాటించకపోతే, చట్టపరమైన పరిణామాలు తప్పవని స్పష్టమైంది. ఈ ఘటన AI నియంత్రణపై దేశవ్యాప్తంగా కొత్త చర్చకు దారి తీసింది.